(نبی کریم صلی اللہ علیہ وسلم نے فرمایا:)
”یتیم کی کفالت کرنے والا، خواہ وہ اس کا اپنا ہو یا کسی اور کا، میں اور وہ جنت میں ایسے (ساتھ) ہوں گے جیسے یہ دونوں (انگلیاں)۔“ [صحيح الجامع الصغير وزيادته/حرف الكاف/حدیث: 4448]

(نبی کریم صلی اللہ علیہ وسلم نے فرمایا:)
”حجرِ اسود برف سے بھی زیادہ سفید تھا، یہاں تک کہ اسے بنی آدم کے گناہوں نے سیاہ کر دیا۔“ [صحيح الجامع الصغير وزيادته/حرف الكاف/حدیث: 4449]

(نبی کریم صلی اللہ علیہ وسلم نے فرمایا:)
”تم سے پہلے (لوگوں میں سے) ایک آدمی کو پکڑا جاتا، اس کے لیے زمین میں گڑھا کھودا جاتا اور اسے اس میں کھڑا کر دیا جاتا، پھر آرا لایا جاتا اور اس کے سر پر رکھ کر اسے دو ٹکڑے کر دیا جاتا، مگر یہ اسے اس کے دین سے نہ روک پاتا۔ اور لوہے کی کنگھیوں سے اس کے گوشت کو ہڈی اور پٹھوں سے الگ کر دیا جاتا، مگر یہ بھی اسے اس کے دین سے نہ روک پاتا۔ اللہ کی قسم! اللہ اس دین کو ضرور مکمل کرے گا، یہاں تک کہ ایک سوار صنعاء سے حضرموت تک سفر کرے گا اور اسے اللہ کے سوا کسی کا خوف نہ ہو گا، سوائے اپنی بکریوں پر بھیڑیے کے (خوف کے)، لیکن تم جلدی کرتے ہو۔“ [صحيح الجامع الصغير وزيادته/حرف الكاف/حدیث: 4450]

(نبی کریم صلی اللہ علیہ وسلم نے فرمایا:)
”سب سے پہلے مہمان نوازی کرنے والے ابراہیم علیہ السلام تھے۔“ [صحيح الجامع الصغير وزيادته/حرف الكاف/حدیث: 4451]

(نبی کریم صلی اللہ علیہ وسلم نے فرمایا:)
”اہلِ جاہلیت کہا کرتے تھے: بدشگونی صرف عورت، جانور اور گھر میں ہوتی ہے۔“ [صحيح الجامع الصغير وزيادته/حرف الكاف/حدیث: 4452]

(نبی کریم صلی اللہ علیہ وسلم نے فرمایا:)
”داؤد علیہ السلام سب انسانوں سے بڑھ کر عبادت گزار تھے۔“ [صحيح الجامع الصغير وزيادته/حرف الكاف/حدیث: 4453]

(نبی کریم صلی اللہ علیہ وسلم نے فرمایا:)
”ایک آدمی لوگوں کو قرض دیا کرتا تھا، وہ اپنے خادم سے کہا کرتا تھا: جب تم کسی تنگ دست کے پاس جاؤ تو اسے معاف کر دینا، شاید اللہ بھی ہمیں معاف کر دے۔ چنانچہ وہ اللہ سے جا ملا تو اللہ نے اسے معاف کر دیا۔“ [صحيح الجامع الصغير وزيادته/حرف الكاف/حدیث: 4454]

(نبی کریم صلی اللہ علیہ وسلم نے فرمایا:)
”بنی اسرائیل میں دو آدمی آپس میں بھائی بھائی بنے ہوئے تھے، ان میں سے ایک گناہ گار تھا اور دوسرا عبادت میں محنت کرنے والا تھا۔ عبادت گزار ہمیشہ دوسرے کو گناہ پر دیکھ کر کہتا: باز آ جاؤ۔ ایک دن اس نے اسے پھر گناہ پر پایا تو کہا: باز آ جاؤ۔ اس نے کہا: مجھے اور میرے رب کو چھوڑ دو، کیا تمہیں مجھ پر نگران بنا کر بھیجا گیا ہے؟! تو اس (عبادت گزار) نے کہا: اللہ کی قسم! اللہ تجھے کبھی نہیں بخشے گا یا تجھے کبھی جنت میں داخل نہیں کرے گا۔ چنانچہ ان دونوں کی روحیں قبض کر لی گئیں اور وہ دونوں رب العالمین کے حضور اکٹھے ہوئے۔ اللہ تعالیٰ نے اس عبادت گزار سے فرمایا: کیا تجھے میرا علم تھا یا تو اس پر قادر تھا جو میرے ہاتھ میں ہے؟! اور گناہ گار سے فرمایا: جا، میری رحمت کے سبب جنت میں داخل ہو جا۔ اور دوسرے کے بارے میں فرمایا: اسے جہنم کی طرف لے جاؤ۔“ [صحيح الجامع الصغير وزيادته/حرف الكاف/حدیث: 4455]

(نبی کریم صلی اللہ علیہ وسلم نے فرمایا:)
”زکریا علیہ السلام بڑھئی تھے۔“ [صحيح الجامع الصغير وزيادته/حرف الكاف/حدیث: 4456]

(نبی کریم صلی اللہ علیہ وسلم نے فرمایا:)
”عاشوراء کا دن اہلِ جاہلیت کا روزہ رکھنے کا دن تھا، پس تم میں سے جو اسے رکھنا چاہے وہ رکھ لے اور جو چھوڑنا چاہے وہ چھوڑ دے۔“ [صحيح الجامع الصغير وزيادته/حرف الكاف/حدیث: 4457]