سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم مردوں اور عورتوں کے درمیان کھڑے ہوئے، پھر آپ صلی اللہ علیہ وسلم نے مردوں کو صدقے کی ترغیب دی، پھر عورتوں کی طرف متوجہ ہوئے اور انہیں بھی صدقے پر ابھارا۔ تو سیدنا عبداللہ رضی اللہ عنہ کی اہلیہ سیدہ زینب رضی اللہ عنہا نے سیدنا بلال رضی اللہ عنہ کو آپ صلی اللہ علیہ وسلم کے پاس بھیجا اور کہا: ”رسول اللہ صلی اللہ علیہ وسلم کو مہاجرین کی ایک عورت کی طرف سے سلام عرض کرنا، لیکن ان کے سامنے میرا نام ظاہر نہ کرنا، اور ان سے پوچھنا کہ ایک عورت کا شوہر مہاجرین میں سے ہے اور اس کے پاس کچھ نہیں، اور اس کی پرورش میں کچھ یتیم بچے ہیں جو اس کے بھائی کے بیٹے ہیں، اگر وہ اپنا صدقہ ان پر خرچ کر دے تو کیا اسے اجر ملے گا؟“ چنانچہ سیدنا بلال رضی اللہ عنہ نبی کریم صلی اللہ علیہ وسلم کے پاس آئے (اور سوال پہنچایا) تو آپ صلی اللہ علیہ وسلم نے فرمایا: ”ہاں، اسے دو اجر ملیں گے: ایک قرابت داری کا اجر اور دوسرا صدقے کا اجر۔“
امام طبرانی رحمہ اللہ فرماتے ہیں: ”اس حدیث کو عامر بن شقیق رحمہ اللہ سے مسعودی کے سوا کسی نے روایت نہیں کیا، اور اس میں حجاج بن نصیر منفرد ہیں۔“ [المعجم الأوسط/باب الألف/حدیث: 2184]