سیدنا علی رضی اللہ عنہ بیان کرتے ہیں: ”ہم مسجد میں نبی کریم صلی اللہ علیہ وسلم کے ساتھ نماز کے انتظار میں بیٹھے تھے کہ ایک آدمی کھڑا ہوا اور کہنے لگا: میں نے ایک گناہ کر لیا ہے۔“ نبی کریم صلی اللہ علیہ وسلم نے اس سے اعراض فرمایا۔ جب آپ صلی اللہ علیہ وسلم نماز سے فارغ ہوئے تو وہ آدمی پھر کھڑا ہوا اور وہی بات دہرائی۔ تب نبی کریم صلی اللہ علیہ وسلم نے فرمایا: ”کیا تم نے ہمارے ساتھ یہ نماز نہیں پڑھی اور اس کے لیے اچھی طرح وضو نہیں کیا؟“ اس نے عرض کیا: ”جی ہاں۔“ آپ صلی اللہ علیہ وسلم نے فرمایا: ”تو یہ نماز تمہارے گناہ کا کفارہ ہے۔“
امام طبرانی رحمہ اللہ فرماتے ہیں: ”اس حدیث کو ابو اسحاق سے اسرائیل کے سوا کسی نے روایت نہیں کیا، اور اسرائیل سے عبدالرحمن بن یحییٰ مدنی کے سوا کسی نے روایت نہیں کیا، اس میں علی بن حرب منفرد ہیں، اور سیدنا علی رضی اللہ عنہ سے یہ حدیث صرف اسی سند سے مروی ہے۔“ [المعجم الأوسط/باب الميم/حدیث: 7560]