حضرت محمد بن سیرین رحمہ اللہ فرماتے تھے کہ میرے نزدیک زمین مضاربت کے مال کی طرح ہے، جو کچھ مالِ مضاربت میں درست ہے، وہ زمین میں بھی درست ہے اور جو مالِ مضاربت میں درست نہیں، وہ زمین میں بھی درست نہیں، اور وہ اس بات میں کوئی حرج نہیں سمجھتے تھے کہ زمین مزارع کے سپرد کر دے اور وہ (مزارع) اس میں خود یا اپنی اولاد اور اپنے ساتھیوں اور اپنے بیلوں وغیرہ کے ساتھ کام کرے اور خرچ کچھ نہ کرے بلکہ اخراجات سب کے سب مالکِ زمین کی طرف سے ہوں۔ [سنن نسائي/كتاب المزارعة/حدیث: 3960]

حضرت ابن عمر رضی اللہ عنہما سے روایت ہے کہ نبی اکرم صلی اللہ علیہ وسلم نے خیبر کے یہودیوں کو خیبر کی کھجوریں (درخت) اور زمین اس شرط پر سپرد کر دی تھیں کہ وہ اپنے مال سے ان درختوں اور زمین میں کام کریں گے اور رسول اللہ صلی اللہ علیہ وسلم کو کل پیداوار کا نصف (بطور مالک زمین) ملے گا۔ [سنن نسائي/كتاب المزارعة/حدیث: 3961]

حضرت ابن عمر رضی اللہ عنہما سے مروی ہے کہ نبی اکرم صلی اللہ علیہ وسلم نے خیبر کے یہودیوں کو خیبر کی زمین اور کھجوروں کے درخت اس شرط پر دیے تھے کہ ”وہ اپنے مالوں کے ساتھ ان میں کام کریں گے اور رسول اللہ صلی اللہ علیہ وسلم کو (بحیثیت مالک ہونے کے) اس زمین کا نصف پھل ملے گا“۔ [سنن نسائي/كتاب المزارعة/حدیث: 3962]

حضرت عبداللہ بن عمر رضی اللہ عنہما فرمایا کرتے تھے کہ رسول اللہ صلی اللہ علیہ وسلم کے دورِ مبارک میں زمینیں کرائے پر دی جاتی تھیں، اس شرط پر کہ پانی کے نالوں کے قریب اگنے والی فصل اور کچھ معین توڑی، نہ معلوم وہ کتنی ہوتی تھی، مالکِ زمین کو ملے گی (اور باقی مزارع کو)۔ [سنن نسائي/كتاب المزارعة/حدیث: 3963]

حضرت عبدالرحمن بن اسود رحمہ اللہ نے فرمایا کہ میرے دو چچا تہائی یا چوتھائی حصے کے عوض کاشت کیا کرتے تھے اور میرے والد بھی ان کے ساتھ شریک ہوتے تھے اور حضرت علقمہ اور حضرت اسود رحمہما اللہ اس بات کو جانتے تھے لیکن روکتے نہیں تھے۔ [سنن نسائي/كتاب المزارعة/حدیث: 3964]

حضرت ابن عباس رضی اللہ عنہما بیان کرتے ہیں کہ بہترین طریق کار یہ ہے کہ تم میں سے کوئی شخص اپنی (زائد) زمین سونے چاندی (رقم) کے عوض ٹھیکے پر دے دے۔ [سنن نسائي/كتاب المزارعة/حدیث: 3965]

حضرت ابراہیم نخعی رحمہ اللہ اور حضرت سعید بن جبیر رحمہ اللہ سے منقول ہے کہ وہ خالی زمین کو کرائے (بٹائی یا ٹھیکے) پر دینے میں کوئی حرج نہیں سمجھتے تھے۔ [سنن نسائي/كتاب المزارعة/حدیث: 3966]

حضرت محمد بن سیرین رحمہ اللہ بیان کرتے ہیں کہ میرے علم کے مطابق حضرت قاضی شریح رحمہ اللہ مضارب کے بارے میں دو فیصلے فرماتے تھے: کبھی تو وہ مضارب سے کہتے کہ تجھے پہنچنے والی مصیبت پر کوئی گواہ یا دلیل پیش کرو تاکہ تمہیں معذور قرار دیا جائے اور کبھی مال والے کو کہتے کہ تم دلیل اور گواہ پیش کرو کہ جس کے پاس تم نے امانت رکھی ہے اس نے خیانت کی ہے، ورنہ اس سے قسم لی جائے گی کہ اس نے تجھ سے خیانت نہیں کی۔ [سنن نسائي/كتاب المزارعة/حدیث: 3967]

حضرت سعید بن مسیب رحمہ اللہ بیان کرتے ہیں کہ کوئی حرج نہیں کہ صاف زمین سونے چاندی (نقد رقم) کے عوض کرائے (ٹھیکے) پر دے دی جائے۔ (مضاربت کی دستاویز) امام نسائی رحمہ اللہ بیان کرتے ہیں کہ جب کوئی شخص کسی دوسرے کو کچھ مال بطور مضاربت دے اور اس کی تحریر لکھنا چاہے تو اسے یوں لکھنا چاہیے (لکھنے والا وہ شخص ہو گا جسے مالِ مضاربت دیا جائے): ”یہ وہ تحریر ہے جو فلاں بن فلاں نے اپنی خوشی سے، صحت اور اختیار کی حالت میں، فلاں بن فلاں کے لیے لکھی ہے، کہ مجھے فلاں سال کے فلاں مہینے کے آغاز میں صحیح (کھڑے) اور عمدہ دس ہزار درہم (جو وزن کے لحاظ سے دس درہم سات مثقال کے برابر ہوتے ہیں) ملے۔ اس شرط پر کہ میں ظاہری اور پوشیدہ معاملات میں اللہ تعالیٰ سے ڈرتا رہوں گا اور بہرصورت امانت داری کروں گا، نیز میں ان کے ساتھ جو چیز خریدنا مناسب سمجھوں گا، خریدوں گا اور جس قسم کی تجارت میں بھی ان کو صرف کرنا بہتر سمجھوں گا، صرف کروں گا۔ اور میں جہاں کا سفر مناسب سمجھوں گا، کروں گا اور ان سے خریدی ہوئی اشیاء میں سے جو چیزیں بیچنا مناسب سمجھوں گا، انہیں نقد یا ادھار اور رقم کے عوض یا سامان کے عوض بیچوں گا۔ میں ان تمام معاملات میں اپنی رائے پر عمل کروں گا۔ اور اگر میں مناسب سمجھوں تو کسی بھی شخص کو وکیل بناؤں گا، اور اصل مال جو تو نے مجھے دیا ہے اور جس کی مقدار اس تحریر میں بیان کر دی گئی ہے، اس کے علاوہ جو بھی اللہ تعالیٰ اس میں اضافہ اور نفع عطا فرمائے گا، وہ میرے اور تیرے درمیان برابر تقسیم ہو گا۔ نصف تجھے ملے گا کیونکہ اصل مال تیرا ہے اور باقی نصف مجھے اپنی محنت اور کام کی وجہ سے ملے گا۔ اور اگر (اللہ نہ کرے) اس کاروبار میں نقصان ہوا تو وہ اصل مال سے شمار ہو گا۔ تو میں نے تجھ سے یہ دس ہزار صحیح (کھڑے) اور عمدہ درہم فلاں سال کے فلاں مہینے کے شروع میں وصول کر لیے ہیں اور یہ تیری رقم میرے پاس بطور مضاربت ہے، ان شرائط کے مطابق جو اس تحریر میں لکھ دی گئی ہیں۔“ فلاں (رقم لینے والا) اور فلاں (رقم دینے والا) اس تحریر کا اقرار کرتے ہیں۔ اور اگر مال کا مالک ادھار خرید و فروخت کی اجازت نہ دینا چاہتا ہو تو تحریر میں یوں لکھا جائے گا: ”اور تو نے مجھے ادھار خرید و فروخت سے روک دیا ہے۔“ [سنن نسائي/كتاب المزارعة/حدیث: 3968]