سیدنا عبداللہ بن عمیر سدوسی رضی اللہ عنہ سے روایت ہے کہ وہ نبی صلی اللہ علیہ وسلم کے پاس سے پانی کا ایک برتن لے کر آئے، جس میں نبی صلی اللہ علیہ وسلم نے اپنا چہرہ مبارک دھویا تھا، اس میں کلی کی تھی اور پانی میں (کلی کا) لعاب ڈالا تھا، اور اپنے ہاتھ اور کلائیاں دھوئی تھیں، پھر آپ صلی اللہ علیہ وسلم نے اس برتن کو بھر دیا
اور فرمایا: ”تم کسی بھی پانی (کے گھاٹ) پر نہ پہنچنا مگر یہ کہ اس میں موجود بقیہ پانی پر مزید پانی بھر کر اسے لبالب کر لینا، پھر جب تم اپنے علاقے پہنچو تو اس مقام پر یہ پانی چھڑک دینا اور اسے مسجد بنا لینا۔“
راوی بیان کرتے ہیں کہ پس انہوں نے اسے مسجد بنا لیا۔ عمرو رحمہ اللہ کہتے ہیں: ”اور میں نے خود اس (مسجد) میں نماز پڑھی ہے۔“
امام طبرانی رحمہ اللہ فرماتے ہیں: ”یہ حدیث سیدنا عبداللہ بن عمیر سدوسی رضی اللہ عنہ سے صرف اسی سند کے ساتھ مروی ہے، اور عبداللہ بن مثنی رحمہ اللہ اسے روایت کرنے میں منفرد ہیں۔“ [المعجم الأوسط/باب الألف/حدیث: 1957]