عمر بن ابی الخوار رحمہ اللہ بیان کرتے ہیں کہ نافع بن جبیر رحمہ اللہ نے انہیں سیدنا سائب بن یزید رضی اللہ عنہ کے پاس بھیجا کہ وہ ان سے اس بات کے بارے میں پوچھیں جو انہوں نے سیدنا معاویہ رضی اللہ عنہ سے نماز میں دیکھی تھی، تو انہوں نے کہا: میں نے ان کے ساتھ مقصورہ میں جمعہ پڑھا، جب انہوں نے سلام پھیرا تو میں اپنی جگہ کھڑا ہو کر نماز پڑھنے لگا، جب وہ اندر گئے تو انہوں نے مجھے بلوایا اور فرمایا: ”جو تم نے کیا دوبارہ نہ کرنا، جب تم جمعہ پڑھ لو تو اس کے ساتھ فوراً کوئی نماز نہ ملاؤ یہاں تک کہ بات کر لو یا باہر نکل جاؤ، کیونکہ نبی اللہ صلی اللہ علیہ وسلم نے اسی کا حکم دیا تھا۔“ ہوذہ نے اپنی روایت میں مزید کہا: کہ اسے کسی نماز کے ساتھ نہ ملایا جائے یہاں تک کہ بات کر لے یا باہر نکل جائے۔ [المعجم الكبير للطبراني/باب الميم/حدیث: 16761]

عبداللہ بن سائب رحمہ اللہ اپنے والد سیدنا سائب بن یزید رضی اللہ عنہ سے روایت کرتے ہیں، وہ کہتے ہیں: سیدنا معاویہ رضی اللہ عنہ نے عصر کے بعد مجھے بلوایا اور فرمایا: ”تم کہاں تھے؟“ میں نے عرض کیا: میں نماز پڑھ رہا تھا۔ انہوں نے فرمایا: ”عصر کے بعد نماز پڑھتے ہو؟“ میں نے عرض کیا: جی ہاں۔ معاویہ رضی اللہ عنہ نے فرمایا: ”ایسا مت کرو، کیونکہ میں رسول اللہ صلی اللہ علیہ وسلم (کے طریقے) کو زیادہ جانتا ہوں۔“ [المعجم الكبير للطبراني/باب الميم/حدیث: 16762]

عبداللہ بن سائب رحمہ اللہ اپنے والد سیدنا سائب بن یزید رضی اللہ عنہ سے روایت کرتے ہیں کہ انہوں نے انہیں بتایا کہ سیدنا معاویہ بن ابی سفیان رضی اللہ عنہ نے مسجد میں جمعہ کے بعد پڑھی جانے والی دو رکعتوں اور عصر کے بعد کی دو رکعتوں سے منع فرمایا، سیدنا معاویہ رضی اللہ عنہ کہتے تھے: اور میں رسول اللہ صلی اللہ علیہ وسلم کی نماز کو زیادہ جانتا ہوں۔ [المعجم الكبير للطبراني/باب الميم/حدیث: 16763]

امام زہری رحمہ اللہ سیدنا سائب بن یزید رضی اللہ عنہ سے روایت کرتے ہیں کہ انہوں نے سیدنا معاویہ رضی اللہ عنہ کو مدینہ میں رسول اللہ صلی اللہ علیہ وسلم کے منبر پر خطبہ دیتے سنا، اور ان کے ہاتھ میں بالوں کی ایک لٹ تھی، تو انہوں نے کہا: اے اہلِ مدینہ! تمہارے علماء کہاں ہیں؟ میں نے رسول اللہ صلی اللہ علیہ وسلم کو اس سے منع کرتے سنا، اور آپ صلی اللہ علیہ وسلم نے فرمایا: ”تم سے پہلے لوگ اسی وقت ہلاک ہوئے جب ان کی عورتوں نے اسے اختیار کیا۔“ [المعجم الكبير للطبراني/باب الميم/حدیث: 16764]

امام زہری رحمہ اللہ سیدنا سائب بن یزید رضی اللہ عنہ سے روایت کرتے ہیں کہ انہوں نے سیدنا معاویہ رضی اللہ عنہ کو خطبہ دیتے سنا، وہ کہہ رہے تھے: اے اہلِ مدینہ! تمہارے علماء کہاں ہیں؟ میں نے رسول اللہ صلی اللہ علیہ وسلم کو یہ فرماتے سنا: ”یہ عاشوراء کا دن ہے، اللہ نے اس کا روزہ فرض نہیں کیا، اور میں روزہ دار ہوں، پس جو چاہے روزہ رکھے اور جو چاہے افطار کرے۔“ [المعجم الكبير للطبراني/باب الميم/حدیث: 16765]