سیدنا ابومالک اشعری رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”بے شک جنت میں ایسے بالا خانے ہیں جن کا بیرونی حصہ اندر سے اور اندرونی حصہ باہر سے نظر آتا ہے اللہ تعالیٰ نے یہ ان کے لئے تیار کیے ہیں جو کھانا کھلاتا ہے نرمی سے گفتگو کرتا ہے مسلسل روزے رکھتا ہے، اور اس وقت نفل نماز ادا کرتا ہے، جب لوگ سو رہے ہوں“۔
یہ روایت امام أحمد نے نقل کی ہے، اور اس کے رجال ثقہ ہیں اور اس حدیث کے مختلف طرق ہیں جن کا ذکر ان کے مخصوص مقام پر ہو گا اگر اللہ نے چاہا۔ [مجمع الزاوئد ومنبع الفوائد/كِتَابُ الصِّيَامِ/حدیث: 5162]

سیدنا ابوموسی اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص ہمیشہ روزے رکھتا ہے اس پر جہنم یوں تنگ ہو جائے گی“۔ نبی اکرم صلی اللہ علیہ وسلم نے اپنی مٹھی بند کر کے یہ بات ارشاد فرمائی۔
یہ روایت امام أحمد اور امام بزار نے نقل کی ہے، تاہم انہوں نے یہ الفاظ نقل کیے ہیں: ”نبی اکرم صلی اللہ علیہ وسلم نے نوے کا عدد بنا کر یہ بات ارشاد فرمائی“۔
یہ روایت امام طبرانی نے معجم کبیر میں نقل کی ہے، اور اس کے رجال ”صحیح“ کے رجال ہیں۔ [مجمع الزاوئد ومنبع الفوائد/كِتَابُ الصِّيَامِ/حدیث: 5163]

ابوقیس جو عمرو کے غلام ہیں وہ بیان کرتے ہیں: سیدنا عمرو رضی اللہ عنہ مسلسل نفلی روزے رکھا کرتے تھے۔
یہ روایت امام طبرانی نے معجم کبیر میں نقل کی ہے، اور اس کے رجال ”صحیح“ کے رجال ہیں۔ [مجمع الزاوئد ومنبع الفوائد/كِتَابُ الصِّيَامِ/حدیث: 5164]

مجاہد بیان کرتے ہیں: میں اور یحییٰ بن جعدہ، انصار سے تعلق رکھنے والے ایک صحابی کی خدمت میں حاضر ہوئے انہوں نے یہ بات بیان کی نبی اکرم صلی اللہ علیہ وسلم کے سامنے بنو عبدالمطلب کی ایک کنیز کا ذکر کیا گیا تو کہنے والے نے یہ کہا: وہ رات بھر نفل پڑھتی رہتی ہے، اور دن میں روزہ رکھتی ہے نبی اکرم صلی اللہ علیہ وسلم نے ارشاد فرمایا، لیکن میں تو (رات کے وقت) سو بھی جاتا ہوں اور نماز بھی پڑھتا ہوں اور (نفلی) روزہ ترک بھی کر دیتا ہوں تو جو شخص میری اقتداء کرے گا وہ مجھ سے ہو گا، اور جو میری سنت سے منہ موڑے گا اس کا مجھ سے کوئی واسطہ نہیں ہو گا ہر عمل کے لئے ایک چستی ہے پھر اس میں سستی آ جاتی ہے، جس شخص کی سستی بدعت کی طرف ہو گی وہ گمراہ ہو جائے گا، اور جس شخص کی سستی میری سنت کی طرف ہو گی وہ ہدایت پا لے گا۔
یہ روایت امام أحمد نے نقل کی ہے، اور اس کے رجال ”صحیح“ کے رجال ہیں۔ اس سے پہلے اس کی مانند کچھ احادیث گزر چکی ہیں۔ [مجمع الزاوئد ومنبع الفوائد/كِتَابُ الصِّيَامِ/حدیث: 5165]

سیدہ اسماء بنت یزید رضی اللہ عنہا بیان کرتی ہیں: نبی اکرم صلی اللہ علیہ وسلم کے پاس مشروب لایا گیا وہ مشروب تمام حاضرین کے پاس لے جایا گیا ان میں ایک روزہ دار شخص موجود تھا جب اس کے پاس مشروب پہنچا تو نبی اکرم صلی اللہ علیہ وسلم نے اس سے فرمایا تم پی لو! عرض کی گئی: یا رسول اللہ! یہ شخص کوئی نفلی روزہ نہیں چھوڑتا ہے یہ مسلسل نفلی روزے رکھتا ہے نبی اکرم صلی اللہ علیہ وسلم نے ارشاد فرمایا: اس شخص نے درحقیقت روزہ نہیں رکھا جو ہمیشہ روزے رکھتا ہو۔
یہ روایت امام أحمد نے اور امام طبرانی نے معجم کبیر میں نقل کی ہے۔ انہوں نے یہ الفاظ نقل کیے ہیں: ”شخص ہمیشہ روزے رکھے اس نے نہ روزہ رکھا اور نہ ہی روزہ ترک کیا“۔ اس کی سند میں ایک راوی لیث بن ابوسلیم ہے وہ ثقہ ہے، لیکن وہ تدلیس کرنے والا ہے۔ [مجمع الزاوئد ومنبع الفوائد/كِتَابُ الصِّيَامِ/حدیث: 5166]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”اس شخص نے روزہ نہیں رکھا جو ہمیشہ (نفلی) روزے رکھتا ہو“۔
یہ روایت امام طبرانی نے معجم کبیر میں نقل کی ہے۔ اس کی سند میں ایک راوی عبیدہ بن معتب ہے، اور وہ متروک ہے۔ [مجمع الزاوئد ومنبع الفوائد/كِتَابُ الصِّيَامِ/حدیث: 5167]

سیدنا عبدالله بن سفیان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اس شخص نے روزہ نہیں رکھا جو ہمیشہ (نفلی) روزے رکھتا ہو“۔
یہ روایت امام طبرانی نے معجم کبیر میں نقل کی ہے۔ اس کی سند میں ایک راوی محمد بن ابولیلی ہے، اور اس کے بارے میں کلام کیا گیا ہے۔ [مجمع الزاوئد ومنبع الفوائد/كِتَابُ الصِّيَامِ/حدیث: 5168]

عمرو بن سلمہ بیان کرتے ہیں: سیدنا عبداللہ بن مسعود رضی اللہ عنہ سے ہمیشہ روزے رکھنے کے بارے میں دریافت کیا گیا، تو انہوں نے اسے مکروہ قرار دیا اور یہ بات ارشاد فرمائی: ہر مہینے میں تین (نفلی) روزے رکھے جائیں گے۔
یہ روایت امام طبرانی نے معجم کبیر میں نقل کی ہے، اور اس کی سند حسن ہے۔ [مجمع الزاوئد ومنبع الفوائد/كِتَابُ الصِّيَامِ/حدیث: 5169]