الحمدللہ ! قرآن پاک روٹ ورڈ سرچ اور مترادف الفاظ کی سہولت پیش کر دی گئی ہے۔
جمعہ کے احکام و مسائل
1. جمعہ کے دن کی فضیلت
حدیث نمبر: 214 |
|
سیدنا ابوہریرہ رضی اللہ عنہ نے رسول اللہ صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”اللہ نے ہم سے پہلے لوگوں پر جمعہ فرض کیا، اللہ نے ہماری راہنمائی کی اور انہوں نے اس میں اختلاف کیا، پس لوگ اس میں ہمارے پیچھے ہیں: یہود (ہفتہ) اور نصاریٰ (اتوار)۔“
تخریج الحدیث: «مسلم، كتاب الجمعة، باب هداية هذه الامة ليوم الجمعة، رقم: 856. سنن نسائي، رقم: 1368. مسند احمد: 509/2.»
2. جمعہ کے دن کی مبارک گھڑی
حدیث نمبر: 215 |
|
سیدنا ابوہریرہ رضی اللہ عنہ بیان کرتے ہیں، رسول اللہ صلی اللہ علیہ وسلم نے فرمایا: ”جمعہ میں ایک ایسی گھڑی ہے کہ کوئی مسلمان نماز پڑھ رہا ہو اور وہ اس گھڑی میں اللہ سے جو بھی خیر طلب کرتا ہے تو وہ اسے عطا کر دیتا ہے۔“
تخریج الحدیث: «بخاري، كتاب الجمعة، باب الساعة فى يوم الجمعة، رقم: 935. مسلم، كتاب الجمعة، باب فى الساعة التى فى يوم الجمعة، رقم: 852. سنن ابن ماجه، رقم: 1137. مسند ابي يعلي، رقم: 6055.»
حدیث نمبر: 216 |
|
سیدنا ابوہریرہ رضی اللہ عنہ نے رسول اللہ صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”جمعہ میں ایک ایسی گھڑی ہے جس میں مسلمان شخص نماز پڑھ رہا ہو اور وہ اس میں اللہ سے کسی خیر کی درخواست کرے تو اللہ اسے وہی خیر عطا فرما دیتا ہے، بشرطیکہ وہ کسی گناہ یا قطع رحمی کا سوال نہ کرے۔“
تخریج الحدیث: «السابق»
3. تین جمعہ چھوڑنے پر دل پر مہر لگ جانے کا بیان
حدیث نمبر: 217 |
|
سیدنا ابوہریرہ رضی اللہ عنہ بیان کرتے ہیں، رسول اللہ صلی اللہ علیہ وسلم نے فرمایا: ”جو شخص کسی (شرعی) عذر کے بغیر تین جمعے چھوڑ دیتا ہے تو اس کے دل پر مہر لگ جاتی ہے۔“
تخریج الحدیث: «مسلم، كتاب الجمعة، باب التغليظ فى ترك الجمعة، رقم: 865. سنن ابوداود، رقم: 1052. سنن ترمذي، رقم: 500. سنن نسائي، رقم: 1369.»
4. جمعہ کے خطبے میں سورۂ ق کی تلاوت
حدیث نمبر: 218 |
|
حارثہ بن نعمان کی بیٹی نے فرمایا: میں نے دیکھا ہمارا اور رسول اللہ صلی اللہ علیہ وسلم کا تندور ایک ہی تھا، میں نے سورہ ق رسول اللہ صلی اللہ علیہ وسلم کے منہ مبارک سے (سن کر) سیکھی، آپ صلی اللہ علیہ وسلم جمعہ کے دن منبر پر اسے پڑھتے تھے۔
تخریج الحدیث: «مسلم، كتاب الجمعة، باب تخفيف الصلاة والخطبة، رقم: 872. سنن ابوداود، رقم: 1100. سنن نسائي، رقم: 1411.»
5. نمازِ جمعہ کے لیے غسل کرنا مسنون ہے
حدیث نمبر: 219 |
|
طاؤس رحمہ اللہ نے بیان کیا، رسول اللہ صلی اللہ علیہ وسلم نے فرمایا: ”ہر بالغ شخص پر حق ہے کہ وہ ہر سات دن میں سے ایک دن اللہ کی خاطر خوب صفائی کرے، اگرچہ وہ جنبی نہ ہو، وہ جمعہ کے دن اپنا سر اور اپنا جسم دھوئے گا۔“
تخریج الحدیث: «مصنف عبدالرزاق، رقم: 5295. اسناده صحيح.»
حدیث نمبر: 220 |
|
سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے جمعہ کے دن غسل کا ذکر کیا، طاؤس رحمہ اللہ نے بیان کیا، میں نے سیدنا ابن عباس رضی اللہ عنہما سے کہا: اگر وہ اپنے اہل کے پاس ہو تو کیا وہ خوشبو یا تیل لگائے گا؟ انہوں نے فرمایا: میں اس کے متعلق نہیں جانتا۔
تخریج الحدیث: «بخاري، كتاب الجمعة، باب هل على من لم يشهد الجمعة، رقم: 898، 897. مسلم: 849. سنن ابوداود، رقم: 341. سنن نسائي، رقم: 1375. سنن ابن ماجه، رقم: 1098»