حضرت ابو موسیٰ اشعری رضی اللہ عنہ سے روایت ہے، انہوں نے کہا کہ مجھے میرے دوستوں نے، جو جیشِ عسرت یعنی غزوہ تبوک میں رسول اللہ صلی اللہ علیہ وسلم کے ہمراہ جانے والے تھے، آپ صلی اللہ علیہ وسلم کے پاس سواریوں کے لیے بھیجا۔ میں نے آ کر خدمتِ اقدس میں عرض کیا کہ آپ صلی اللہ علیہ وسلم انہیں سواریاں مہیا فرمائیں۔ آپ صلی اللہ علیہ وسلم نے فرمایا: ”اللہ کی قسم! میں تمہیں کوئی سواری دینے والا نہیں ہوں۔“ اتفاق سے آپ صلی اللہ علیہ وسلم اس وقت غصے میں تھے لیکن مجھے معلوم نہ تھا۔ میں بہت رنجیدہ ہو کر واپس لوٹا۔ مجھے ایک رنج تو یہ تھا کہ نبی صلی اللہ علیہ وسلم نے سواریاں نہیں دیں اور دوسرا یہ رنج تھا کہ کہیں نبی صلی اللہ علیہ وسلم میرے سواری مانگنے پر ناراض نہ ہو گئے ہوں۔ میں اپنے ساتھیوں کے پاس آیا اور نبی صلی اللہ علیہ وسلم نے جو فرمایا تھا، وہ ان سے کہہ دیا۔ تھوڑی ہی دیر بعد میں نے سنا کہ حضرت بلال رضی اللہ عنہ پکار رہے ہیں: ”اے عبداللہ بن قیس!“ میں ان کے پاس گیا تو انہوں نے کہا کہ رسول اللہ صلی اللہ علیہ وسلم نے تمہیں یاد فرمایا ہے، آپ صلی اللہ علیہ وسلم کے پاس جاؤ۔ میں آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے چھ تیار اونٹوں کی طرف اشارہ کر کے فرمایا: ”لے جاؤ ان دو اونٹوں کو، اور ان دو اونٹوں کو (آپ صلی اللہ علیہ وسلم نے یہ بات تین دفعہ فرمائی)۔“ آپ صلی اللہ علیہ وسلم نے یہ چھ اونٹ اسی وقت حضرت سعد بن عبادہ رضی اللہ عنہ سے خریدے تھے۔ آپ صلی اللہ علیہ وسلم نے مزید فرمایا: ”ان اونٹوں کو اپنے ساتھیوں کے پاس لے جاؤ اور ان سے کہہ دو کہ اللہ تعالیٰ نے، یا آپ صلی اللہ علیہ وسلم نے فرمایا کہ رسول اللہ صلی اللہ علیہ وسلم نے یہ اونٹ تمہیں سواری کے لیے دیے ہیں، لہٰذا تم ان پر سوار ہو جاؤ۔“ پھر میں ان اونٹوں کو لے کر ان کے پاس آیا اور کہا کہ نبی صلی اللہ علیہ وسلم نے تمہاری سواری کے لیے یہ اونٹ عنایت فرمائے ہیں لیکن اللہ کی قسم! میں تمہیں ہرگز چھوڑنے والا نہیں ہوں یہاں تک کہ تم میں سے کچھ لوگ میرے ساتھ اس شخص کے پاس چلیں جس نے رسول اللہ صلی اللہ علیہ وسلم کی گفتگو سنی تھی تاکہ تمہیں یہ خیال نہ ہو کہ میں نے اپنی طرف سے تمہیں ایسی بات کہہ دی تھی جو رسول اللہ صلی اللہ علیہ وسلم نے نہیں کہی تھی۔ انہوں نے کہا: (نہیں، اس اہتمام کی چنداں ضرورت نہیں)۔ ہم تجھے سچا سمجھتے ہیں اور اگر تم تصدیق کرانا چاہتے ہو تو ہم ایسا ہی کریں گے۔ چنانچہ حضرت ابو موسیٰ رضی اللہ عنہ چند آدمیوں کو لے کر ان لوگوں کے پاس آئے جنہوں نے رسول اللہ صلی اللہ علیہ وسلم کی (پہلی) گفتگو اور آپ صلی اللہ علیہ وسلم کا انکار سنا تھا مگر اس کے بعد سواری عنایت فرمائی، تو انہوں نے بھی اسی طرح بیان کیا جس طرح حضرت ابو موسیٰ رضی اللہ عنہ نے ان سے کہا تھا، یعنی حضرت ابو موسیٰ رضی اللہ عنہ کی تصدیق کی۔ [صحيح البخاري/كِتَاب الْمَغَازِي/حدیث: 4415]

حضرت سعد بن ابی وقاص رضی اللہ عنہ سے روایت ہے کہ جب رسول اللہ صلی اللہ علیہ وسلم تبوک کی طرف تشریف لے جانے لگے تو آپ صلی اللہ علیہ وسلم نے مدینہ منورہ میں حضرت علی رضی اللہ عنہ کو اپنا جانشین مقرر فرمایا۔ انہوں نے عرض کی: ”آپ مجھے بچوں اور عورتوں میں چھوڑ کر جاتے ہیں؟“ آپ صلی اللہ علیہ وسلم نے فرمایا: ”کیا تم اس بات پر خوش نہیں کہ میرے پاس تمہارا وہی درجہ ہو جو موسیٰ علیہ السلام کے ہاں ہارون علیہ السلام کا تھا۔ صرف اتنا فرق ہے کہ میرے بعد کوئی دوسرا نبی نہیں ہو گا۔“ ابوداود نے اس حدیث کو ایک دوسری سند سے بیان کیا ہے۔ [صحيح البخاري/كِتَاب الْمَغَازِي/حدیث: 4416]

حضرت یعلی بن امیہ رضی اللہ عنہ سے روایت ہے، انہوں نے کہا: ”میں رسول اللہ صلی اللہ علیہ وسلم کے ہمراہ غزوہ تبوک میں حاضر ہوا۔“ حضرت یعلیٰ رضی اللہ عنہ فرمایا کرتے تھے کہ ”میرے نزدیک یہ غزوہ میرا انتہائی قابل وثوق عمل ہے۔ میرا ایک مزدور تھا، وہ ایک دوسرے شخص سے جھگڑ پڑا تو ایک نے دوسرے کا ہاتھ چبا ڈالا۔“ (راویِ حدیث) حضرت عطاء رحمہ اللہ نے کہا: ”مجھے صفوان بن یعلیٰ رحمہ اللہ نے بتایا تھا کہ کس نے دوسرے کا ہاتھ چبایا مگر یہ میں بھول گیا ہوں۔“ انہوں نے کہا: ”جس کا ہاتھ چبایا گیا تھا اس نے اپنا ہاتھ، چبانے والے کے منہ سے کھینچا تو اس کے سامنے والے دو دانتوں میں سے ایک دانت نکل گیا۔ وہ دونوں نبی صلی اللہ علیہ وسلم کے پاس آئے تو آپ صلی اللہ علیہ وسلم نے اس کے دانت کو ضائع قرار دیا۔“ حضرت عطاء رحمہ اللہ نے کہا: ”میرا خیال ہے کہ حضرت صفوان بن یعلیٰ رحمہ اللہ نے کہا تھا کہ نبی صلی اللہ علیہ وسلم نے فرمایا: ”کیا وہ اپنا ہاتھ تیرے منہ میں چھوڑے رکھتا جسے تو چباتا رہتا گویا وہ اونٹ کے منہ میں ہے جسے وہ چباتا ہے؟“” [صحيح البخاري/كِتَاب الْمَغَازِي/حدیث: 4417]