سیدہ ام عطیہ انصاریہ رضی اللہ عنہا نے بیان کیا کہ جب رسول اللہ صلی اللہ علیہ وسلم کی بیٹی (زینب یا ام کلثوم رضی اللہ عنہما) کی وفات ہوئی، آپ صلی اللہ علیہ وسلم وہاں تشریف لائے اور فرمایا: ”تین یا پانچ مرتبہ غسل دے دو اور اگر مناسب سمجھو تو اس سے بھی زیادہ دے سکتی ہو، غسل کے پانی میں بیری کے پتے ملا لو اور آخر میں کافور یا (یہ کہا کہ) کچھ کافور کا استعمال کر لینا اور غسل سے فارغ ہونے پر مجھے خبر دینا۔“ چنانچہ ہم نے جب غسل دے لیا تو آپ صلی اللہ علیہ وسلم کو خبر دے دی، آپ صلی اللہ علیہ وسلم نے ہمیں اپنا ازار (تہبند) دیا اور فرمایا: ”اسے ان کی قمیص بنا دو۔“ آپ صلی اللہ علیہ وسلم کی مراد اپنے ازار سے تھی۔ [اللؤلؤ والمرجان/كتاب الجنائز/حدیث: 544]

سیدہ ام عطیہ رضی اللہ عنہا نے بیان کیا کہ ہم رسول اللہ صلی اللہ علیہ وسلم کی بیٹی کو غسل دے رہی تھیں کہ آپ صلی اللہ علیہ وسلم تشریف لائے اور فرمایا: ”تین یا پانچ مرتبہ غسل دو یا اس سے بھی زیادہ، پانی اور بیری کے پتوں سے، اور آخر میں کافور بھی استعمال کرنا، پھر فارغ ہو کر مجھے خبر دے دینا۔“ جب ہم فارغ ہوئے تو آپ صلی اللہ علیہ وسلم کو خبر کر دی، آپ صلی اللہ علیہ وسلم نے اپنا ازار عنایت فرمایا اور فرمایا: ”یہ اندر اس کے بدن پر لپیٹ دو۔“ ایوب (راوی) نے کہا کہ مجھ سے حفصہ رضی اللہ عنہا نے بھی محمد بن سیرین رحمہ اللہ کی حدیث کی طرح بیان کیا تھا، سیدہ حفصہ رضی اللہ عنہا کی حدیث میں تھا کہ طاق مرتبہ غسل دینا اور اس میں یہ تفصیل تھی کہ تین یا پانچ یا سات مرتبہ (غسل دینا) اور اس میں یہ بھی بیان تھا کہ میت کے دائیں طرف سے اور اعضائے وضو سے غسل شروع کیا جائے، یہ بھی اسی حدیث میں تھا کہ ام عطیہ رضی اللہ عنہا نے کہا: ہم نے کنگھی کر کے ان کے بالوں کو تین حصوں میں تقسیم کر دیا تھا۔ [اللؤلؤ والمرجان/كتاب الجنائز/حدیث: 545]

سیدہ ام عطیہ رضی اللہ عنہا نے بیان کیا کہ رسول اللہ صلی اللہ علیہ وسلم کی صاحبزادی کو ہم غسل دے رہی تھیں، جب ہم نے غسل شروع کر دیا تو آپ صلی اللہ علیہ وسلم نے فرمایا: ”غسل دائیں طرف سے اور اعضائے وضو سے شروع کرو۔“ [اللؤلؤ والمرجان/كتاب الجنائز/حدیث: 546]