حضرت انس سے روایت ہے کہ قریش نے نبی کریم صلی اللہ علیہ وآلہ وسلم سے مصالحت کی جبکہ ان (مصالحت کرنے والوں) میں سہیل بن عمر و بھی تھا۔ نبی کریم صلی اللہ علیہ وآلہ وسلم نے حضرت علی رضی اللہ عنہ سے فرمایا: لکھو! بِسْمِ اللہِ الرَّحْمَن الرَّحِیمِ سہیل نے کہا یہ بِسْمِ اللہِ الرَّحْمَن الرَّحِیمِ ہم نہیں جانتے۔ بِسْمِ اللہِ الرَّحْمَن الرَّحِیمِ کیا ہے۔ ہاں وہ بات لکھو جس کو ہم جانتے ہیں۔ بِاسْمِکَ اللّٰھُمَّ۔ پھر آپ صلی اللہ علیہ وآلہ وسلم نے فرمایا: لکھو! محمد رسول اللہ کی طرف سے۔ وہ کہنے لگے۔ اگر ہم آپ کو اللہ کا رسول مانتے تو ہم آپ کی اتباع ہی کرلیتے۔ ہاں اپنا اور اپنے والد کا نام لکھو۔ اس پر نبی کریم صلی اللہ علیہ وآلہ وسلم نے فرمایا: یہ لکھو! محمد بن عبد اللہ کی طرف سے۔ پھر مشرکین قریش نے آپ صلی اللہ علیہ وآلہ وسلم پر یہ شرط لگائی کہ تم میں سے جو آدمی (ہمارے پاس) آئے گا ہم اس کو تمہیں واپس نہیں کریں گے۔ اور ہم میں سے جو آدمی تمہارے پاس آئے گا تو تم اس کو ہماری طرف واپس کرو گے۔ صحابہ نے عرض کیا۔ یا رسول اللہ صلی اللہ علیہ وآلہ وسلم! کیا یہ بات بھی لکھی جائے گی؟ آپ صلی اللہ علیہ وآلہ وسلم نے فرمایا: ہاں! جو آدمی ہم میں سے ان ی طرف جائے گا تو اللہ اس کو دور کر دے گا۔ اور جو ہمارے پاس ان میں سے آئے گا تو اللہ تعالیٰ اس کے لئے راہ اور مخرج پیدا کر دے گا۔ [مصنف ابن ابي شيبه/كتاب المغازي/حدیث: 39618]

حضرت جابر بیان کرتے ہیں کہ ہم یوم الحدیبیہ کو چودہ سو کی تعداد میں تھے۔ آپ صلی اللہ علیہ وآلہ وسلم نے ہمیں ارشاد فرمایا: آج کے دن تم لوگ اہل زمین میں سب سے زیادہ بہتر ہو۔
حضرت مسور اور مروان سے روایت ہے کہ رسول اللہ صلی اللہ علیہ وآلہ وسلم حدیبیہ کے سال اپنے صحابہ کی دس سو سے کچھ اوپر کی تعداد کے ہمراہ نکلے۔ پس جب آپ صلی اللہ علیہ وآلہ وسلم ذو الحلیفہ میں تھے تو آپ صلی اللہ علیہ وآلہ وسلم نے ہدی کو قلادہ پہنایا، اس کا اشعار کیا اور احرام باندھا۔ [مصنف ابن ابي شيبه/كتاب المغازي/حدیث: 39619]

حضرت ایاس بن سلمہ، اپنے والد سے روایت کرتے ہیں کہ قریش نے سہیل بن عمرو، حویطب ابن عبد العزی اور مکرز بن حفص کو نبی کریم صلی اللہ علیہ وآلہ وسلم کی طرف بھیجا تاکہ وہ آپ صلی اللہ علیہ وآلہ وسلم سے صلح کریں۔ پس جب رسول اللہ صلی اللہ علیہ وآلہ وسلم نے ان میں سہیل کو دیکھا تو آپ صلی اللہ علیہ وآلہ وسلم نے ارشاد فرمایا: تمہارا معاملہ آسان ہوگیا ہے۔ لوگ تمہارے پاس اپنے رشتوں کے ہمراہ آ رہے ہیں۔ اور تم سے صلح کا سوال کر رہے ہیں۔ پس ہدی کے جانوروں کو کھڑا کردو اور تلبیہ کو ظاہر کرو۔ شاید کہ یہ ان کے دلوں کو نرم کر دے۔ صحابہ کرام نے لشکر کے اطراف سے تلبیہ بلند کیا یہاں تک کہ ان کے تلبیہ میں ان کی آوازوں سے گونج پیدا ہوگئی۔ راوی کہتے ہیں: پس مشرکین آئے اور انہوں نے صلح کی بات کی۔ 2۔ راوی کہتے ہیں: اس دوران جبکہ یہ لوگ باہم جنگ بندی کرچکے تھے اور مسلمانوں کے لشکر میں مشرکین اور مشرکین کے لشکر میں مسلمان موجود تھے، ابو سفیان نے دھوکے سے حملہ کردیا اور اچانک وادی لوگوں اور اسلحہ سے بہنے لگی۔ راوی کہتے ہیں: ایاس بیان کرتے ہیں کہ سلمہ نے کہا۔ میں نے مشرکین میں سے چھ مسلح افراد کو ہانک لیا درآنحالیکہ وہ اپنے لئے کسی نفع اور نقصان کے مالک نہیں تھے۔ ہم انہیں لے کر نبی کریم صلی اللہ علیہ وآلہ وسلم کی خدمت میں حاضر ہوئے آپ صلی اللہ علیہ وآلہ وسلم نے انہیں قتل کیا اور نہ مال چھینا بلکہ معاف فرما دیا۔ راوی کہتے ہیں: پھر مشرکین کے قبضہ میں ہمارے جو ساتھی تھے ہم نے ان کے بارے میں سختی کی اور مشرکین کے قبضہ میں ان میں سے کسی کو بھی نہیں چھوڑا بلکہ چھڑا لیا۔ راوی کہتے ہیں: ہمارے قبضہ میں جو ان کے افراد تھے ہم ان پر غالب رہے۔ 3۔ پھر قریش، سہیل بن عمرو اور حویطب بن عبد العزی کے پاس گئے اور انہیں اپنی صلح کا متولی بنایا۔ اور نبی کریم صلی اللہ علیہ وآلہ وسلم نے حضرت علی رضی اللہ عنہ اور حضرت طلحہ کو بھیجا۔ حضرت علی رضی اللہ عنہ نے ان کے درمیان فیصلہ تحریر کیا۔ بِسْمِ اللہِ الرَّحْمَن الرَّحِیمِ۔ یہ وہ تحریر ہے جس پر محمد رسول اللہ نے قریش سے صلح کی ہے۔ آپ صلی اللہ علیہ وآلہ وسلم نے ان سے اس بات پر صلح کی ہے کہ نہ تو دھوکہ دہی ہوگی اور نہ ہی شرائط کی خلاف ورزی اور یہ بھی شرط ہے کہ اصحابِ محمد (صلی اللہ علیہ وآلہ وسلم) میں سے جو آدمی حج وعمرہ کرنے یا اللہ کا فضل تلاش کرنے کے لئے مکہ مکرمہ آئے گا تو اس کے خون اور مال کو امن ہوگا۔ اور قریش میں سے جو شخص مدینہ میں مصر یا شام کی طرف جانے کے لئے آئے اور اللہ کے فضل کا متلاشی ہو تو اس کا مال اور خون بھی مامون ہوگا۔ اور یہ شرط بھی تھی کہ قریش میں سے جو شخص محمد (صلی اللہ علیہ وآلہ وسلم) کے پاس آئے گا تو واپس کیا جائے گا اور جو شخص محمد (صلی اللہ علیہ وآلہ وسلم) کے صحابہ میں سے قریش کی طرف آئے گا تو وہ انہی کے پاس ہوگا۔ 4۔ یہ بات اہل اسلام پر بہت شاق گزری۔ نبی کریم صلی اللہ علیہ وآلہ وسلم نے ارشاد فرمایا: جو شخص ہم میں سے ان کی طرف جائے گا تو اللہ اس کو دور کر دے، اور جو شخص ان میں سے ہماری طرف آئے گا تو ہم اس کو ان کی طرف واپس کردیں گے (حالانکہ) اللہ تعالیٰ اس کے دل سے اسلام کو جانتا ہے اور اللہ تعالیٰ اس کے لئے راہ بنا دے گا۔ 5۔ قریش نے نبی کریم صلی اللہ علیہ وآلہ وسلم سے اس بات پر صلح کی کہ آپ صلی اللہ علیہ وآلہ وسلم آئندہ سال اسی مہینے میں عمرہ کریں گے (لیکن) ہمارے پاس گھوڑے اور اسلحہ لے کر نہیں آئیں گے سوائے اس مقدار کے جو ایک مسافر اپنے تھیلے میں رکھتا ہے۔ اور آپ صلی اللہ علیہ وآلہ وسلم (آئندہ سال) مکہ میں تین دن قیام کریں گے۔ اور یہ شرط بھی تھی کہ اس ہدی کو جہاں پر ہم نے روکا ہے وہیں پر اس کو حلال کریں۔ ان کو مزید آگے نہیں ہانکیں گے۔ نبی کریم صلی اللہ علیہ وآلہ وسلم نے ارشاد فرمایا۔ ہم تو اس کو ہانکیں گے اور تم اس کو واپس موڑدینا۔ [مصنف ابن ابي شيبه/كتاب المغازي/حدیث: 39620]

حضرت ایاس بن سلمہ، اپنے والد سے روایت کرتے ہیں کہ قریش نے خارجہ بن کرز کو اپنے لئے جاسوسی کرنے کے لئے بھیجا۔ تو وہ (صحابہ کرام کی) تعریفیں کرتے ہوئے واپس پلٹا۔ تو قریش نے اس سے کہا۔ تو دیہاتی آدمی ہے۔ انہوں نے تجھے اسلحہ کی جھنکار سنائی تو تیرا دل اڑ گیا۔ پس تجھے کچھ پتہ نہیں چلا کہ تجھے کیا کہا گیا اور تو نے کیا کہا۔ پھر قریش نے عروہ بن مسعود کو بھیجا۔ وہ آپ صلی اللہ علیہ وآلہ وسلم کی خدمت میں حاضر ہوا۔ اے محمد! یہ کیا بات ہے؟ تو خدا کی ذات کی طرف بلاتا ہے اور پھر تو اپنی قوم کے پاس اوباش لوگوں کو لاتا ہے۔ جن میں سے بعض کو تو جانتا ہے اور بعض کو نہیں جانتا، تاکہ تو ان سے قطع رحمی کرے اور ان کی حرمتوں، خون اور اموال کو حلال کرے۔ آپ صلی اللہ علیہ وآلہ وسلم نے ارشاد فرمایا: میں تو اپنی قوم کے پاس صرف اس لئے آیا ہوں تاکہ میں ان سے صلح رحمی کروں۔ اللہ ان کو ان کے دین کے بدلہ ایک اس سے بہتر دین اور ان کی معیشت سے بہتر معیشت دیتا ہے۔ پس (یہ بات سن کر) وہ بھی تعریفیں کرتے ہوئے لوٹا۔ راوی کہتے ہیں: حضرت ایاس اپنے والد سے روایت کرتے ہیں، مشرکین کے قبضہ میں جو مسلمان موجود تھے ان پر مصائب کی شدت اور بڑھ گئی۔ راوی کہتے ہیں کہ رسول اللہ صلی اللہ علیہ وآلہ وسلم نے حضرت عمر کو بلایا اور اشارہ فرمایا۔ اے عمر! کیا اپنے مسلمان قیدی بھائیوں کو تم اپنی طرف سے پیغام پہنچا (آؤ) گے۔ حضرت عمر نے عرض کیا۔ اے اللہ کے نبی صلی اللہ علیہ وآلہ وسلم! میرا تو مکہ میں کوئی بڑا خاندان نہیں ہے۔ جبکہ میرے علاوہ لوگ مجھ سے زیادہ وہاں خاندانی روابط رکھتے ہیں۔ آپ صلی اللہ علیہ وآلہ وسلم نے حضرت عثمان کو بلایا اور ان کو اہل مکہ کی طرف روانہ کیا۔ حضرت عثمان، اپنی سواری پر سوار ہو کر نکلے یہاں تک کہ آپ مشرکین کے لشکر کے پاس پہنچے۔ انہوں نے آپ سے لا یعنی باتیں شروع کیں۔ اور بیہودہ گفتگو کی۔ لیکن پھر حضرت عثمان کو ابان بن سعید بن العاص نے، جو حضرت عثمان کا چچا زاد تھا، پناہ دی۔ اور انہیں اپنی زین پر سوار کیا اور خود آپ کے پیچھے سوار ہوگیا پھر جب یہ کچھ آگے بڑھے تو اس نے کہا۔ اے چچا زاد! کیا وجہ ہے کہ میں تجھے پرانے کپڑے پہنے ہوئے دیکھ رہا ہوں؟ شلوار نیچے کرو (یعنی ٹخنے ڈھانپ لو)۔ راوی کہتے ہیں: حضرت عثمان کی ازار نصف پنڈلی تک تھی، حضرت عثمان نے جواباً اس کو ارشاد فرمایا: ہمارے صاحب (نبی کریم صلی اللہ علیہ وآلہ وسلم) کی ازار بھی اسی طرح ہوتی ہے۔ پھر حضرت عثمان نے مسلمان قیدیوں میں سے کسی کو رسول اللہ صلی اللہ علیہ وآلہ وسلم کا پیغام پہنچائے بیرے نہیں چھوڑا (یعنی سب کو پیغام دیا) حضرت سلمہ فرماتے ہیں۔ اس دوران جبکہ ہم قیلولہ کر رہے تھے کہ رسول اللہ صلی اللہ علیہ وآلہ وسلم کے منادی نے آواز دی۔ اے لوگو! بیعت (محمد) بیعت! روح القدس نازل ہوئے ہیں۔ راوی کہتے ہیں: پس ہم رسول اللہ صلی اللہ علیہ وآلہ وسلم کی طرف چل دئیے۔ آپ صلی اللہ علیہ وآلہ وسلم ایک کیکر کے درخت کے نیچے تشریف فرما تھے۔ ہم نے آپ صلی اللہ علیہ وآلہ وسلم سے بیعت کی۔ اسی کا ذکر اس آیت میں ہے۔ { لَقَدْ رَضِیَ اللَّہُ عَنِ الْمُؤْمِنِینَ إِذْ یُبَایِعُونَکَ تَحْتَ الشَّجَرَۃِ } راوی کہتے ہیں۔ آپ صلی اللہ علیہ وآلہ وسلم نے حضرت عثمان کے لئے بیعت اس طرح لی کہ آپ صلی اللہ علیہ وآلہ وسلم نے اپنا ایک ہاتھ دوسرے پر رکھ لیا۔ لوگ کہنے لگے۔ ابو عبد اللہ کی خوش قسمتی ہے۔ وہ بیت اللہ کا طواف کر رہا ہے اور ہم یہاں پر ہیں۔ رسول اللہ صلی اللہ علیہ وآلہ وسلم نے ارشاد فرمایا: اگر وہ کئی سال بھی وہاں رہے تب بھی طواف نہیں کرے گا جب تک میں طواف نہیں کروں گا۔ [مصنف ابن ابي شيبه/كتاب المغازي/حدیث: 39621]

حضرت ابو سعید سے روایت ہے کہ رسول اللہ صلی اللہ علیہ وآلہ وسلم نے حدیبیہ کے دن ارشاد فرمایا: تم لوگ رات کے وقت آگ نہ جلانا۔ پھر آپ صلی اللہ علیہ وآلہ وسلم نے فرمایا: آگ جلاؤا ور (کھانا) بناؤ۔ تمہارے بعد کوئی قوم تمہارے مُد اور صاع (کے ثواب) کو نہیں پا سکے گی۔ [مصنف ابن ابي شيبه/كتاب المغازي/حدیث: 39622]

حضرت جابر سے روایت ہے کہ حدیبیہ کے دن لوگوں کو شدید پیاس لگی۔ راوی کہتے ہیں: لوگ رسول اللہ صلی اللہ علیہ وآلہ وسلم کی طرف لپکے۔ چناچہ آپ صلی اللہ علیہ وآلہ وسلم نے اپنا ہاتھ چمڑے کے برتن میں رکھا تو میں نے پانی کو چشموں کی طرح دیکھا۔ حضرت سالم کہتے ہیں کہ میں نے حضرت جابر سے پوچھا: تم لوگ کتنی تعداد میں تھے۔ انہوں نے جواب دیا۔ اگر ہم ایک لاکھ بھی ہوتے تو وہ پانی ہمیں کفایت کرجاتا (ویسے) ہم پندرہ سو کی تعداد میں تھے۔ [مصنف ابن ابي شيبه/كتاب المغازي/حدیث: 39623]

حضرت عروہ بن زبیر سے روایت ہے کہ رسول اللہ صلی اللہ علیہ وآلہ وسلم حدیبیہ کے سال اٹھارہ سو کی تعداد کو لے کر نکلے اور آپ صلی اللہ علیہ وآلہ وسلم نے اپنے آگے بنو خزاعہ کے ایک شخص، جس کا نام ناجیہ تھا، کو بھیجا تاکہ وہ لوگوں کی خبر لائے۔ یہاں تک کہ رسول اللہ صلی اللہ علیہ وآلہ وسلم مقام عسفان کے کنویں پر پہنچے جس کا نام غدیر اشطاط تھا۔ تو آپ صلی اللہ علیہ وآلہ وسلم کو اپنا جاسوس غدیر اشطاط پر ملا اور اس نے کہا: اے محمد! میں نے تیری قوم، کعب بن لؤی اور عامر بن لؤی، کو اس حال میں چھوڑا ہے کہ انہوں نے آپ کے لئے متفرق لوگوں کو اور جو کوئی ان کی مانتا ہے ان کو نفیر عام کیا ہے۔ انہوں نے تیرے چلنے کی خبر سن لی ہے۔ اور میں نے ان کے غلاموں کو اس حال میں چھوڑا ہے کہ انہیں گھروں میں خزیر (خاص کھانا) کھلایا جاتا ہے۔ اور خالد بن ولید کو تو انہوں نے یہ سامنے گھڑ سواروں کی جماعت کے ہمراہ بھیجا ہے۔ 2۔ نبی کریم صلی اللہ علیہ وآلہ وسلم کھڑے ہوئے اور آپ صلی اللہ علیہ وآلہ وسلم نے (صحابہ سے) پوچھا۔ تم کیا کہتے ہو؟ تمہارا کیا حکم ہے؟ مجھے بتاؤ۔ قریش اور ان کی تیاریوں کی خبر تمہیں دو مرتبہ پہنچ چکی ہے۔ اور یہ مقام غمیم میں خالد بن ولید بھی پہنچ چکا ہے۔ نبی کریم صلی اللہ علیہ وآلہ وسلم نے صحابہ سے پوچھا۔ کیا تمہاری رائے یہ ہے کہ ہم اپنے رُخ پر چلتے رہیں اور جو کوئی ہمیں بیت اللہ سے روکے ہم اس سے لڑائی کریں۔ یا تمہاری رائے یہ ہے کہ ہم ان کے برخلاف ان کے پچھلوں کی طرف بڑھیں۔ پھر اگر ان میں سے کوئی جماعت پیچھے آئے گی تو اللہ تعالیٰ اس کو توڑ دے گا۔ صحابہ نے عرض کیا۔ یا رسول اللہ صلی اللہ علیہ وآلہ وسلم! حُکم، آپ کا حکم ہے۔ اور رائے بھی آپ کی رائے ہے۔ پھر یہ لوگ دائیں جانب مڑ گئے۔ اس بات کا خالد اور اس کے ہمراہ لشکر کو پتہ نہیں چلا۔ یہاں تک کہ یہ لوگ لشکر کے غبار کو کر اس کر گئے۔ 3۔ آپ صلی اللہ علیہ وآلہ وسلم کی اونٹنی آپ صلی اللہ علیہ وآلہ وسلم کو ایک بلند ٹیلے سے ایک پست زمین کی طرف لے گئی۔ جس کا نام بلدح تھا۔ اور (وہاں جا کر) بیٹھ گئی۔ آپ صلی اللہ علیہ وآلہ وسلم نے فرمایا: حَلْ حَلْ۔ لیکن وہ اونٹنی نہیں اٹھی۔ لوگوں نے کہا۔ قصوائ (اونٹنی کا نام ہے) اڑ گئی ہے۔ آپ صلی اللہ علیہ وآلہ وسلم نے فرمایا: بخدا یہ اونٹنی نہں ں اَڑی اور نہ ہی اڑنا اس کی عادت ہے لیکن اس کو ہاتھیوں کو روکنے والے نے روک دیا ہے۔ سنو! بخدا اگر آج کے دن وہ مجھے کسی ایسے معاملہ کی طرف جس میں وہ کسی حرمت کی تعظیم کرتے ہوں بلائیں گے یا مجھے وہ کسی صلہ رحمی کی طرف بلائیں گے تو میں انہیں مثبت جواب دوں گا۔ پھر آپ صلی اللہ علیہ وآلہ وسلم نے اونٹنی کو دوڑایا تو وہ اچھل پڑی پس آپ صلی اللہ علیہ وآلہ وسلم اپنے قدم کے نشانات پر وہیں واپس ہوگئے جہاں سے تشریف لائے تھے۔ یہاں تک کہ آپ صلی اللہ علیہ وآلہ وسلم لوگوں کو لے کر حدیبیہ کے ایک مقام پر فروکش ہوئے جہاں پر پانی اتنا قلیل تھا کہ لوگ تھوڑا تھوڑا پانی لے رہے تھے۔ تو (اس پر) لوگوں نے رسول اللہ صلی اللہ علیہ وآلہ وسلم سے پانی کی قلت کی شکایت کی۔ آپ صلی اللہ علیہ وآلہ وسلم نے اپنے ترکش میں سے ایک تیر نکالا اور ایک آدمی کو حکم دیا اور اس نے اس تیر کو کنویں کے درمیان میں گاڑ دیا۔ پس پانی نے اتنا جوش مارا کہ لوگ اس پانی سے خوب سیراب ہوگئے۔ 4۔ نبی کریم صلی اللہ علیہ وآلہ وسلم ابھی اسی حالت میں تھے کہ بدیل بن ورقاء خزاعی، اپنی قوم خزاعہ کے ایک گروہ کے ہمراہ آپ صلی اللہ علیہ وآلہ وسلم کے پاس سے گزرا اور اس نے کہا۔ اے محمد (صلی اللہ علیہ وآلہ وسلم)! یہ تیری قوم کے لوگ عورتوں اور بچوں سمیت نکل چکے ہیں اور وہ خدا کے نام پر اس بات کی قسم کھا رہے ہیں کہ ضرور بالضرور تیرے اور مکہ کے درمیان حائل ہوں گے یہاں تک کہ ان میں سے کوئی ایک بھی نہ بچے۔ آپ صلی اللہ علیہ وآلہ وسلم نے ارشاد فرمایا: اے بدیل! میں تو کسی کے ساتھ بھی لڑنے نہیں آیا۔ میں تو صرف اس لئے آیا ہوں تاکہ اپنے افعال عبادت ادا کرسکوں اور اس خانہ خدا کا طواف کروں۔ اور اگر یہ کام نہ ہو تو پھر کیا قریش کا کوئی اور ارادہ ہے؟ کیا وہ اس بات پر راضی ہیں کہ میں ان کے ساتھ ایک مدت طے کرلوں جس میں وہ مامون رہیں گے اور اتنی مدت تک وہ آرام بھی کرلیں۔ اور اس دوران وہ مجھے اور لوگوں کو کھلا چھوڑ دیں۔ اگر میرا معاملہ لوگوں پر غالب آگیا تو انہیں اس بات کا اختیار ہوگا۔ چاہے تو لوگوں کی طرح یہ بھی دین میں داخل ہوجائیں اور چاہے تو یہ لڑائی کرلیں درآنحالیکہ انہوں نے اپنی تعداد بڑھا کر خوب تیاری کرلی ہوگی۔ بدیل نے کہا۔ میں یہ بات آپ صلی اللہ علیہ وآلہ وسلم کی قوم کو پیش کروں گا۔ 5۔ پس بدیل سوار ہو کر (چل پڑا) یہاں تک کہ وہ قریش کے پاس سے گزرا تو قریش نے پوچھا: کہاں سے؟ اس نے کہا۔ میں تمہارے پاس رسول اللہ صلی اللہ علیہ وآلہ وسلم کے ہاں سے آیا ہوں۔ اگر تم چاہو تو میں نے ان سے جو سنا ہے وہ تمہیں بتا دوں۔ ان کے کچھ بیوقوف لوگوں نے کہا۔ ہمیں ان کے بارے میں کچھ نہ بتاؤ۔ اور ان کے کچھ بزرگ اور دانا لوگوں نے کہا۔ نہیں بلکہ ہمیں بتاؤ، تم نے کیا دیکھا اور کیا سنا؟ پس بدیل نے انہیں رسول اللہ صلی اللہ علیہ وآلہ وسلم کا واقعہ اور آپ صلی اللہ علیہ وآلہ وسلم کی پیش کردہ مدت بیان کی۔ راوی کہتے ہیں: اس دن کفار قریش میں عروہ بن مسعود ثقفی بھی تھا۔ وہ اچھل کر کھڑا ہوا اور کہنے لگا۔ اے قریش کی جماعت! کیا تم مجھ پر کسی بات کا الزام لگاتے ہو؟ کیا میں بیٹا نہیں اور تم والد نہیں ہو؟ کیا میں نے تمہارے لئے اہل عکاظ کو نہیں بلایا تھا؟ پھر جب انہوں نے مجھے انکار کردیا تو میں خود اپنی اولاد اور اپنے فرمانبرداروں کے ساتھ تمہارے پاس آگیا۔ انہوں نے کہا۔ کیوں نہیں! تم نے ایسا کیا ہے۔ اس نے کہا۔ تو بدیل جو کچھ تمہارے پاس لایا ہے اور رسول اللہ صلی اللہ علیہ وآلہ وسلم نے جو تم پر پیش کیا ہے اسے قبول کرلو۔ اور مجھے بھیجو تاکہ میں ان کے پاس سے اس کی تصدیق تمہارے پاس لے کر آؤں۔ انہوں نے کہا۔ جاؤ۔ پس عروہ نکلا یہاں تک کہ حدیبیہ میں رسول اللہ صلی اللہ علیہ وآلہ وسلم کے پاس آ کر اترا اور کہا۔ اے محمد! یہ تمہاری قوم کعب بن لؤی اور عامر بن لؤی عورتوں اور بچوں سمیت نکل چکی ہے۔ وہ قسم کھا رہے ہیں کہ وہ تمہارے اور مکہ کے درمیان سے نہیں ہٹیں گے یہاں تک کہ ان کی ساری جماعت ختم ہوجائے۔ اور تم ان سے لڑائی میں دو باتوں میں سے ایک کے درمیان ہو۔ یا تو تم اپنی قوم کو ہلاک کر دو، اور تم نے کبھی کسی آدمی کے بارے میں نہیں سنا جس نے تم سے پہلے اپنی اصل کو ہلاک کیا ہو۔ اور یا یہ کہ جن لوگوں کو میں تمہارے ساتھ دیکھ رہا ہوں وہ تمہیں چھوڑ کر حوالے کر دیں۔ کیونکہ میں تمہارے ساتھ صرف اوباش لوگوں کو دیکھ رہا ہوں جن کے نام اور چہرے میں نہیں پہچانتا۔ حضرت ابوبکر نے غصہ میں آ کر فرمایا: جا کر لات کی شرمگاہ چوس! کیا ہم آپ صلی اللہ علیہ وآلہ وسلم کو چھوڑ دیں گے یا حوالے کر دیں گے؟ عروہ نے کہا۔ بخدا! اگر تمہارا مجھ پر ایک احسان نہ ہوتا جس کا میں نے بدلہ نہیں دیا تو میں تمہاری بات کا جواب دیتا۔ عروہ نے ایک دیت کا بوجھ اٹھایا تھا تو حضرت ابوبکر نے اس میں اس کی اچھی مدد کی تھی۔ اور حضرت مغیرہ بن شعبہ رسول اللہ صلی اللہ علیہ وآلہ وسلم کے پاس کھڑے تھے اور ان کے چہرے پر خود تھا۔ اس لئے عروہ نے انہیں نہیں پہچانا۔ عروہ رسول اللہ صلی اللہ علیہ وآلہ وسلم سے بات کر رہا تھا۔ جب بھی وہ رسول اللہ صلی اللہ علیہ وآلہ وسلم کی ریش مبارک کو چھونے کے لئے اپنا ہاتھ بڑھاتا تو حضرت مغیرہ اپنے ہاتھ میں موجود پیالے سے اس پر مارتے۔ یہاں تک کہ جب اس نے اسے تنگ کردیا تو اس نے پوچھا: یہ کون ہے؟ لوگوں نے کہا۔ یہ مغیرہ بن شعبہ ہیں۔ عروہ نے کہا۔ اے دھوکے باز! یہ تم ہو؟ کیا تمہارا دھوکہ میں نے کل ہی عکاظ میں نہیں دھویا؟ نبی کریم صلی اللہ علیہ وآلہ وسلم نے عروہ بن مسعود سے وہی بات فرمائی جو بدیل سے فرمائی تھی۔ پس عروہ اٹھا اور نکل کر اپنی قوم کے پاس آیا اور کہا۔ اے قریش کی جماعت! میں بادشاہوں کے پاس وفد لے کر گیا ہوں۔ شام میں قیصر کے پاس اس کی بادشاہی میں، حبشہ کی سرزمین میں نجاشی کے پاس اور عراق میں کسریٰ کے پاس۔ بخدا! میں نے کوئی بادشاہ نہیں دیکھا جو اپنے اردگرد والوں میں اس سے زیادہ بڑا سمجھا جاتا ہو جتنا محمد (صلی اللہ علیہ وآلہ وسلم) اپنے صحابہ میں ہیں۔ بخدا! وہ ان کی طرف نظر جما کر نہیں دیکھتے اور ان کے پاس آواز بلند نہیں کرتے۔ اور وہ وضو نہیں کرتے مگر یہ لوگ اس پر ٹوٹ پڑتے ہیں کہ کون اس میں سے کچھ حاصل کرلے۔ پس بدیل جو کچھ تمہارے پاس لایا ہے اسے قبول کرلو کیونکہ یہ ہدایت کی راہ ہے۔ انہوں نے کہا۔ بیٹھ جاؤ۔ پھر انہوں نے بنو حارث بن عبد مناف کے ایک آدمی کو بلایا جس کا نام حلیس تھا اور کہا۔ جا کر دیکھو کہ اس آدمی کے پاس کیا ہے اور وہ تم سے کیسے ملتا ہے۔ پس حلیس نکلا۔ جب رسول اللہ صلی اللہ علیہ وآلہ وسلم نے اسے آتے دیکھا تو پہچان لیا اور فرمایا: یہ حلیس ہے اور یہ اس قوم سے ہے جو ہدی کی تعظیم کرتی ہے۔ پس ہدی کو اس کے سامنے بھیج دو۔ چنانچہ انہوں نے ہدی کو اس کے سامنے بھیج دیا۔ ابن شہاب کہتے ہیں: حلیس کے بارے میں روایت مختلف ہے۔ بعض کہتے ہیں کہ وہ آپ صلی اللہ علیہ وآلہ وسلم کے پاس آیا تو آپ صلی اللہ علیہ وآلہ وسلم نے اس سے وہی بات فرمائی جو بدیل اور عروہ سے فرمائی تھی۔ اور بعض کہتے ہیں کہ جب اس نے ہدی کو دیکھا تو قریش کی طرف لوٹ گیا اور کہا۔ میں نے ایک ایسا معاملہ دیکھا ہے کہ اگر تم نے اسے روکا تو مجھے تم پر خوف ہے کہ تمہیں کوئی مشقت پہنچے گی۔ پس تم اپنی بصیرت سے کام لو۔ انہوں نے کہا۔ بیٹھ جاؤ۔ پھر انہوں نے قریش کے ایک آدمی کو بلایا جس کا نام مکرز بن حفص بن احنف تھا اور وہ بنو عامر بن لؤی سے تھا۔ انہوں نے اسے بھیجا۔ جب نبی کریم صلی اللہ علیہ وآلہ وسلم نے اسے دیکھا تو فرمایا: یہ ایک فاجر آدمی ہے جو ایک آنکھ سے دیکھتا ہے۔ پھر آپ صلی اللہ علیہ وآلہ وسلم نے مدت کے بارے میں اس سے وہی بات فرمائی جو بدیل اور اس کے ساتھیوں سے فرمائی تھی۔ پس وہ ان کے پاس آیا اور انہیں خبر دی۔ پھر انہوں نے بنو عامر بن لؤی کے سہیل بن عمرو کو بھیجا تاکہ وہ رسول اللہ صلی اللہ علیہ وآلہ وسلم سے اس بات پر تحریر کرے جس کی طرف آپ صلی اللہ علیہ وآلہ وسلم نے بلایا تھا۔ پس سہیل بن عمرو آپ صلی اللہ علیہ وآلہ وسلم کے پاس آیا اور کہا۔ مجھے قریش نے آپ کے پاس بھیجا ہے تاکہ میں آپ کے ساتھ ایسے فیصلہ پر تحریر کروں جس پر میں اور آپ راضی ہوں۔ نبی کریم صلی اللہ علیہ وآلہ وسلم نے فرمایا: ہاں! لکھو۔ بِسْمِ اللہِ الرَّحْمَن الرَّحِیمِ۔ اس نے کہا۔ میں نہ اللہ کو جانتا ہوں اور نہ رحمن کو۔ بلکہ ایسے لکھو جیسے ہم لکھا کرتے تھے۔ بِاسْمِکَ اللّٰھُمَّ۔ لوگوں کو اس بات پر رنج ہوا اور انہوں نے کہا۔ ہم تمہارے ساتھ کسی بات پر تحریر نہیں کریں گے یہاں تک کہ تم رحمن اور رحیم کا اقرار کرو۔ سہیل نے کہا۔ تب تو میں بھی ان کے ساتھ کسی بات پر تحریر نہیں کروں گا یہاں تک کہ واپس لوٹ جاؤں۔ رسول اللہ صلی اللہ علیہ وآلہ وسلم نے فرمایا: لکھو! بِاسْمِکَ اللّٰھُمَّ۔ یہ وہ ہے جس پر محمد رسول اللہ صلی اللہ علیہ وآلہ وسلم نے فیصلہ کیا۔ اس نے کہا۔ میں اس کا اقرار نہیں کرتا۔ اگر میں جانتا کہ آپ اللہ کے رسول ہیں تو نہ آپ کی مخالفت کرتا اور نہ نافرمانی۔ بلکہ محمد بن عبد اللہ۔ لوگوں کو اس پر بھی رنج ہوا۔ آپ صلی اللہ علیہ وآلہ وسلم نے فرمایا: لکھو! محمد بن عبد اللہ، سہیل بن عمرو۔ حضرت عمر بن خطاب کھڑے ہوئے اور عرض کیا۔ یا رسول اللہ! کیا ہم حق پر نہیں ہیں؟ کیا ہمارا دشمن باطل پر نہیں ہے؟ آپ صلی اللہ علیہ وآلہ وسلم نے فرمایا: کیوں نہیں! حضرت عمر نے کہا۔ پھر ہم اپنے دین کے بارے میں یہ ذلت کیوں قبول کریں؟ آپ صلی اللہ علیہ وآلہ وسلم نے فرمایا: میں اللہ کا رسول ہوں۔ میں اس کی نافرمانی نہیں کروں گا اور وہ مجھے ضائع نہیں کرے گا۔ حضرت ابوبکر ایک طرف ہٹے ہوئے تھے۔ حضرت عمر ان کے پاس آئے اور کہا۔ اے ابوبکر! انہوں نے کہا۔ جی۔ حضرت عمر نے کہا۔ کیا ہم حق پر نہیں ہیں؟ کیا ہمارا دشمن باطل پر نہیں ہے؟ انہوں نے فرمایا: کیوں نہیں! حضرت عمر نے کہا۔ پھر ہم اپنے دین کے بارے میں یہ ذلت کیوں قبول کریں؟ انہوں نے فرمایا: اے عمر! جو تم دیکھ رہے ہو اسے چھوڑو۔ کیونکہ وہ اللہ کے رسول صلی اللہ علیہ وآلہ وسلم ہیں۔ اللہ انہیں ضائع نہیں کرے گا اور وہ اس کی نافرمانی نہیں کریں گے۔ تحریر کی شرطوں میں یہ تھا کہ ہم میں سے جو آپ کے پاس آئے، اگر وہ آپ کے دین پر ہو تو آپ اسے ہماری طرف واپس کریں گے اور جو آپ کی طرف سے ہمارے پاس آئے گا ہم اسے آپ کی طرف واپس کردیں گے۔ آپ صلی اللہ علیہ وآلہ وسلم نے فرمایا: جو میری طرف سے آئے مجھے اس کی واپسی کی کوئی حاجت نہیں۔ اور جو شرط تم نے اپنے لئے رکھی ہے وہ میرے اور تمہارے درمیان ہے۔ لوگ ابھی اسی حالت میں تھے کہ حضرت ابو جندل بن سہیل بن عمرو لوہے کی بیڑیوں میں گھسٹتے ہوئے ان کے سامنے آگئے۔ وہ مکہ کے نچلے حصہ سے نکل آئے تھے اور تلوار لٹکائے ہوئے تھے۔ سہیل نے سر اٹھایا تو اس کا بیٹا ابو جندل سامنے تھا۔ اس نے کہا۔ یہ پہلا شخص ہے جس کی واپسی پر میں نے آپ سے فیصلہ کیا ہے۔ نبی کریم صلی اللہ علیہ وآلہ وسلم نے فرمایا: اے سہیل! ہم نے ابھی تحریر پوری نہیں کی۔ اس نے کہا۔ میں آپ کے ساتھ کسی بات پر تحریر نہیں کروں گا یہاں تک کہ آپ اسے واپس کردیں۔ آپ صلی اللہ علیہ وآلہ وسلم نے فرمایا: تو اس کے ساتھ جو چاہو کرو۔ حضرت ابو جندل لوگوں کی طرف لپکے اور کہا۔ اے مسلمانوں کی جماعت! کیا مجھے مشرکین کی طرف واپس کیا جائے گا جو مجھے میرے دین کے بارے میں آزمائش میں ڈالیں گے؟ حضرت عمر ان کے ساتھ لگ گئے جبکہ ان کا والد ان کا ہاتھ پکڑ کر انہیں گھسیٹ رہا تھا۔ اور حضرت عمر کہہ رہے تھے۔ یہ تو ایک ہی آدمی ہے اور تمہارے پاس تلوار ہے۔ پھر ان کا والد انہیں لے گیا۔ نبی کریم صلی اللہ علیہ وآلہ وسلم ان کی طرف سے آپ کے دین میں داخل ہونے کے لئے آنے والے کو انہیں واپس کردیتے تھے۔ پھر جب ان میں سے ایک جماعت جمع ہوگئی جن میں حضرت ابو بصیر بھی تھے اور آپ صلی اللہ علیہ وآلہ وسلم نے انہیں ان کی طرف واپس کردیا تھا تو وہ سمندر کے ساحل پر ٹھہر گئے۔ اس طرح انہوں نے قریش کا شام کی طرف تجارتی راستہ کاٹ دیا۔ تو قریش نے رسول اللہ صلی اللہ علیہ وآلہ وسلم کی طرف پیغام بھیجا۔ ہم اسے آپ کی طرف سے صلہ رحمی سمجھیں گے کہ آپ انہیں اپنی طرف واپس بلا لیں اور اکٹھا کرلیں۔ پس آپ صلی اللہ علیہ وآلہ وسلم نے انہیں اپنی طرف واپس بلا لیا۔ نبی کریم صلی اللہ علیہ وآلہ وسلم تحریر میں ان سے جو چاہتے تھے اس میں یہ بھی تھا کہ وہ آپ کو مکہ میں داخل ہونے دیں تاکہ آپ اپنا نسک ادا کریں اور ان کے درمیان اپنی ہدی کو نحر کریں۔ انہوں نے کہا۔ عرب کبھی یہ نہ کہیں گے کہ آپ نے ہمیں دباؤ سے پکڑ لیا۔ بلکہ آپ اس سال واپس چلے جائیں۔ پھر جب اگلا سال آئے گا تو ہم آپ کو اجازت دیں گے اور آپ عمرہ کریں گے اور تین دن قیام کریں گے۔ رسول اللہ صلی اللہ علیہ وآلہ وسلم کھڑے ہوئے اور لوگوں سے فرمایا: اٹھو! اپنی ہدی کو نحر کرو اور حلق کرواؤ اور حلال ہو جاؤ۔ کوئی آدمی نہ کھڑا ہوا اور نہ کوئی حرکت کی۔ رسول اللہ صلی اللہ علیہ وآلہ وسلم نے لوگوں کو تین مرتبہ اس کا حکم دیا لیکن کوئی آدمی نہ ہلا اور نہ اپنی جگہ سے اٹھا۔ جب نبی کریم صلی اللہ علیہ وآلہ وسلم نے یہ دیکھا تو آپ صلی اللہ علیہ وآلہ وسلم حضرت ام سلمہ کے پاس تشریف لے گئے۔ آپ صلی اللہ علیہ وآلہ وسلم اس غزوہ میں انہیں ساتھ لے کر نکلے تھے۔ آپ صلی اللہ علیہ وآلہ وسلم نے فرمایا: اے ام سلمہ! لوگوں کو کیا ہوگیا ہے؟ میں نے انہیں تین مرتبہ حکم دیا ہے کہ نحر کریں اور حلق کروائیں اور حلال ہوجائیں لیکن کوئی آدمی بھی میرے حکم پر کھڑا نہیں ہوا۔ انہوں نے عرض کیا۔ یا رسول اللہ صلی اللہ علیہ وآلہ وسلم! آپ خود نکل کر یہ کام کریں۔ پس رسول اللہ صلی اللہ علیہ وآلہ وسلم کھڑے ہوئے یہاں تک کہ اپنی ہدی کی طرف گئے اور اسے نحر کیا اور حجام کو بلا کر حلق کروایا۔ جب لوگوں نے رسول اللہ صلی اللہ علیہ وآلہ وسلم کا عمل دیکھا تو وہ اپنی ہدی کی طرف لپکے اور اسے نحر کیا۔ اور ایک دوسرے کا حلق کرنے میں لگ گئے یہاں تک کہ رش کی وجہ سے قریب تھا کہ ایک دوسرے کو دبا دیں۔ [مصنف ابن ابي شيبه/كتاب المغازي/حدیث: 39624]

حضرت ابن شہاب فرماتے ہیں کہ رسول اللہ صلی اللہ علیہ وآلہ وسلم اور آپ صلی اللہ علیہ وآلہ وسلم کے صحابہ جو ہدی ہانک کر لے گئے تھے وہ ستر اونٹ تھے۔ حضرت ابن شہاب فرماتے ہیں کہ رسول اللہ صلی اللہ علیہ وآلہ وسلم نے خیبر کو اہل حدیبیہ پر اٹھارہ حصوں میں تقسیم فرمایا، ہر سو آدمیوں کے لئے ایک حصہ۔ [مصنف ابن ابي شيبه/كتاب المغازي/حدیث: 39625]

حضرت عطاء سے روایت ہے کہ حدیبیہ کے دن نبی کریم صلی اللہ علیہ وآلہ وسلم کے پڑاؤ کا مقام حرم تھا۔ [مصنف ابن ابي شيبه/كتاب المغازي/حدیث: 39626]

حضرت براء بیان فرماتے ہیں۔ کہ حدیبیہ کے روز ہم لوگوں کی تعداد چودہ سو تھی۔ [مصنف ابن ابي شيبه/كتاب المغازي/حدیث: 39627]