حضرت عبداللہ بن عمر رضی اللہ عنہما سے روایت ہے، انہوں نے کہا کہ حضرت عمر بن خطاب رضی اللہ عنہ نے مسجد کے دروازے کے پاس ایک ریشمی جوڑا فروخت ہوتے دیکھا تو عرض کرنے لگے: اے اللہ کے رسول صلی اللہ علیہ وسلم ! کیا ہی اچھا ہو اگر آپ اسے خرید لیں اور جمعے کے دن، نیز کسی وفد کی آمد کے موقع پر اسے زیب تن فرمائیں۔ آپ صلی اللہ علیہ وسلم نے فرمایا: ”ایسے جوڑے تو وہ پہنتا ہے جس کا آخرت میں کوئی حصہ نہ ہو۔“ پھر کچھ اور جوڑے آئے تو رسول اللہ صلی اللہ علیہ وسلم نے ان میں سے ایک حضرت عمر رضی اللہ عنہ کو بھیج دیا۔ حضرت عمر رضی اللہ عنہ نے عرض کیا: اے اللہ کے رسول صلی اللہ علیہ وسلم ! آپ یہ خلعت مجھے عنایت فرما رہے ہیں، حالانکہ آپ نے حلہ عطارد کے متعلق تو جو کچھ فرمانا تھا، فرما چکے ہیں۔ (یعنی آپ نے ان کے متعلق تو بہت سخت وعید سنائی تھی۔) آپ صلی اللہ علیہ وسلم نے فرمایا: ”میں نے یہ خلعت تمہیں پہننے کے لیے نہیں دی۔“ چنانچہ حضرت عمر رضی اللہ عنہ نے وہ جوڑا اپنے ایک مشرک بھائی کو دے دیا جو مکہ میں رہتا تھا۔ [صحيح البخاري/كِتَاب الْهِبَةِ وَفَضْلِهَا وَالتَّحْرِيضِ عَلَيْهَا/حدیث: 2612]

حضرت ابن عمر رضی اللہ عنہما سے روایت ہے، انہوں نے کہا: نبی کریم صلی اللہ علیہ وسلم حضرت فاطمہ رضی اللہ عنہا کے گھر تشریف لائے لیکن اندر داخل نہ ہوئے۔ حضرت علی رضی اللہ عنہ جب گھر آئے تو حضرت فاطمہ رضی اللہ عنہا نے ان سے یہ واقعہ بیان کیا۔ انہوں نے نبی کریم صلی اللہ علیہ وسلم سے اس کی وجہ دریافت کی تو آپ نے فرمایا: ”میں نے ان کے دروازے پر نقش و نگار سے سجا ہوا پردہ دیکھا۔“ پھر فرمایا: ”بھلا مجھے اس دنیا سے کیا سروکار؟“ یہ بات حضرت علی رضی اللہ عنہ نے حضرت فاطمہ رضی اللہ عنہا سے بیان کی تو حضرت فاطمہ رضی اللہ عنہا نے فرمایا کہ اس کے متعلق آپ صلی اللہ علیہ وسلم جو چاہیں حکم دیں اس پر عمل ہوگا۔ آپ صلی اللہ علیہ وسلم نے فرمایا: ”یہ فلاں اہل خانہ کے پاس بھیج دیں، وہ محتاج اور غریب ہیں۔“ [صحيح البخاري/كِتَاب الْهِبَةِ وَفَضْلِهَا وَالتَّحْرِيضِ عَلَيْهَا/حدیث: 2613]

حضرت علی رضی اللہ عنہ سے روایت ہے، انہوں نے کہا: نبی کریم صلی اللہ علیہ وسلم نے مجھے ایک ریشمی جوڑا عنایت فرمایا تو میں نے اسے پہن لیا، لیکن میں نے جب آپ صلی اللہ علیہ وسلم کے چہرہِ انور پر غصہ دیکھا تو اسے پھاڑ کر خاندان کی عورتوں میں تقسیم کردیا۔ [صحيح البخاري/كِتَاب الْهِبَةِ وَفَضْلِهَا وَالتَّحْرِيضِ عَلَيْهَا/حدیث: 2614]