سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم کو تین سفید کپڑوں میں کفن دیا گیا جو «سَحُولِيَّة» ”سحولیہ“ تھے، جن میں قمیص اور عمامہ نہیں تھا۔
ثوری کی روایت میں ہے کہ سیدہ رضی اللہ عنہا نے کہا: رسول اللہ صلی اللہ علیہ وسلم کو روئی کے تین کپڑوں میں کفن دیا گیا جو «سَحُولِيَّة» ”سحولیہ“ تھے۔ [السنن الكبرى للبيهقي/كِتَابُ الجَنَائِزِ/حدیث: 6671]

سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم کو کفن دیا گیا تین کپڑوں میں جو (سحولیہ) تھے اور سفید تھے۔ ان میں قمیص اور عمامہ شامل نہیں تھا۔ [السنن الكبرى للبيهقي/كِتَابُ الجَنَائِزِ/حدیث: 6672]

سیدہ عائشہ رضی اللہ عنہا، نبی کریم صلی اللہ علیہ وسلم کی زوجہ بیان کرتی ہیں کہ جب سیدنا ابوبکر رضی اللہ عنہ کی بیماری شدت اختیار کر گئی تو میں اس غم و پریشانی کی وجہ سے رو دی اور میں نے کہا: جس کے آنسو ہمیشہ گرتے رہتے تھے آج وہ خود یکبارگی پچھاڑ دیا گیا ہے۔ وہ کہتی ہیں: سیدنا ابوبکر رضی اللہ عنہ کچھ ہوش میں آئے تو گویا ہوئے کہ ”بات ایسے نہیں جیسے تو کہہ رہی ہے، اے میری بیٹی! لیکن یہ تو ﴿وَجَاءَتْ سَكْرَةُ الْمَوْتِ بِالْحَقِّ ذَلِكَ مَا كُنْتَ مِنْهُ تَحِيدُ﴾ [سورة ق: 19] موت کا وقت آ چکا ہے اور یہ اس کی بے ہوشیاں ہیں جس سے میں بھاگ نہیں سکتا۔“ پھر انہوں نے کہا: ”رسول اللہ صلی اللہ علیہ وسلم کس دن فوت ہوئے؟“ کہتی ہیں: میں نے کہا: پیر کے دن۔ پھر انہوں نے کہا: ”آج کون سا دن ہے؟“ میں نے کہا: پیر کا دن۔ تو سیدنا ابوبکر رضی اللہ عنہ نے کہا: ”بے شک میں امید کرتا ہوں، میرے اور اس کے درمیان ایک رات ہے۔“ وہ کہتی ہیں کہ سیدنا ابوبکر رضی اللہ عنہ منگل کی رات فوت ہوئے اور صبح ہونے سے پہلے دفن کر دیے گئے اور انہوں نے یہ کہا: ”رسول اللہ صلی اللہ علیہ وسلم کو کتنے کپڑوں میں کفن دیا گیا؟“ وہ کہتی ہیں: ”ہم نے آپ صلی اللہ علیہ وسلم کو تین کپڑوں میں کفن دیا جو سحولیہ تھے اور سفید تھے، ان میں قمیص اور عمامہ نہیں تھا۔“ وہ کہتی ہیں کہ انہوں نے کہا: ”میرے کپڑوں کو دھو ڈالو اور انہیں زعفران لگا دینا یا (کستوری) اور ان کے ساتھ مجھے کفن دے دینا۔ نئے کپڑے کے زیادہ محتاج زندہ لوگ ہیں، بے شک وہ تو مہلت کے لیے تھے۔“ [السنن الكبرى للبيهقي/كِتَابُ الجَنَائِزِ/حدیث: 6673]

ابو سلمہ بیان کرتے ہیں کہ میں نے سیدہ عائشہ رضی اللہ عنہا سے سوال کیا کہ کتنے کپڑوں میں رسول اللہ صلی اللہ علیہ وسلم کو کفن دیا گیا؟ انہوں نے کہا: تین کپڑوں میں اور وہ بھی سحولیہ تھے۔ [السنن الكبرى للبيهقي/كِتَابُ الجَنَائِزِ/حدیث: 6674]