حضرت سہل بن سعد رضی اللہ عنہ سے روایت ہے، انہوں نے کہا کہ نبی کریم صلی اللہ علیہ وسلم کی خدمت میں ایک پیالہ پیش کیا گیا اور آپ صلی اللہ علیہ وسلم نے اس سے کچھ نوش فرمایا۔ آپ صلی اللہ علیہ وسلم کی دائیں جانب ایک لڑکا تھا جو حاضرین میں سب سے چھوٹا تھا، جبکہ آپ صلی اللہ علیہ وسلم کی بائیں جانب بزرگ حضرات بیٹھے تھے۔ آپ صلی اللہ علیہ وسلم نے فرمایا: ”برخوردار! تم اجازت دیتے ہو کہ میں ان بزرگوں کو یہ پیالہ دے دوں؟“ اس نے عرض کیا: اللہ کے رسول صلی اللہ علیہ وسلم ! یہ ممکن نہیں کہ آپ کے پس خوردہ پر کسی کو ترجیح دوں، چنانچہ آپ صلی اللہ علیہ وسلم نے وہ پیالہ اسی کو دے دیا۔ [صحيح البخاري/كِتَاب الشُّرْبِ والْمُسَاقَاةِ/حدیث: 2351]

حضرت انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم کے لیے ایک گھریلو بکری کو دوہا گیا اور وہ بکری حضرت انس رضی اللہ عنہ کے گھر میں تھی۔ اس میں ایک کنویں کا پانی ملایا گیا جو حضرت انس رضی اللہ عنہ کے گھر میں تھا۔ پھر وہ پیالہ رسول اللہ صلی اللہ علیہ وسلم کو پیش کیا گیا۔ آپ صلی اللہ علیہ وسلم نے اس سے نوش فرمایا تاآنکہ آپ صلی اللہ علیہ وسلم نے اپنے دہن (منہ) مبارک سے اسے علیحدہ کیا، آپ صلی اللہ علیہ وسلم کی بائیں جانب حضرت ابو بکر رضی اللہ عنہ تھے اور دائیں جانب ایک دیہاتی تھا۔ حضرت عمر رضی اللہ عنہ نے اس اندیشے کے پیش نظر کہ آپ صلی اللہ علیہ وسلم اس دیہاتی کو پیالہ دے دیں گے عرض کیا: اللہ کے رسول صلی اللہ علیہ وسلم ! پیالہ ابو بکر رضی اللہ عنہ کو دیجیے وہ آپ کے پاس ہیں۔ لیکن رسول اللہ صلی اللہ علیہ وسلم نے وہ پیالہ اعرابی کو دے دیا جو آپ کے دائیں جانب تھا، پھر آپ صلی اللہ علیہ وسلم نے فرمایا: «الْأَيْمَنَ فَالْأَيْمَنَ» ”دائیں جانب والا زیادہ حقدار ہے، پھر جو اس کے دائیں جانب ہو“۔ [صحيح البخاري/كِتَاب الشُّرْبِ والْمُسَاقَاةِ/حدیث: 2352]