ابراہیم بن سعد اپنے والد (اور وہ اپنے) دادا سے نقل فرماتے ہیں کہ سیدنا عمر رضی اللہ عنہ نے نبی صلی اللہ علیہ وسلم کی ازواجِ مطہرات کو حج کی اجازت دے دی۔ ان کے ساتھ سیدنا عثمان بن عفان اور سیدنا عبدالرحمن بن عوف رضی اللہ عنہما کو روانہ کیا، سیدنا عثمان رضی اللہ عنہ لوگوں میں آواز دیتے تھے کہ ان کے قریب کوئی نہ جائے اور ان کی طرف کوئی نہ دیکھے مگر حدِ نگاہ کے فاصلے سے۔ وہ اونٹوں پر ہودج میں ہوتیں اور گھاٹی کی ابتدا میں ان کو اتارا جاتا تھا، سیدنا عبدالرحمن بن عوف اور سیدنا عثمان رضی اللہ عنہما گھاٹی کے آخری حصے میں اترتے تھے، ان کی طرف کوئی اوپر نہ جاتا تھا۔ [السنن الكبرى للبيهقي/كتاب الحج/حدیث: 10144]

سیدنا عبداللہ بن عباس رضی اللہ عنہما فرماتے ہیں کہ ﴿أَیَّامٍ مَّعْلُوْمَاتٍ﴾ [سورة الحج: 28] (معلوم ایام) سے مراد دس دن ہیں اور ﴿أَیَّامٍ مَّعْدُوْدَاتٍ﴾ [سورة البقرة: 203] (معدودات) سے مراد ایامِ تشریق ہیں۔ [السنن الكبرى للبيهقي/كتاب الحج/حدیث: 10145]

عمرو بن دینار رحمہ اللہ فرماتے ہیں کہ میں نے ابن عباس رضی اللہ عنہما کو دیکھا کہ وہ کوچ کے دن (یوم النفر) مکہ میں تکبیرات کہتے تھے اور تلاوت کرتے: ﴿وَاذْكُرُوا اللَّهَ فِي أَيَّامٍ مَّعْدُودَاتٍ﴾ [سورة البقرة: 203] ”اور اللہ کا ذکر کرو شمار کیے ہوئے ایام میں۔“ [السنن الكبرى للبيهقي/كتاب الحج/حدیث: 10146]

مجاہد رحمہ اللہ کہتے ہیں کہ ﴿أَيَّامٍ مَّعْلُومَاتٍ﴾ [سورة الحج: 28] سے مراد دس ایام اور ﴿أَيَّامٍ مَّعْدُودَاتٍ﴾ [سورة البقرة: 203] سے مراد ایام تشریق ہیں (یعنی 11، 12، 13 ذوالحجہ)۔ [السنن الكبرى للبيهقي/كتاب الحج/حدیث: 10147]

سیدنا عبداللہ بن عباس رضی اللہ عنہما تمتع کے قصہ کے بارے میں فرماتے ہیں کہ ﴿فَمَا اسْتَيْسَرَ مِنَ الْهَدْيِ﴾ [سورة البقرة: 196] ”جو قربانی سے میسر آئے۔“ یعنی اونٹ، گائے، بکری، یا کسی خون میں شرکت و حصہ داری۔ [السنن الكبرى للبيهقي/كتاب الحج/حدیث: 10148]

مجاہد، ابن عباس رضی اللہ عنہما سے نقل فرماتے ہیں کہ قربانی کے جانور 8 قسم کے ہیں۔ [السنن الكبرى للبيهقي/كتاب الحج/حدیث: 10149]

عطاء بن ابی رباح رحمہ اللہ، سیدنا عبداللہ بن عباس رضی اللہ عنہما سے نقل فرماتے ہیں کہ آٹھ قسم کے جانور (نر و مادہ) قربانی کے اونٹ، گائے، بکری، بھیڑ استطاعت کے مطابق جتنا بڑا ہو، اتنا ہی افضل ہے۔ [السنن الكبرى للبيهقي/كتاب الحج/حدیث: 10150]

ابوجعفر رحمہ اللہ بیان کرتے ہیں کہ ایک آدمی نے سیدنا علی رضی اللہ عنہ سے قربانی کے متعلق سوال کیا کہ وہ کس جانور سے ہو؟ سیدنا علی رضی اللہ عنہ نے فرمایا: ”آٹھ قسم کے جانوروں سے۔“ گویا کہ اس آدمی کو اس میں شک گزرا تو سیدنا علی رضی اللہ عنہ نے فرمایا: ”کیا تم قرآن کی تلاوت کرتے ہو؟“ اس نے کہا: جی ہاں۔ فرمایا: ”کیا آپ نے اللہ تعالیٰ کا یہ فرمان سن رکھا ہے: ﴿يَا أَيُّهَا الَّذِينَ آمَنُوا أَوْفُوا بِالْعُقُودِ ۚ أُحِلَّتْ لَكُم بَهِيمَةُ الْأَنْعَامِ﴾ [سورة المائدة: 1] ”اے ایمان والو! اللہ کے عہد و پیمان کو پورا کرو، چوپائے چرنے والے جانور تمہارے لیے حلال کیے گئے ہیں۔“ اس نے کہا: جی ہاں۔ فرمایا: ”کیا آپ نے اللہ تعالیٰ کا یہ فرمان بھی سن رکھا ہے: ﴿لِّيَذْكُرُوا اسْمَ اللَّهِ عَلَىٰ مَا رَزَقَهُم مِّن بَهِيمَةِ الْأَنْعَامِ﴾ [سورة الحج: 34] ”تاکہ وہ اللہ کا نام ذکر کریں ان چوپائے جانوروں پر جو ہم نے ان کو عطا کیے ہیں۔“ اور اللہ تعالیٰ کا یہ فرمان: ﴿وَمِنَ الْأَنْعَامِ حَمُولَةً وَفَرْشًا ۚ كُلُوا مِمَّا رَزَقَكُمُ اللَّهُ﴾ [سورة الأنعام: 142] ”اور چوپائے جانوروں میں سے اس نے بوجھ لادنے والے اور زمین کے ساتھ لگے ہوئے پیدا کیے، لوگو! اللہ نے جو رزق دیا ہے اسے تم کھاؤ۔“ کیا آپ نے اللہ تعالیٰ کا یہ فرمان بھی سن رکھا ہے: ﴿مِنَ الضَّأْنِ اثْنَيْنِ وَمِنَ الْمَعْزِ اثْنَيْنِ ۗ قُلْ آلذَّكَرَيْنِ حَرَّمَ أَمِ الْأُنثَيَيْنِ أَمَّا اشْتَمَلَتْ عَلَيْهِ أَرْحَامُ الْأُنثَيَيْنِ ۖ نَبِّئُونِي بِعِلْمٍ إِن كُنتُمْ صَادِقِينَ ۞ وَمِنَ الْإِبِلِ اثْنَيْنِ وَمِنَ الْبَقَرِ اثْنَيْنِ﴾ [سورة الأنعام: 143-144] ”(چار جوڑے) دو بھیڑیں (نر اور مادہ) اور دو بکریاں (نر و مادہ)۔ (اے پیغمبر!) آپ کہہ دیں: کیا اللہ نے (ان بھیڑ بکری میں سے) دو نروں کو (یعنی مینڈھے اور بکرے کو) حرام کیا ہے یا دونوں مادوں کو (بھیڑ اور بکری کو) یا ان دونوں مادوں کے پیٹ میں جو (بچہ) ہے، اگر تم سچے ہو تو مجھے کسی علم (سند) سے بتاؤ۔ اور اونٹ میں سے دو اور گائے میں سے دو (نر و مادہ)۔ (اے پیغمبر!) کہہ دیں: کیا اللہ نے دونوں نروں کو (یعنی اونٹ اور بیل کو) حرام کیا ہے یا دونوں مادوں کو (یعنی اونٹنی اور گائے کو) یا دونوں مادوں کے پیٹ میں جو (بچہ) ہے اس کو۔“ اس نے کہا: جی ہاں۔ سیدنا علی رضی اللہ عنہ نے فرمایا: ”کیا اللہ کا یہ فرمان سن رکھا ہے: ﴿يَا أَيُّهَا الَّذِينَ آمَنُوا لَا تَقْتُلُوا الصَّيْدَ وَأَنتُمْ حُرُمٌ﴾ [سورة المائدة: 95] ”اے لوگو! جو ایمان لائے ہو تم احرام کی حالت میں شکار کو قتل نہ کرو۔“ یہاں تک کہ فرمایا: ﴿هَدْيًا بَالِغَ الْكَعْبَةِ﴾ [سورة المائدة: 95] ۔“ اس آدمی نے کہا: جی ہاں۔ پھر اس نے کہا: میں نے ایک ہرن کو قتل کیا ہے، میرے اوپر کیا فدیہ ہے؟ سیدنا علی رضی اللہ عنہ فرمانے لگے: ”ایک قربانی۔“ سیدنا علی رضی اللہ عنہ نے فرمایا: ”یہ قربانی کعبہ میں ہونی چاہیے، جیسا کہ اللہ تعالیٰ نے فرمایا ہے۔“ [السنن الكبرى للبيهقي/كتاب الحج/حدیث: 10151]

حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: ”جب جمعہ کا دن ہوتا ہے تو مساجد کے دروازوں پر فرشتے ہوتے ہیں، وہ پہلے آنے والوں کو درج کرتے ہیں، جب امام منبر پر تشریف رکھتا ہے تو وہ اپنے صحیفے بند کر لیتے ہیں اور ذکر کو سنتے ہیں، جلدی آنے والا ایسے ہے جیسے اونٹ کی قربانی دیتا ہے، اس کے بعد آنے والے کو گائے کی قربانی کا ثواب ملتا ہے، پھر اس کے بعد آنے والے کو مینڈھے کی قربانی کا ثواب، پھر اس کے بعد مرغی کے صدقہ کا ثواب، پھر اس کے بعد آنے والے کو انڈہ صدقہ کرنے کا ثواب ملتا ہے۔“ [السنن الكبرى للبيهقي/كتاب الحج/حدیث: 10152]

سیدنا جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: ”دو دانت والا جانور ہی قربان کرو، اگر تنگی ہو (یعنی جانور ملے نہ) تو پھر بھیڑ کا کھیرا بھی کر سکتے ہو۔“ [السنن الكبرى للبيهقي/كتاب الحج/حدیث: 10153]