ام المومنین سیدہ امِ حبیبہ رضی اللہ عنہا سے روایت ہے کہ انہوں نے فرمایا: ”رسول اللہ صلی اللہ علیہ وسلم میرے پاس تشریف لائے جبکہ آپ صلی اللہ علیہ وسلم فرما رہے تھے: «إِنَّا لِلهِ وَإِنَّا إِلَيْهِ رَاجِعُونَ» ”بے شک ہم اللہ ہی کے لیے ہیں اور ہم اسی کی طرف لوٹ کر جانے والے ہیں، عربوں کے لیے اس شر سے ہلاکت ہے جو قریب آ چکا ہے، یاجوج و ماجوج کی دیوار میں سے آج اتنا حصہ کھل گیا ہے“، اور آپ صلی اللہ علیہ وسلم نے (انگلیوں کے اشارے سے) نوے کا حلقہ بنایا۔ میں نے عرض کی: ”اے اللہ کے رسول! کیا ہم ہلاک کر دیے جائیں گے حالانکہ ہم میں صالح اور نیک لوگ موجود ہوں گے؟“ آپ صلی اللہ علیہ وسلم نے فرمایا: ”ہاں، جب خباثت (گناہ و معاصی) کی کثرت ہو جائے گی۔“
ابراہیم بن عبد الرحمن بن عوف رحمہ اللہ نے ابو سلمہ رحمہ اللہ سے اس کے علاوہ کوئی حدیث روایت نہیں کی، اور اس روایت کے ساتھ یحییٰ بن اسحاق رحمہ اللہ منفرد ہیں۔ [المعجم الأوسط/باب الميم/حدیث: 7319]