سیدنا ابو ہریرہ رضی اللہ عنہ بیان کرتے ہیں: میں رسول اللہ صلی اللہ علیہ وسلم کے پاس بیٹھا ہوا تھا کہ ایک آدمی آپ صلی اللہ علیہ وسلم کے پاس آیا اور کہنے لگا: ”اے اللہ کے رسول! میں ہلاک ہو گیا۔“ آپ صلی اللہ علیہ وسلم نے فرمایا: ”تجھ پر افسوس! تجھے کیا ہوا؟“ اس نے کہا: ”میں نے رمضان میں روزے کی حالت میں اپنی بیوی سے جماع کر لیا۔“ آپ صلی اللہ علیہ وسلم نے فرمایا: ”کیا تجھے کوئی غلام ملتا ہے جسے تو آزاد کر سکے؟“ اس نے کہا: ”نہیں، اللہ کی قسم! اے اللہ کے رسول!“ آپ صلی اللہ علیہ وسلم نے فرمایا: ”کیا تو لگاتار دو ماہ کے روزے رکھنے کی طاقت رکھتا ہے؟“ اس نے کہا: ”نہیں، اللہ کی قسم! اے اللہ کے رسول!“ آپ صلی اللہ علیہ وسلم نے فرمایا: ”کیا تجھے ساٹھ مسکینوں کو کھانا کھلانے کی استطاعت ہے؟“ اس نے کہا: ”نہیں، اے اللہ کے رسول!“ تو آپ صلی اللہ علیہ وسلم نے اس سے رخ پھیر لیا۔ ابھی یہی صورتِ حال تھی کہ کھجوروں کا ایک بڑا ٹوکرا لایا گیا، تو آپ صلی اللہ علیہ وسلم نے فرمایا: ”وہ شخص کہاں ہے جو (مسئلہ پوچھنے) آیا تھا؟“ اسے بلایا گیا تو آپ صلی اللہ علیہ وسلم نے فرمایا: ”یہ لے لو اور اسے صدقہ کر دو۔“ اس نے عرض کیا: ”کیا اپنے گھر والوں سے بڑھ کر کسی محتاج پر؟ اے اللہ کے رسول! اللہ کی قسم! مدینہ کے دونوں پتھریلے میدانوں کے درمیان ہم سے زیادہ محتاج کوئی گھرانہ نہیں۔“ اس پر آپ صلی اللہ علیہ وسلم ہنس پڑے یہاں تک کہ آپ صلی اللہ علیہ وسلم کے دانت مبارک ظاہر ہو گئے، پھر فرمایا: ”اچھا، اسے لے جاؤ اور اپنے گھر والوں کو کھلا دو۔“
(امام طبرانی رحمہ اللہ کے بقول) ”یہ احادیث عبید اللہ بن عمر سے صرف اسی سند کے ساتھ مروی ہیں، عبید اللہ بن سعید بن عفیر اس میں منفرد ہیں۔“ [المعجم الأوسط/باب الألف/حدیث: 2246]