حضرت بہز بن حکیم کے دادا رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو یہ فرماتے سنا: ”باہر چرنے والے اونٹوں «فِي كُلِّ سَائِمَةِ الْإِبِلِ» کی زکاۃ ہر چالیس اونٹوں میں ایک بنت لبون «بِنْتُ لَبُونٍ» (دو برس کی اونٹنی) ہے۔ اونٹوں کو ان کے حساب و مقدار سے ادھر ادھر نہ کیا جائے۔ جو آدمی ثواب حاصل کرنے کے لیے زکاۃ دے گا، اسے اس کا ثواب ملے گا اور جو نہ دے گا، ہم اس سے زکاۃ تو (بہر صورت) وصول کریں گے اور اس کے نصف اونٹ «وَشَطْرَ مَالِهِ» بھی ضبط کر لیں گے۔ زکاۃ ہمارے رب کے فرائض «عَزْمَةٌ مِنْ عَزَمَاتِ رَبِّنَا» میں سے ایک فریضہ ہے اور محمد صلی اللہ علیہ وسلم کے خاندان کے لیے ذرہ بھر زکاۃ بھی جائز نہیں۔“ [سنن نسائي/كتاب الزكاة/حدیث: 2451]