سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے سیدنا معاذ بن جبل اور سیدنا ابوموسیٰ رضی اللہ عنہما کو یمن کی طرف روانہ فرمایا، تو آپ صلی اللہ علیہ وسلم نے انہیں ہدایت فرمائی: ”تم دونوں ایک دوسرے کی معاونت کرنا، باہمی اتفاق و ہم آہنگی قائم رکھنا، (لوگوں کے لیے) آسانی پیدا کرنا اور (ان میں) نفرت و بیزاری نہ پھیلانا۔“ پھر (وہاں پہنچ کر) سیدنا معاذ رضی اللہ عنہ نے لوگوں کو خطبہ دیا، انہیں اسلام کی ترغیب دی، انہیں دین میں تفقہ حاصل کرنے اور قرآن پڑھنے کا حکم دیا، اور فرمایا: ”میں تمہیں اہل جنت اور اہل نار کی پہچان بتاتا ہوں؛ جس شخص کا تذکرہ خیر (اچھے الفاظ) کے ساتھ کیا جائے وہ اہل جنت میں سے ہے، اور جس کا ذکر شر (برے الفاظ) کے ساتھ ہو وہ اہل نار میں سے ہے۔“
امام طبرانی رحمہ اللہ فرماتے ہیں: ”اس حدیث کو زیاد بن مخراق رحمہ اللہ سے صرف عمر بن ابی خلیفہ رحمہ اللہ نے ہی روایت کیا ہے۔“ [المعجم الأوسط/باب الميم/حدیث: 7416]