(نبی کریم صلی اللہ علیہ وسلم نے فرمایا:)
”میں قبیلہ بنو سلیم کی عواتک (یعنی عاتکہ نامی خواتین) کا بیٹا ہوں۔“ [صحيح الجامع الصغير وزيادته/[حرف الألف] -- أنا/حدیث: 1446]

(نبی کریم صلی اللہ علیہ وسلم نے فرمایا:)
”میں ابوالقاسم ہوں، دینے والا تو (اصل میں) اللہ ہی ہے جبکہ میں تو محض تقسیم کرنے والا ہوں۔“ [صحيح الجامع الصغير وزيادته/[حرف الألف] -- أنا/حدیث: 1447]

(نبی کریم صلی اللہ علیہ وسلم نے فرمایا:)
”میں تم سب سے زیادہ اللہ سے ڈرنے والا اور تم سب سے بڑھ کر اللہ کی حدود کو جاننے والا ہوں۔“ [صحيح الجامع الصغير وزيادته/[حرف الألف] -- أنا/حدیث: 1448]

(نبی کریم صلی اللہ علیہ وسلم نے فرمایا:)
”برتن کے بدلے برتن ہے اور کھانے کے بدلے کھانا ہے۔“ [صحيح الجامع الصغير وزيادته/[حرف الألف] -- أنا/حدیث: 1449]

(نبی کریم صلی اللہ علیہ وسلم نے فرمایا:)
”قیامت کے دن تمام انبیاء کرام میں سب سے زیادہ پیروکار میرے ہوں گے اور سب سے پہلے میں ہی جنت کا دروازہ کھٹکھٹاؤں گا۔“ [صحيح الجامع الصغير وزيادته/[حرف الألف] -- أنا/حدیث: 1450]

(نبی کریم صلی اللہ علیہ وسلم نے فرمایا:)
”میں نبی ہوں، اس میں کوئی جھوٹ نہیں، میں عبدالمطلب کا بیٹا ہوں۔“ [صحيح الجامع الصغير وزيادته/[حرف الألف] -- أنا/حدیث: 1451]

(نبی کریم صلی اللہ علیہ وسلم نے فرمایا:)
”میں دنیا اور آخرت میں عیسیٰ بن مریم (علیہما السلام) کے سب لوگوں سے زیادہ قریب ہوں، میرے اور ان کے درمیان کوئی اور نبی نہیں گزرا۔ تمام انبیاء کرام علاتی بھائی (یعنی ایک باپ اور مختلف ماؤں کی اولاد) ہیں، ان کی مائیں (شریعتیں) مختلف ہیں جبکہ ان سب کا دین (توحید) ایک ہی ہے۔“ [صحيح الجامع الصغير وزيادته/[حرف الألف] -- أنا/حدیث: 1452]

(نبی کریم صلی اللہ علیہ وسلم نے فرمایا:)
”کتاب اللہ کی رو سے میں مومنوں کے ان کی اپنی جانوں سے بھی زیادہ قریب ہوں، پس تم میں سے جو کوئی مرتے وقت قرض یا کمزور و بے سہارا اہل و عیال چھوڑ جائے تو مجھے بلاؤ، کیونکہ میں اس کا سرپرست ہوں۔ اور جو شخص کوئی مال چھوڑ کر مرے تو اس کا مال اس کے ورثاء کو دیا جائے، چاہے وہ کوئی بھی ہوں۔“ [صحيح الجامع الصغير وزيادته/[حرف الألف] -- أنا/حدیث: 1453]

(نبی کریم صلی اللہ علیہ وسلم نے فرمایا:)
”میں مومنوں کے ان کی اپنی جانوں سے بھی زیادہ قریب ہوں، پس مومنوں میں سے جو کوئی وفات پا جائے اور اپنے ذمے کوئی قرض چھوڑے تو اس کی ادائیگی میرے ذمے ہے، اور جو کوئی مال چھوڑ جائے تو وہ اس کے ورثاء کا حق ہے۔“ [صحيح الجامع الصغير وزيادته/[حرف الألف] -- أنا/حدیث: 1454]

(نبی کریم صلی اللہ علیہ وسلم نے فرمایا:)
”میں ہر مومن کے اس کی اپنی جان سے بھی زیادہ قریب ہوں، پس جو کوئی قرض یا کمزور اہل و عیال چھوڑے تو ان کی ذمہ داری مجھ پر ہے، اور جو کوئی مال چھوڑے تو وہ اس کے ورثاء کا حق ہے۔ اور جس کا کوئی وارث (سرپرست) نہ ہو اس کا وارث میں ہوں، میں ہی اس کے مال کا وارث ہوں گا اور اس کے قیدی کا فدیہ ادا کروں گا۔ اور ماموں اس شخص کا وارث ہے جس کا کوئی وارث نہ ہو، وہ اس کے مال کا وارث ہوتا ہے اور اس کی طرف سے دیت (خون بہا) ادا کرتا ہے۔“ [صحيح الجامع الصغير وزيادته/[حرف الألف] -- أنا/حدیث: 1455]