جندب بن سفیان بجلی رضی اللہ عنہ کہتے ہیں: میں قربانی والے دن نبی صلی اللہ علیہ وسلم کے ساتھ تھا۔ آپ صلی اللہ علیہ وسلم نے فرمایا: ”جو نماز ادا کرنے سے پہلے ذبح کرے وہ نماز پڑھنے کے بعد اس کی جگہ دوسرا جانور قربان کرے اور جس نے ابھی تک ذبح نہیں کیا وہ ذبح کرے۔“ [السنن الكبرى للبيهقي/كِتَابُ الضَّحَايَا/حدیث: 19022]

سیدنا براء بن عازب رضی اللہ عنہ فرماتے ہیں کہ ان کے خالو سیدنا ابو بردہ بن نیار رضی اللہ عنہ نے نبی صلی اللہ علیہ وسلم کے ذبح کرنے سے پہلے قربانی کر دی۔ انہوں نے کہا: اے اللہ کے رسول صلی اللہ علیہ وسلم ! یہ تو گوشت کا دن ہے، اس لیے میں نے اپنی قربانی کو جلدی کیا ہے تاکہ اپنے گھر والوں اور ہمسایوں کو کھانا کھلا سکوں، تو رسول اللہ صلی اللہ علیہ وسلم نے فرمایا: ”قربانی دوبارہ کر۔“ انہوں نے کہا: اے اللہ کے رسول صلی اللہ علیہ وسلم ! میرے پاس بکری کا ایک سالہ بچہ ہے جو گوشت کی دو بکریوں سے اچھا ہے، تو آپ صلی اللہ علیہ وسلم نے فرمایا: ”یہ تیری بہترین قربانی ہے، لیکن تیرے بعد «جَذَع» یعنی کھیرا جانور کسی کو بھی کفایت نہ کرے گا۔“ [السنن الكبرى للبيهقي/كِتَابُ الضَّحَايَا/حدیث: 19023]

سیدنا انس بن مالک رضی اللہ عنہ فرماتے ہیں کہ نبی صلی اللہ علیہ وسلم نے قربانی کے دن فرمایا: ”جس نے نماز سے پہلے قربانی کر دی وہ اس کی جگہ دوسرا جانور ذبح کرے۔“ تو ایک شخص نے کھڑے ہو کر کہا: اے اللہ کے رسول! یہ ایسا دن ہے جس میں گوشت کی چاہت کی جاتی ہے اور اس نے اپنے پڑوسیوں کی کچھ حاجت کا تذکرہ کیا۔ گویا کہ رسول اللہ صلی اللہ علیہ وسلم نے اس کی تصدیق کی اور اس نے کہا: میرے پاس کھیرا جانور ہے جو دو گوشت کی بکریوں سے مجھے زیادہ محبوب ہے۔ راوی کہتے ہیں کہ آپ صلی اللہ علیہ وسلم نے اس کو رخصت دی، لیکن مجھے معلوم نہیں یہ رخصت اسی کو تھی یا اس کے علاوہ کسی اور کو بھی۔ [السنن الكبرى للبيهقي/كِتَابُ الضَّحَايَا/حدیث: 19024]

ابنِ علیہ رحمہ اللہ نے اپنی سند سے ذکر کیا ہے، اس میں زیادتی ہے کہ پھر رسول اللہ صلی اللہ علیہ وسلم دو مینڈھوں کی طرف مڑے اور انھیں ذبح کر دیا، تو لوگ بکریوں کے ایک چھوٹے ریوڑ کی طرف اٹھے اور اسے آپس میں بانٹ لیا، یا فرمایا: اس کے حصے کر لیے۔ [السنن الكبرى للبيهقي/كِتَابُ الضَّحَايَا/حدیث: 19025]

عباد بن تمیم رحمہ اللہ فرماتے ہیں کہ عویمر بن اشعر رضی اللہ عنہ نے عید کی نماز پڑھنے سے پہلے قربانی کر دی اور نبی صلی اللہ علیہ وسلم کو بتایا تو آپ صلی اللہ علیہ وسلم نے اس کی جگہ دوسری قربانی کرنے کا حکم دیا۔
(ب) بشری بن یسار رحمہ اللہ فرماتے ہیں کہ ابو بردہ بن نیار رضی اللہ عنہ نے رسول اللہ صلی اللہ علیہ وسلم کی قربانی ذبح کرنے سے پہلے ذبح کر دی تو ان کا گمان ہے کہ نبی صلی اللہ علیہ وسلم نے ان کو دوبارہ قربانی کرنے کا حکم فرمایا۔ ابو بردہ رضی اللہ عنہ نے کہا: میرے پاس صرف جزعہ ہے، تو رسول اللہ صلی اللہ علیہ وسلم نے فرمایا: ”اگر صرف تیرے پاس جزعہ ہے تو ذبح کر ڈال۔“ [السنن الكبرى للبيهقي/كِتَابُ الضَّحَايَا/حدیث: 19026]

امام شافعی رحمہ اللہ فرماتے ہیں: شاید قربانی کے واجب ہونے کی وجہ سے اعادہ کا حکم فرمایا اور یہ بھی احتمال ہے کہ اگر دوبارہ قربانی کا ارادہ ہو تو کر لے اور وقت سے پہلے والی قربانی کفایت نہ کرے گی۔ قربانی ایسی واجب نہیں کہ اس کا ترک کر دینا جائز نہ ہو، بلکہ یہ سنت ہے، اس کے لزوم کو ہم پسند کرتے ہیں اور ترک کو ناپسند کرتے ہیں، نہ کہ اسے واجب سمجھتے ہوئے۔ اگر یہ کہا جائے کہ وہ سنت کہاں ہے جو عدم وجوب پر دلالت کرتی ہے؟
(ب) ام سلمہ رضی اللہ عنہا فرماتی ہیں کہ رسول اللہ صلی اللہ علیہ وسلم نے فرمایا: ”جب عشرہ ذی الحج شروع ہو جائے تو قربانی کا ارادہ کرنے والا شخص اپنے جسم کے کسی حصہ سے بال نہ اکھاڑے۔“ امام شافعی رحمہ اللہ فرماتے ہیں: یہ حدیث دلالت کرتی ہے کہ قربانی واجب نہیں ہے، کیونکہ آپ صلی اللہ علیہ وسلم نے فرمایا: ”جو قربانی کا ارادہ کرے“ اگر قربانی واجب ہوتی تو آپ صلی اللہ علیہ وسلم یوں نہ فرماتے بلکہ یہ کہہ دیتے کہ کوئی اپنے بال نہ کٹوائے یہاں تک کہ قربانی کر لے۔
شیخ فرماتے ہیں: براء بن عازب رضی اللہ عنہ فرماتے ہیں کہ رسول اللہ صلی اللہ علیہ وسلم نے قربانی کے دن خطبہ ارشاد فرمایا: ”اس دن سب سے پہلا کام نماز ادا کرنا ہے پھر قربانی کرنا۔ جس نے یہ کام کیا اس نے ہماری سنت کو پا لیا۔“ [السنن الكبرى للبيهقي/كِتَابُ الضَّحَايَا/حدیث: 19027]

سیدنا عبداللہ بن عمرو رضی اللہ عنہما فرماتے ہیں کہ ایک شخص نبی صلی اللہ علیہ وسلم کے پاس آیا تو آپ صلی اللہ علیہ وسلم نے فرمایا: ”قربانی کا دن اللہ نے اس امت کے لیے عید کا دن مقرر فرمایا ہے۔“ تو اس شخص نے کہا: اگر اپنے بچوں اور گھر والوں کے دودھ والا جانور ذبح کر دوں؟ آپ صلی اللہ علیہ وسلم نے فرمایا: ”دودھ والا جانور ذبح نہ کر، لیکن اپنے ناخن کاٹ، مونچھیں مونڈ لے اور زیرِ ناف بالوں کی صفائی کر، اس طرح تجھے اللہ سے مکمل قربانی کا ثواب ملے گا۔“ [السنن الكبرى للبيهقي/كِتَابُ الضَّحَايَا/حدیث: 19028]

ابن وہب رحمہ اللہ نے اسے اپنی سند سے اسی طرح ذکر کیا ہے۔ [السنن الكبرى للبيهقي/كِتَابُ الضَّحَايَا/حدیث: 19029]

عکرمہ، سیدنا عبداللہ بن عباس رضی اللہ عنہما سے نقل فرماتے ہیں کہ رسول اللہ صلی اللہ علیہ وسلم نے فرمایا: ”تین چیزیں میرے اوپر فرض ہیں اور تمہارے لیے نفل: قربانی کرنا، وتر پڑھنا، اور چاشت کی دو رکعت ادا کرنا۔“ [السنن الكبرى للبيهقي/كِتَابُ الضَّحَايَا/حدیث: 19030]

عکرمہ حضرت عبداللہ بن عباس رضی اللہ عنہما سے مرفوعاً نقل فرماتے ہیں کہ آپ صلی اللہ علیہ وسلم نے فرمایا: ”قربانی میرے اوپر فرض ہے جبکہ تمہارے اوپر فرض نہیں ہے۔“ اصبہانی نے اپنی روایت میں زیادہ کیا ہے کہ ”مجھے نماز چاشت کا حکم دیا گیا ہے جبکہ تمہیں حکم نہیں دیا گیا۔“ [ضعیف] [السنن الكبرى للبيهقي/كِتَابُ الضَّحَايَا/حدیث: 19031]