سیدنا ابو موسیٰ اشعری رضی اللہ عنہ سے روایت ہے کہ انہوں نے فرمایا: ایک مرتبہ ایک شخص آیا اور اس نے (اندر آنے کی) اجازت طلب کی، تو رسول اللہ صلی اللہ علیہ وسلم نے فرمایا: ”اسے اجازت دے دو اور اسے جنت کی خوشخبری سنا دو۔“ دیکھا تو وہ سیدنا ابوبکر رضی اللہ عنہ تھے۔ پھر ایک اور شخص آیا تو آپ صلی اللہ علیہ وسلم نے فرمایا: ”اسے اجازت دے دو اور اسے جنت کی خوشخبری سنا دو۔“ دیکھا تو وہ سیدنا عمر رضی اللہ عنہ تھے۔ پھر ایک اور شخص آیا اور اس نے اجازت طلب کی تو رسول اللہ صلی اللہ علیہ وسلم نے فرمایا: ”اسے اجازت دے دو اور ایک آزمائش پر اسے جنت کی خوشخبری سنا دو“ — یا جیسا کہ آپ صلی اللہ علیہ وسلم نے فرمایا — تو سیدنا عثمان رضی اللہ عنہ نے کہا: «أَسْأَلُ اللهَ صَبْرًا» ”میں اللہ تعالیٰ سے صبر کا سوال کرتا ہوں۔“
اس حدیث کو قتادہ رحمہ اللہ سے، انہوں نے ابوالحجاج رحمہ اللہ کے واسطے سے، صرف سلیمان تیمی رحمہ اللہ نے روایت کیا ہے۔
جبکہ معمر رحمہ اللہ نے اسے قتادہ رحمہ اللہ سے، انہوں نے ابوعثمان نہدی رحمہ اللہ کے واسطے سے روایت کیا ہے۔ [المعجم الأوسط/باب الميم/حدیث: 7506]