حضرت عبد اللہ رضی اللہ عنہ فرماتے ہیں کہ ہم رسول اللہ صلی اللہ علیہ وسلم کے ساتھ ایک غار میں تھے کہ یہ آیت نازل ہوئی { وَالْمُرْسَلاَتِ عُرْفًا } اس آیت کے نازل ہوتے ہی ہم نے اسے حضور صلی اللہ علیہ وسلم کے دہن مبارک سے تازہ تازہ حاصل کرلیا۔ اتنے میں ایک سانپ غار میں داخل ہوا تو رسول اللہ صلی اللہ علیہ وسلم نے فرمایا کہ اس کو مار ڈالو۔ ہم سانپ کو مارنے کے لیے بڑھے ہی تھے کہ وہ بھاگ گیا پھر آپ نے فرمایا کہ اللہ نے اسے تمہارے شر سے اور تمہیں اس کے شر سے بچا لیا۔ [مصنف ابن ابي شيبه/كتاب الصيد/حدیث: 21081]

حضرت عمر رضی اللہ عنہ فرماتے ہیں کہ سانپوں کو ہر حال میں مار ڈالو۔ [مصنف ابن ابي شيبه/كتاب الصيد/حدیث: 21082]

حضرت علی رضی اللہ عنہ دو دھاری والے سانپوں کو مارنے کا حکم دیا کرتے تھے۔ [مصنف ابن ابي شيبه/كتاب الصيد/حدیث: 21083]

حضرت عمر رضی اللہ عنہ فرماتے ہیں کہ اپنے گھروں کو صاف رکھو، حشرات کو ان میں پیدا نہ ہونے دو، انہیں ڈراؤ قبل اس کے کہ وہ تمہیں ڈرائیں کیونکہ مسلمان (جن) تمہارے سامنے ان کی شکل میں ظاہر نہ ہوگا۔ [مصنف ابن ابي شيبه/كتاب الصيد/حدیث: 21084]

حضرت عبد اللہ فرماتے ہیں کہ جس نے سانپ کو قتل کیا گویا اس نے کافر کو قتل کیا۔ [مصنف ابن ابي شيبه/كتاب الصيد/حدیث: 21085]

حضرت عبد اللہ رضی اللہ عنہ فرماتے ہیں کہ سب سانپوں کو قتل کرو صرف اس سانپ کو قتل نہ کرو جو سرمی دانی کی سلائی کی طرح ہے کیونکہ یہ جن ہے۔ [مصنف ابن ابي شيبه/كتاب الصيد/حدیث: 21086]

حضرت ابن عباس رضی اللہ عنہما سانپوں کو مارتے تھے اور انہیں مارنے کا حکم دیتے اور فرماتے تھے کہ جان (سفید پتلے سانپ) جنوں کی بگڑی ہوئی شکل ہیں جس طرح بندر بنی اسرائیل کی بگڑی ہوئی شکلیں ہیں۔ [مصنف ابن ابي شيبه/كتاب الصيد/حدیث: 21087]

حضرت ابن عمر رضی اللہ عنہما سانپوں کو مار کر پھینکنے کا حکم دیتے تھے۔ [مصنف ابن ابي شيبه/كتاب الصيد/حدیث: 21088]

حسن اور محمد چاندی کی مانند پتلے سانپ (جان) کے علاوہ سب سانپوں کو مارنے کا حکم دیتے تھے۔ [مصنف ابن ابي شيبه/كتاب الصيد/حدیث: 21089]

ابراہیم فرماتے ہیں کہ اسلاف سب سانپوں کو مارنے کا حکم دیتے تھے سوائے اس پتلے سانپ (جان) کے جو چاندی کی سلاخ کی مانند ہو۔ [مصنف ابن ابي شيبه/كتاب الصيد/حدیث: 21090]