سیدنا جابر بن عبداللہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”تین کام ایسے ہیں کہ جو شخص اللہ تعالیٰ پر اعتماد کرتے ہوئے اور ثواب کی امید کرتے ہوئے وہ کام کرتا ہے، تو اللہ تعالیٰ کے ذمہ یہ بات لازم ہے کہ وہ اس شخص کی مدد کرے اور اس شخص کے لئے برکت رکھے، جو شخص اللہ تعالیٰ پر یقین رکھتے ہوئے اور ثواب کی امید رکھتے ہوئے کسی غلام کو آزاد کرنے کی کوشش کرتا ہے، تو اللہ تعالیٰ کے ذمہ یہ بات لازم ہے کہ اس شخص کی مدد کرے اور اس کو برکت نصیب کرے، جو شخص اللہ تعالیٰ پر یقین رکھتے ہوئے شادی کرتا ہے، تو اللہ تعالیٰ کے ذمہ یہ بات لازم ہے کہ وہ اس کی مدد کرے اور اس میں برکت نصیب کرے، اور جو شخص اللہ تعالیٰ پر یقین رکھتے ہوئے اور ثواب کی امید رکھتے ہوئے کسی بنجر زمین کو آباد کرتا ہے، تو اللہ تعالیٰ کے ذمہ یہ بات لازم ہے کہ وہ اس شخص کی مدد کرے اور اسے برکت نصیب کرے“۔
یہ روایت امام طبرانی نے معجم کبیر اور معجم اوسط میں نقل کی ہے، اس کی سند میں ایک راوی عبیداللہ بن وازع ہے، جس سے صرف اس کے پوتے عمرو بن عاصم نے روایت نقل کی ہے اس روایت کے بقیہ رجال ثقہ ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7335]