امام سعید بن مسیب رحمہ اللہ بیان کرتے ہیں کہ سیدنا عثمان بن عفان رضی اللہ عنہ کے حج کے سال ان کے پاس ثرید کا ایک پیالہ لایا گیا جس پر چکور کا گوشت تھا، جسے حلال (غیر محرم) لوگوں نے شکار کیا تھا۔ لوگوں میں سے بعض نے کہا: ”سیدنا علی رضی اللہ عنہ اسے ناپسند کرتے ہیں۔“ چنانچہ سیدنا عثمان رضی اللہ عنہ نے سیدنا علی رضی اللہ عنہ کو بلوا بھیجا۔ وہ اپنے اونٹوں کے لیے خبط (درخت کے جھاڑے ہوئے پتے) تیار کر رہے تھے، انہوں نے اپنا ہاتھ جھاڑا اور تشریف لائے۔ سیدنا عثمان رضی اللہ عنہ نے ان سے کہا: ”تم کسی نہ کسی بات میں مخالفت کرتے ہی رہتے ہو؛ لوگوں کا خیال ہے کہ تم کہتے ہو کہ یہ درست نہیں۔“ اس پر سیدنا علی رضی اللہ عنہ ناراض ہو گئے اور فرمایا: ”کیا اسی بات پر آپ مجھ سے کہتے ہیں کہ تم مخالفت کرتے ہو؟ میں اللہ کا واسطہ دے کر پوچھتا ہوں کہ جس نے رسول اللہ صلی اللہ علیہ وسلم کو اس سال فرماتے سنا جب آپ صلی اللہ علیہ وسلم نے حج کیا اور آپ صلی اللہ علیہ وسلم کے پاس جنگلی گدھے کی ٹانگ لائی گئی تو آپ صلی اللہ علیہ وسلم نے فرمایا: ”اسے حلال (غیر محرم) لوگوں کو کھلا دو، کیونکہ ہم احرام کی حالت میں ہیں۔““ چنانچہ ایک سے زیادہ لوگ کھڑے ہوئے اور انہوں نے اس کی گواہی دی۔ پھر فرمایا: ”میں اللہ کا واسطہ دے کر پوچھتا ہوں کہ جس نے رسول اللہ صلی اللہ علیہ وسلم کو اس سال فرماتے سنا جب آپ صلی اللہ علیہ وسلم نے حج کیا اور شترمرغ کے انڈے لائے گئے: ”انہیں حلال (غیر محرم) لوگوں کو کھلا دو، کیونکہ ہم احرام میں ہیں۔““ تو ایک سے زیادہ لوگ کھڑے ہوئے اور انہوں نے اس کی گواہی دی۔ پھر لوگ اس پیالے کے پاس سے منتشر ہو گئے۔
امام سعید بن مسیب رحمہ اللہ نے فرمایا: ”گویا میں اس چکور کی ٹانگ کو دیکھ رہا ہوں جو کھڑی ہوئی تھی اور اسے کوئی نہیں کھا رہا تھا۔“
امام طبرانی رحمہ اللہ فرماتے ہیں: ”اس حدیث کو مبارک بن فضالہ سے سعد بن صلت کے سوا کسی نے روایت نہیں کیا، شاذان اس میں منفرد ہیں۔“ [المعجم الأوسط/باب الميم/حدیث: 7610]