اللہ تعالیٰ کے اس ارشاد کا بیان کہ: ”اللہ ہی کے لیے ہے جو کچھ آسمانوں میں ہے اور جو کچھ زمین میں ہے، اور جو کچھ تمہارے دلوں میں ہے خواہ تم اسے ظاہر کرو یا اسے چھپاؤ، اللہ تم سے اس کا حساب لے گا، پھر وہ جسے چاہے گا بخش دے گا اور جسے چاہے گا عذاب دے گا، اور اللہ ہر چیز پر مکمل قدرت رکھنے والا ہے۔ (284) رسول اس پر ایمان لائے جو ان کے رب کی طرف سے ان پر نازل کیا گیا اور مومن بھی ایمان لائے، یہ سب اللہ، اس کے فرشتوں، اس کی کتابوں اور اس کے رسولوں پر ایمان لائے، (ان کا قول یہ ہے کہ) ”ہم اس کے رسولوں میں سے کسی کے درمیان تفریق نہیں کرتے“ اور انہوں نے عرض کیا کہ ”ہم نے سنا اور ہم نے اطاعت کی، اے ہمارے رب! ہم تیری بخشش کے طلبگار ہیں اور تیری ہی طرف لوٹ کر جانا ہے“۔ (285) اللہ کسی جان پر اس کی وسعت سے بڑھ کر بوجھ نہیں ڈالتا، اس کے لیے اس کی کمائی ہوئی نیکی کا فائدہ ہے اور اس پر اس کے کیے ہوئے گناہ کا وبال ہے، ”اے ہمارے رب! اگر ہم بھول جائیں یا ہم سے خطا ہو جائے تو ہمارا مواخذہ نہ فرما، اے ہمارے رب! اور ہم پر ایسا بھاری بوجھ نہ ڈال جیسا تو نے ہم سے پہلے لوگوں پر ڈالا تھا، اے ہمارے رب! اور ہم سے وہ بوجھ نہ اٹھوا جس کی ہمیں طاقت نہیں، اور ہمیں معاف فرما دے، ہمیں بخش دے اور ہم پر رحم فرما، تو ہی ہمارا مولیٰ و کارساز ہے، پس ہمیں کافر قوم کے مقابلے میں نصرت عطا فرما“۔ (286)“