حضرت براء رضی اللہ عنہ (وہ جھوٹے نہ تھے) سے روایت ہے کہ صحابہ کرام رضی اللہ عنہم رسول اللہ صلی اللہ علیہ وسلم کی اقتدا میں نماز پڑھتے تھے، جب آپ صلی اللہ علیہ وسلم رکوع سے اپنا سر اٹھا لیتے تو میں کسی کو اس وقت تک اپنی پشت جھکاتے نہ دیکھتا جب تک رسول اللہ صلی اللہ علیہ وسلم اپنی پیشانی زمین پر نہ رکھ دیتے، پھر آپ صلی اللہ علیہ وسلم کے پیچھے والے سجدے میں جاتے۔ [صحيح مسلم/كِتَاب الصَّلَاةِ/حدیث: 1062]

حضرت براء رضی اللہ عنہ (وہ جھوٹے نہ تھے) سے روایت ہے کہ رسول اللہ صلی اللہ علیہ وسلم جب «سَمِعَ اللّٰهُ لِمَنْ حَمِدَهُ» ”اللہ نے اس کی سن لی جس نے اس کی تعریف کی“ کہتے (رکوع سے سر اٹھا کر کھڑے ہو جاتے) تو ہم میں سے کوئی ایک بھی اس وقت تک اپنی پشت نہ جھکاتا، جب تک رسول اللہ صلی اللہ علیہ وسلم سجدے میں نہ چلے جاتے، پھر ہم آپ صلی اللہ علیہ وسلم کے بعد سجدہ کرتے یا سجدے میں گرتے۔ [صحيح مسلم/كِتَاب الصَّلَاةِ/حدیث: 1063]

حضرت محارب بن دثار رحمہ اللہ سے روایت ہے کہ میں نے حضرت عبداللہ بن یزید رضی اللہ عنہ کو منبر پر بیان کرتے ہوئے سنا کہ ہمیں حضرت براء رضی اللہ عنہ نے بتایا کہ صحابہ کرام رضی اللہ عنہم نبی کریم صلی اللہ علیہ وسلم کے ساتھ نماز پڑھا کرتے تھے، جب آپ صلی اللہ علیہ وسلم رکوع میں چلے جاتے تو وہ بھی رکوع کرتے اور جب آپ صلی اللہ علیہ وسلم رکوع سے اپنا سر مبارک اٹھاتے تو «سَمِعَ اللّٰهُ لِمَنْ حَمِدَهُ» ”اللہ نے اس کی بات سن لی جس نے اس کی تعریف کی“ کہتے اور ہم کھڑے رہتے یہاں تک کہ ہم دیکھتے کہ آپ صلی اللہ علیہ وسلم نے اپنا ماتھا زمین پر رکھ دیا ہے، پھر ہم (سجدہ میں چلے جاتے)۔ [صحيح مسلم/كِتَاب الصَّلَاةِ/حدیث: 1064]

حضرت براء رضی اللہ عنہ سے روایت ہے کہ ہم (نماز میں) نبی کریم صلی اللہ علیہ وسلم کے ساتھ ہوتے، ہم میں سے کوئی ایک اس وقت تک اپنی پشت نہ جھکاتا، یہاں تک کہ ہم دیکھ لیتے کہ آپ صلی اللہ علیہ وسلم سجدہ میں جا چکے ہیں، زہیر رحمہ اللہ نے کہا، ہمیں سفیان رحمہ اللہ نے بتایا کہ ہمیں ابان رحمہ اللہ وغیرہ نے حدیث سنائی کہ انہوں نے «نَرَاهُ قَدْ سَجَدَ» ”ہم دیکھ لیں کہ وہ سجدہ کر چکے ہیں“ کی جگہ «نَرَاهُ يَسْجُدُ» ”ہم انہیں سجدہ کرتے ہوئے دیکھیں“ کہا۔ [صحيح مسلم/كِتَاب الصَّلَاةِ/حدیث: 1065]

حضرت عمرو بن حریث رضی اللہ عنہ سے روایت ہے کہ میں نے نبی کریم صلی اللہ علیہ وسلم کو ﴿فَلَا أُقْسِمُ بِالْخُنَّسِ الْجَوَارِ الْكُنَّسِ﴾ [سورة التكوير: 15-16] پڑھتے ہوئے سنا۔ انہوں نے کہا کہ ہم میں سے کوئی آدمی نہیں جھکتا تھا یہاں تک کہ نبی کریم صلی اللہ علیہ وسلم پوری طرح سجدہ میں چلے جاتے۔ [صحيح مسلم/كِتَاب الصَّلَاةِ/حدیث: 1066]