حضرت جابر بن عبداللہ رضی اللہ عنہما سے روایت ہے، انہوں نے کہا کہ میں نے (غزوہ خندق کے وقت) عرض کیا: اللہ کے رسول صلی اللہ علیہ وسلم ! میں نے بکری کا ایک بچہ ذبح کیا ہے اور ایک صاع جو کا آٹا پیسا ہے، لہٰذا آپ خود اور مزید کچھ ساتھی تشریف لے چلیں۔ نبی صلی اللہ علیہ وسلم نے بآواز بلند فرمایا: ”اے اہل خندق! آج جابر رضی اللہ عنہ نے تمہارے لیے ضیافت تیار کی ہے، آؤ جلدی چلیں۔“ [صحيح البخاري/كِتَاب الْجِهَادِ وَالسِّيَرِ/حدیث: 3070]

حضرت اُم خالد بنت خالد بن سعید رضی اللہ عنہا سے روایت ہے، انہوں نے کہا: میں اپنے والد گرامی کے ہمراہ رسول اللہ صلی اللہ علیہ وسلم کی خدمت میں حاضر ہوئی، اس وقت میں نے زرد رنگ کی قمیص پہن رکھی تھی تو رسول اللہ صلی اللہ علیہ وسلم نے فرمایا: «سَنَهْ سَنَهْ» ”اچھا، اچھا۔“ حبشی زبان میں اس کے معنیٰ ہیں۔ حضرت اُم خالد رضی اللہ عنہا کہتی ہیں، پھر میں مہر نبوت سے کھیلنے لگی تو میرے والد نے مجھے ڈانٹ پلائی، اس پر رسول اللہ صلی اللہ علیہ وسلم نے فرمایا: ”اس کو چھوڑ دو۔“ پھر فرمایا: ”کرتا پرانا کرو اور اسے پہن کر پھاڑو، پھر کرتا پرانا کرو اور پھاڑو، پھر پرانا کرو اور پھاڑو۔“ (آپ صلی اللہ علیہ وسلم نے درازیِ عمر کی دعا فرمائی۔) حضرت عبداللہ بن مبارک رحمہ اللہ بیان کرتے ہیں کہ وہ قمیص اتنی دیر تک باقی رہی کہ زبانوں پر اس کا چرچا ہونے لگا۔ [صحيح البخاري/كِتَاب الْجِهَادِ وَالسِّيَرِ/حدیث: 3071]

حضرت ابوہریرہ رضی اللہ عنہ سے روایت ہے کہ حضرت حسن بن علی رضی اللہ عنہما نے صدقے کی کھجوروں میں سے ایک کھجور اٹھائی اور اسے اپنے منہ میں ڈال لیا تو نبی صلی اللہ علیہ وسلم نے ان سے فارسی زبان میں فرمایا: ” «كِخْ كِخْ» یعنی ”تھو، تھو“ کیا تجھے پتہ نہیں کہ ہم صدقہ نہیں کھاتے؟“ [صحيح البخاري/كِتَاب الْجِهَادِ وَالسِّيَرِ/حدیث: 3072]