سیدنا اسامہ بن زید رضی اللہ عنہ بیان کرتے ہیں کہ سیدنا علی رضی اللہ عنہ نے مجھ سے فرمایا: ”اے اسامہ! تمہیں کیا ہوا کہ تم ہمارے ساتھ نہیں نکلتے؟ حالانکہ تم تو اہل بیت ہی کے ایک فرد ہو۔“ میں نے عرض کیا: ”آپ نے سچ فرمایا، آپ سے بڑھ کر کوئی اس بات کا حق دار نہیں کہ میں اس کے ہمراہ نکلوں، لیکن اللہ کی قسم! میں رسول اللہ صلی اللہ علیہ وسلم کے اس ارشاد: «أَلَا تَرَكْتَهُ، أَوْ شَقَقْتَ عَنْ قَلْبِهِ فَنَظَرْتَ إِلَيْهِ» ”کیا تم نے اسے چھوڑ نہ دیا، یا کیا تم نے اس کا دل چیر کر دیکھا تھا؟“ کے بعد نماز پڑھنے والوں سے قتال نہیں کروں گا۔“
اس حدیث کو عبدالملک بن عمیر رحمہ اللہ سے صرف سعید بن زید رحمہ اللہ نے، اور سعید رحمہ اللہ سے صرف عطا بن مسلم رحمہ اللہ نے روایت کیا ہے، جبکہ عبید بن جناد رحمہ اللہ اس کی روایت میں منفرد ہیں۔ [المعجم الأوسط/باب الميم/حدیث: 6642]