سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «وَالَّذِي نَفْسِي بِيَدِهِ، لَا يَضَعُ اللَّهُ رَحْمَتَهُ إِلَّا عَلَى رَحِيمٍ» ”اس ذات کی قسم جس کے قبضۂ قدرت میں میری جان ہے! اللہ تعالیٰ اپنی رحمت صرف اسی پر نازل فرماتا ہے جو رحم دل ہو“، صحابہ کرام رضی اللہ عنہم نے عرض کی: اے اللہ کے رسول صلی اللہ علیہ وسلم ! ہم میں سے ہر شخص (دوسروں پر) رحم کرتا ہے، تو آپ صلی اللہ علیہ وسلم نے ارشاد فرمایا: «لَيْسَ بِرَحْمَةِ أَحَدِكُمْ صَاحِبَهُ يُرْحَمُ النَّاسُ كَافَّةً» ”اس سے مراد محض اپنے کسی ساتھی یا قریبی فرد پر تمہارا رحم کرنا نہیں ہے، بلکہ اس سے مراد تمام لوگوں کے ساتھ عمومی طور پر رحم و شفقت کا معاملہ کرنا ہے“۔ [مسند أبي يعلى الموصلي/مسند أنس بن مالك/حدیث: 4258]