سیدنا معاذ بن جبل رضی اللہ عنہ سے روایت ہے، وہ بیان کرتے ہیں: ہم رسول اللہ صلی اللہ علیہ وسلم کے پاس آئے جبکہ آپ نماز پڑھ رہے تھے، جب آپ صلی اللہ علیہ وسلم نے اپنی نماز مکمل کی تو میں نے عرض کیا: یا رسول اللہ! میں نے آپ کو نماز میں ایسا کچھ کرتے دیکھا جو پہلے کبھی نہیں دیکھا تھا، تو آپ صلی اللہ علیہ وسلم نے فرمایا: ”یہ رغبت و رہبت (امید اور خوف) کی نماز تھی، میں نے اس میں اللہ تعالیٰ سے تین چیزیں مانگیں، تو اس نے مجھے دو عطا کیں اور ایک سے روک دیا۔ میں نے اس سے یہ سوال کیا کہ وہ میری امت پر کسی ایسے دشمن کو غالب نہ کرے جو ان کے علاوہ ہو، اور وہ انہیں جڑ سے اکھاڑ پھینکے، تو اس نے مجھے یہ عطا کر دی۔ اور میں نے اس سے یہ سوال کیا کہ وہ ان پر کوئی (عام) قحط نہ بھیجے جو انہیں تباہ کر دے، تو اس نے مجھے یہ بھی عطا کر دی۔ اور میں نے اس سے یہ سوال کیا کہ وہ ان کی آپس کی لڑائی نہ رکھے، تو اس نے مجھ سے یہ (سوال) روک لیا۔“ [المعجم الكبير للطبراني/باب الميم/حدیث: 17206]