حضرت ابو قلابہ فرماتے ہیں کہ اللہ کی قسم! لوگوں کا نماز جنازہ کی ادائیگی کے بعد تدفین تک قبر پر کھڑے ہونا بدعت ہے۔ [مصنف ابن ابي شيبه/كتاب الجنائز/حدیث: 12117]

حضرت ابن عون فرماتے ہیں کہ میں نے حضرت شعبی سے دریافت کیا جنازے کے لئے کھڑے رہنا یہاں تک کہ اس کو لحد میں رکھ دیا جائے (کیسا ہے؟) آپ نے فرمایا میں نے کسی کو ایسا کرتے نہیں دیکھا سوائے ابو مرحوم جو کہ شامی تھے اور لوگ ان پر ہنستے تھے۔ [مصنف ابن ابي شيبه/كتاب الجنائز/حدیث: 12118]

حضرت مغیرہ فرماتے ہیں کہ حضرت ابراہیم قبر کے پاس کھڑے ہونے کو ناپسند فرماتے تھے۔ [مصنف ابن ابي شيبه/كتاب الجنائز/حدیث: 12119]

حضرت ابن عون فرماتے ہیں کہ حضرت شعبی کے سامنے جنازہ رکھے جانے تک اس کے لیے کھڑے رہنے کا ذکر کیا گیا تو گویا کہ ان کو اس کے بارے میں علم ہی نہ تھا۔ (وہ اس کو جانتے ہی نہ تھے)۔ [مصنف ابن ابي شيبه/كتاب الجنائز/حدیث: 12120]

حضرت ابن عون فرماتے ہیں کہ پھر میں نے حضرت مجاہد سے اس کا ذکر کیا تو آپ نے فرمایا: یہ تب ہے جب اس پر نماز پڑھی جا چکی ہو تو اس کے (قبر میں) رکھے جانے تک نہ بیٹھا جائے۔ [مصنف ابن ابي شيبه/كتاب الجنائز/حدیث: 12121]