سیدنا ابوبکرہ رضی اللہ عنہ بیان کرتے ہیں: آدمی کے لیے یہ بات مکروہ ہے کہ وہ اپنے غسل کی جگہ پر پیشاب کرے، کیونکہ اس طرح اُسے وسوسے لاحق ہوں گے۔
یہ روایت امام طبرانی نے معجم کبیر میں نقل کی ہے، اس کی سند میں ایک راوی صلہ بن دینار ہے اور وہ ضعیف ہے۔ [مجمع الزاوئد ومنبع الفوائد/كتاب الطهارة/حدیث: 1003]

سیدنا سراقہ بن مالک بن جعشم رضی اللہ عنہ کے بارے میں یہ بات منقول ہے: جب وہ نبی اکرم صلی اللہ علیہ وسلم کے پاس سے (اپنے علاقے میں واپس) تشریف لائے، تو انہوں نے اپنی قوم کو باتیں بتائیں، اور انہیں (شرعی احکام کی) تعلیم دی، ایک دن ایک شخص نے اُن کا مذاق اڑاتے ہوئے یہ کہا: سراقہ کا اب بس یہی کام رہ گیا ہے کہ وہ تمہیں یہ تعلیم دے کہ پاخانہ کیسے کرنا ہے؟ تو سیدنا سراقہ رضی اللہ عنہ نے فرمایا: جب تم قضائے حاجت کے لیے جاؤ، تو سائے، یا راستے میں بیٹھنے سے بچو، پھر استعمال کرو اور طاق تعداد میں استعمال کرو۔
یہ روایت امام طبرانی نے معجم اوسط میں نقل کی ہے اور اس کی سند حسن ہے۔ [مجمع الزاوئد ومنبع الفوائد/كتاب الطهارة/حدیث: 1004]

علقمہ بیان کرتے ہیں: مشرکین سے تعلق رکھنے والے ایک شخص نے سیدنا عبداللہ رضی اللہ عنہ سے کہا: آپ کے آقا کے بارے میں، میں یہ گمان کرتا ہوں کہ انہوں نے تمہیں ہر چیز کی تعلیم دی ہے، یہاں تک کہ انہوں نے تمہیں یہ بھی تعلیم دی ہے، کہ قضائے حاجت کے لیے تم نے کیسے جانا ہے؟ تو سیدنا عبداللہ رضی اللہ عنہ نے فرمایا: اگر تو تم مذاق اُڑا رہے ہو (تو میں تمہیں بتاتا ہوں) انہوں نے ہمیں یہ تعلیم دی ہے کہ ہم نے اپنی شرمگاہ کا رخ قبلہ کی طرف نہیں کرنا ہے، راوی بیان کرتے ہیں: میرا خیال ہے انہوں نے یہ بھی کہا: تھا اور ہم نے اپنے دائیں ہاتھ سے استنجاء نہیں کرنا ہے اور ہم نے مینگنی کے ذریعے استنجاء نہیں کرنا ہے، اور ہم نے ہڈی کے ذریعے استنجاء نہیں کرنا ہے، اور ہم نے تین سے کم پتھروں کے ذریعے استنجاء نہیں کرنا ہے۔
یہ روایت امام بزار نے نقل کی ہے اور اس کے رجال کی توثیق کی گئی ہے۔ [مجمع الزاوئد ومنبع الفوائد/كتاب الطهارة/حدیث: 1005]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جنات کی آنکھوں اور بنی نوع انسان کی شرمگاہوں کے درمیان پردہ یوں ہو سکتا ہے کہ جب انسان کپڑے کو ہٹانے لگے، تو بسم اللہ پڑھ لے“۔
یہ روایت امام طبرانی نے معجم اوسط میں دو اسناد کے ساتھ نقل کی ہے، جن میں سے ایک سند میں ایک راوی سعید بن مسلمہ اموی ہے، جسے امام بخاری رحمہ اللہ اور دیگر حضرات نے ضعیف قرار دیا ہے، جبکہ ابن حبان اور ابن عدی نے اسے ثقہ قرار دیا ہے، اس کے بقیہ رجال کی توثیق کی گئی ہے۔ [مجمع الزاوئد ومنبع الفوائد/كتاب الطهارة/حدیث: 1006]

سیدنا یعلی بن سیابہ رضی اللہ عنہ بیان کرتے ہیں: ایک مرتبہ ایک سفر میں، میں نبی اکرم صلی اللہ علیہ وسلم کے ساتھ تھا، آپ نے قضائے حاجت کرنے کا ارادہ کیا، تو آپ نے دو درختوں کو حکم دیا، تو وہ ایک دوسرے کے ساتھ مل گئے (قضائے حاجت سے فارغ ہونے کے بعد) آپ نے انہیں حکم دیا، تو وہ دونوں اپنی، اپنی جگہ پر واپس چلے گئے، جہاں وہ اگے تھے۔
یہ روایت امام أحمد اور دیگر حضرات نے نقل کی ہے، اس کے مختلف طرق، نبوت کی علامات سے متعلق باب میں آئیں گے، اس روایت کے رجال کی توثیق کی گئی ہے، البتہ اس کے بعض رجال کے بارے میں اختلاف پایا جاتا ہے۔ [مجمع الزاوئد ومنبع الفوائد/كتاب الطهارة/حدیث: 1007]

سیدنا سہل بن حنیف رضی اللہ عنہ بیان کرتے ہیں: نبی اکرم صلی اللہ علیہ وسلم نے فرمایا: تم اہل مکہ کی طرف پیغام رساں ہو! تم یہ بتا دینا: بے شک اللہ کے رسول نے تم لوگوں کو سلام کہا: ہے، اور تمہیں تین باتوں کا حکم دیا ہے، تم لوگ غیر اللہ کے نام پر حلف نہ اٹھانا، جب تم قضائے حاجت کرو، تو قبلہ کی طرف رخ نہ کرنا اور پیٹھ نہ کرنا، اور تم ہڈی کے ذریعے، یا مینگنی کے ذریعے استنجاء نہ کرنا
یہ روایت امام أحمد نے نقل کی ہے، اس کی سند میں ایک راوی عبدالکریم بن ابوالمخارق ہے اور وہ ضعیف ہے۔ [مجمع الزاوئد ومنبع الفوائد/كتاب الطهارة/حدیث: 1008]

انصار سے تعلق رکھنے والے ایک صاحب، اپنے والد کے حوالے سے یہ بات نقل کرتے ہیں: نبی اکرم صلی اللہ علیہ وسلم نے اس بات سے منع کیا ہے کہ ہم پیشاب، یا پاخانہ کرتے ہوئے، دونوں قبلوں (میں سے کسی) کی طرف رخ کریں۔
یہ روایت امام أحمد نے نقل کی ہے، اس کی سند میں ایک راوی ایسا ہے، جس کا نام بیان نہیں کیا گیا ہے۔ [مجمع الزاوئد ومنبع الفوائد/كتاب الطهارة/حدیث: 1009]

نافع بیان کرتے ہیں: عبداللہ بن عمرو عجلانی نے سیدنا عبداللہ بن عمر رضی اللہ عنہما کو اپنے (یا شاید ان کے) والد کے حوالے سے یہ بات بیان کی: کہ نبی اکرم صلی اللہ علیہ وسلم نے اس بات سے منع کیا ہے کہ پیشاب، یا پاخانہ کرتے ہوئے، دونوں کے قبلوں میں سے کسی کی طرف رخ کیا جائے۔
یہ روایت امام طبرانی نے معجم کبیر میں نقل کی ہے، اس کی سند میں ایک راوی عبداللہ بن نافع ہے اور وہ ضعیف ہے۔ [مجمع الزاوئد ومنبع الفوائد/كتاب الطهارة/حدیث: 1010]

سیدنا سہل بن سعد رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جب کوئی شخص قضائے حاجت کے لیے جائے، تو وہ قبلہ کی طرف رخ یا پیٹھ نہ کرے“۔
یہ روایت امام طبرانی نے معجم کبیر میں نقل کی ہے، اس کی سند میں ایک راوی محمد بن عمر واقدی ہے اور وہ ضعیف ہے۔ [مجمع الزاوئد ومنبع الفوائد/كتاب الطهارة/حدیث: 1011]

سیدنا عبداللہ بن حارث بن جزء زبیدی رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو قبلہ کی طرف رخ کر کے پیشاب کرتے ہوئے دیکھا ہے، اور میں نے لوگوں کو اس بارے میں سب سے پہلے بیان کیا۔ علامہ ہیثمی فرماتے ہیں:) میں یہ کہتا ہوں: امام ابن ماجہ نے ان صحابی کے حوالے سے روایت نقل کی ہے: کہ یہ صحابی وہ پہلے شخص ہیں، جنہوں نے نبی اکرم صلی اللہ علیہ وسلم کو اس چیز سے منع کرتے ہوئے سنا، تو یہ چیز اس کے منسوخ ہونے پر دلالت کرتی ہے۔
یہ روایت امام أحمد نے نقل کی ہے اس کی سند میں ایک راوی ابن لہیعہ ہے اور وہ ضعیف ہے۔ [مجمع الزاوئد ومنبع الفوائد/كتاب الطهارة/حدیث: 1012]