عبید اللہ بن عبد اللہ بن عتبہ رحمہ اللہ بیان کرتے ہیں کہ ان کے والد (عبد اللہ بن عتبہ رحمہ اللہ) نے انہیں خط لکھا کہ وہ سیدہ سبیعہ اسلمیہ رضی اللہ عنہا سے ملاقات کریں اور ان سے دریافت کریں کہ رسول اللہ صلی اللہ علیہ وسلم نے ان کے حق میں کیا فیصلہ فرمایا تھا؟
عبید اللہ رحمہ اللہ بیان کرتے ہیں کہ مجھے مالک بن اوس بن حدثان رحمہ اللہ نے خبر دی کہ سیدہ سبیعہ اسلمیہ رضی اللہ عنہا نے انہیں بتایا کہ ان کے شوہر سیدنا سعد بن خولہ رضی اللہ عنہ رسول اللہ صلی اللہ علیہ وسلم کے ہمراہ حجۃ الوداع کے موقع پر مکہ مکرمہ میں فوت ہو گئے تھے، جبکہ وہ حاملہ تھیں، پھر ان کی وفات کے کچھ ہی عرصہ بعد ان کے ہاں ولادت ہو گئی۔ بنو عبد الدار کے ابو السنابل بن بعکک بن سباق رضی اللہ عنہ نے انہیں نکاح کا پیغام دیا تو انہوں نے ان سے نکاح کرنے سے انکار کر دیا، اس پر انہوں نے کہا: ”یاد رکھو! تم اس وقت تک نکاح کے لیے حلال نہیں ہو سکتی جب تک دو عدتوں میں سے طویل تر مدت پوری نہ کر لو۔“ چنانچہ انہوں نے رسول اللہ صلی اللہ علیہ وسلم سے اس بارے میں فتویٰ پوچھا تو آپ صلی اللہ علیہ وسلم نے انہیں نکاح کرنے کی اجازت عطا فرما دی۔
امام طبرانی رحمہ اللہ فرماتے ہیں: ”اس حدیث کو عقیل رحمہ اللہ سے صرف ابو الطاہر بن سرح کے ماموں وثیمہ بن موسیٰ بن ربیعہ رحمہ اللہ نے روایت کیا ہے۔“ [المعجم الأوسط/باب الألف/حدیث: 1918]