سیدنا انس بن مالک رضی اللہ عنہ سے روایت ہے کہ انہوں نے فرمایا: ”جب احد کا دن ہوا تو اہل مدینہ سخت پریشانی کے عالم میں بدحواس ہو گئے اور کہنے لگے: ”محمد صلی اللہ علیہ وسلم شہید کر دیے گئے ہیں“، یہاں تک کہ مدینہ کے اطراف میں بین کرنے والیوں کی آوازیں کثرت سے بلند ہونے لگیں۔ پس انصار کی ایک خاتون کمر بستہ ہو کر نکلیں، ان کا سامنا اپنے بیٹے، والد، شوہر اور بھائی (کی میتوں) سے ہوا، مجھے معلوم نہیں کہ سب سے پہلے ان کا سامنا کس سے ہوا۔ جب وہ ان میں سے آخری کے پاس سے گزریں تو پوچھا: ”یہ کون ہے؟“ لوگوں نے کہا: ”یہ تمہارے والد، بھائی، شوہر اور بیٹے ہیں“۔ وہ (مستقل یہی) کہتی رہیں: ”رسول اللہ صلی اللہ علیہ وسلم کا کیا ہوا؟“ لوگ کہتے رہے: ”وہ آپ کے سامنے ہیں“، یہاں تک کہ وہ رسول اللہ صلی اللہ علیہ وسلم تک پہنچ گئیں۔ انہوں نے آپ صلی اللہ علیہ وسلم کے لباس کا ایک گوشہ پکڑ لیا اور عرض کی: «بِأَبِي أَنْتَ وَأُمِّي يَا رَسُولَ اللهِ، لَا أُبَالِي إِذْ سَلِمْتَ مَنْ عَطِبَ» ”اے اللہ کے رسول! میرے ماں باپ آپ پر قربان ہوں، جب آپ سلامت ہیں تو مجھے کسی کی ہلاکت کی کوئی پروا نہیں“۔“
اس حدیث کو ثابت رحمہ اللہ سے صرف مفضل بن فضالہ رحمہ اللہ نے روایت کیا ہے، اور اس کی روایت میں ابو زہیر رحمہ اللہ منفرد ہیں۔ [المعجم الأوسط/باب الميم/حدیث: 7499]