سیدنا جابر رضی اللہ عنہما سے روایت ہے کہ ایک دیہاتی رسول اللہ صلی اللہ علیہ وسلم کی خدمت میں حاضر ہوا اور اس نے عرض کیا: ”اے اللہ کے رسول! کیا جنت میں ہمارے کپڑے ہوں گے جنہیں ہم اپنے ہاتھوں سے بُنیں گے؟“ راوی کہتے ہیں کہ اس پر لوگ ہنس پڑے، تو رسول اللہ صلی اللہ علیہ وسلم نے فرمایا: ”تم کس بات پر ہنستے ہو؟ کیا اس بات پر کہ ایک ناواقف شخص ایک جاننے والے سے سوال کر رہا ہے؟ نہیں اے دیہاتی! بلکہ جنت کے پھل پھٹیں گے تو ان سے (لباس) نکلیں گے۔“
امام طبرانی رحمہ اللہ فرماتے ہیں: ”اس حدیث کو شعبی رحمہ اللہ سے مجالد کے سوا کسی نے روایت نہیں کیا، اور مجالد سے ان کے بیٹے کے سوا کسی نے روایت نہیں کیا، اور سیدنا جابر رضی اللہ عنہما سے یہ حدیث صرف اسی سند سے مروی ہے۔“ [المعجم الأوسط/باب الألف/حدیث: 2213]