سیدنا ابوامامہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”محبت اللہ کی جانب سے (عطا) ہوتی ہے اور شہرت آسمانوں میں ہوتی ہے، پھر جب اللہ تعالیٰ کسی بندے سے محبت فرماتا ہے تو ارشاد فرماتا ہے: ”اے جبرائیل! بے شک تمہارا رب فلاں سے محبت کرتا ہے، سو تم بھی اس سے محبت کرو۔“ آپ صلی اللہ علیہ وسلم نے فرمایا: ”پھر جبرائیل (آسمان والوں میں) منادی کرتے ہیں، اور اللہ تعالیٰ زمین والوں میں اس کے لیے محبت اتار دیتا ہے۔“
یہ حدیث سیدنا ابوامامہ رضی اللہ عنہ سے صرف اسی سند کے ساتھ مروی ہے، اور اسے بیان کرنے میں شریک رحمہ اللہ منفرد ہیں۔ [المعجم الأوسط/باب الميم/حدیث: 6582]