حضرت ابو جعفر فرماتے ہیں کہ اللہ تعالیٰ کے ارشاد (والغارمین) سے مراد وہ لوگ ہیں جو بغیر فساد کے خرچ کرتے ہیں اور ابن السبیل سے مراد وہ لوگ ہیں جو ایک زمین سے دوسری زمین (ایک جگہ سے دوسری جگہ) کی طرف گزرتے ہیں (سفر کرتے ہیں)۔ [مصنف ابن ابي شيبه/كتاب الزكاة/حدیث: 10967]

حضرت مجاہد فرماتے ہیں کہ تین طرح کے لوگ غارمین میں سے ہیں۔ ایک وہ شخص جس کا مال سیلاب میں چلا گیا، دوسرا وہ شخص جس کو آگ لگ گئی اور اس کا مال جاتا رہا، اور تیسرا وہ شخص جس کے اہل و عیال تو ہیں لیکن اس کے پاس مال نہیں ہے۔ اور وہ ادھار لے کر اپنے عیال پر خرچ کرتا ہے۔ [مصنف ابن ابي شيبه/كتاب الزكاة/حدیث: 10968]

حضرت ابو جعفر فرماتے ہیں کہ امام کو چاہئے کہ غارم (مقروض) کی طرف سے اس کا قرض ادا کرے۔ [مصنف ابن ابي شيبه/كتاب الزكاة/حدیث: 10969]

حضرت معقل فرماتے ہیں کہ میں نے حضرت امام زہری سے غارمین کے متعلق دریافت کیا آپ نے فرمایا اس سے مراد قرض والے لوگ اور مسافر ہیں اگرچہ وہ غنی ہو۔ [مصنف ابن ابي شيبه/كتاب الزكاة/حدیث: 10970]