حضرت حضین ابو ساسان فرماتے ہیں کہ اہل کوفہ میں سے چند لوگ سوار ہو کر حضرت عثمان کے پاس آئے انہوں نے آپ کو ولید بن عقبہ کے شرا ب پینے کے متعلق بتلایا۔ تو حضرت علی رضی اللہ عنہ نے اس بارے میں آپ سے بات کی۔ حضر ت عثمان نے فرمایا: اپنے چچا زاد بھائی کے پاس جاؤ اور تم اس پر حد قائم کرو سو حضرت علی رضی اللہ عنہ نے فرمایاٖ اے حسن! کھڑے ہو اور اسے کوڑے مارو اس نے کہا: تم اس عمل کے اہل نہیں! اپنے علاوہ کسی کو سپرد کرو آپ نے فرمایا: بلکہ تو ضعیف ہوگیا، کمزور ہوگیا اور عاجز ہوگیا ہے اے عبداللہ بن جعفر کھڑے ہوجاؤ پس انہوں نے اس کو کوڑے مارنے شروع کردیے اور حضرت علی رضی اللہ عنہ شمار کررہے تھے یہاں تک کہ وہ چالیس تک پہنچ گئے، آپ نے فرمایا: ٹھہرو یا فرمایا: رک جاؤ رسول اللہ صلی اللہ علیہ وآلہ وسلم نے چالیس کوڑے مارے ہیں اور حضرت ابوبکر نے بھی چایس کوڑے مارے ہیں اور حضرت عمر نے اس کی اسی کوڑے تک تکمیل فرمائی ہے اور تمام سنت طریقے ہیں۔ [مصنف ابن ابي شيبه/كتاب الحدود/حدیث: 30297]

حضرت حسن بصری فرماتے ہیں کہ حضر ت عمر نے شراب میں اسی کوڑے لگائے۔ [مصنف ابن ابي شيبه/كتاب الحدود/حدیث: 30298]

حضرت ابو عبدالرحمن فرماتے ہیں کہ حضرت علی رضی اللہ عنہ نے ارشاد فرمایا: اہل شام میں سے چند لوگوں نے شراب پی۔ اس وقت ان پر یزید بن ابو سفیان امیر تھے اور ان لوگوں نے کہا: یہ ہمارے لیے حلال ہے، اور انہوں نے اس آیت کی تاویل کی: ایمان اور اعمال صالحہ والوں پر کوئی چیز کھانے میں کوئی حرج نہیں [المائدة: 93] ۔ یزید بن ابی سفیان نے اس بارے میں حضرت عمر کو خط لکھا۔ حضرت عمر نے لکھا کہ قبل اس کے کہ یہ لوگ تمہارے پاس والوں کو بگاڑیں انہیں میرے پاس بھجوا دو۔ جب وہ آئے تو حضرت عمر نے ان کے بارے میں مشورہ کیا۔ آپ سے کہا گیا اے امیرالمومنین! ہمارا خیال ہے کہ ان لوگوں نے اللہ کے بارے میں جھوٹ بولا اور اپنے دین میں وہ بات مقرر کی جس کی اللہ نے اجازت نہیں دی۔ لہٰذا انہیں قتل کروا دیں۔ اس دوران حضرت علی رضی اللہ عنہ خاموش رہے۔ حضرت عمر نے پوچھا اے ابوالحسن! آپ کیا کہتے ہیں؟ حضرت علی رضی اللہ عنہ نے کہا کہ میری رائے ہے کہ آپ ان سے توبہ کا مطالبہ کریں، اگر وہ توبہ کرتے ہیں تو انہیں شراب پینے کی وجہ سے اسی اسی کوڑے لگائیں اور اگر توبہ نہ کریں تو قتل کردیں، کیونکہ انہوں نے اللہ پر جھوٹ گھڑا ہے اور اپنے دین میں وہ بات مقرر کی جس کی اللہ نے اجازت نہیں دی۔ حضرت عمر نے ان سے توبہ کا مطالبہ کیا تو انہوں نے توبہ کر لی، اس پر آپ نے انہیں اسی اسی کوڑے لگائے۔ [مصنف ابن ابي شيبه/كتاب الحدود/حدیث: 30299]

حضرت عبدالرحمن بن ازھر فرماتے ہیں کہ نبی کریم صلی اللہ علیہ وآلہ وسلم کے پاس غزوہ حنین کے دن ایک شرابی لایا گیا سو رسول اللہ صلی اللہ علیہ وآلہ وسلم نے لوگوں سے فرمایا: تم اس کی طرف اٹھو۔ پس لو گ اس کی طرف گئے اور انہوں نے اپنی جوتیوں سے اسے مارا۔ [مصنف ابن ابي شيبه/كتاب الحدود/حدیث: 30300]

حضرت ابو سعید خدری فرماتے ہیں کہ رسول اللہ صلی اللہ علیہ وآلہ وسلم نے شراب میں دو جوتیوں سے چالیس ضربیں ماریں اور حضرت عمر نے ہر جوتی کے بدلے میں کوڑا مارنا شروع کیا۔ [مصنف ابن ابي شيبه/كتاب الحدود/حدیث: 30301]

حضرت سمیط بن عمیر فرماتے ہیں کہ ایک آدمی جمعہ کے دن مسجد میں داخل ہوا اور اس نے چار رکعت نماز پڑھ لی اس پر ایک آدمی نے اپنے ساتھی سے کہا: کیا تم نے بھی وہی دیکھا جو میں نے دیکھا؟ وہ کہنے لگا: ہاں پھر ان دونوں نے اس شخص کو پکڑا اور اسے حضرت ابو موسیٰ اشعری کے پاس لائے اور کہنے لگے: بیشک یہ شخص مسجد میں داخل ہوا اور اس نے چار رکعت نماز پڑھی آپ نے پوچھا: کیا اس کے علاوہ بھی کچھ کیا؟ انہوں نے کہا: نہیں۔ آپ نے فرمایا: بیشک یہ تو شک کی بات ہے۔ آپ نے پوچھا: تجھے اس کام پر کس بات نے ابھارا؟ اس شخص نے جواب دیا: میں نے آج سے پہلے کبھی شراب نہیں پی تو آپ نے اسے اسّی کوڑے مارے۔ [مصنف ابن ابي شيبه/كتاب الحدود/حدیث: 30302]

حضرت ابو سعید فرماتے ہیں کہ نبی کریم صلی اللہ علیہ وآلہ وسلم نے شراب میں چالیس کوڑے مارے۔ [مصنف ابن ابي شيبه/كتاب الحدود/حدیث: 30303]