سیدنا سلمہ بن اکوع رضی اللہ عنہ بیان کرتے ہیں: نبی کریم صلی اللہ علیہ وسلم سے کمان یا سینگ میں نماز ادا کرنے کے بارے میں دریافت کیا گیا، تو آپ نے فرمایا: ”سینگ کو اتار دو اور کمان پہن کر نماز پڑھو۔“ [سنن الدارقطني/ كِتَابُ الصَّلَاةِ/حدیث: 1486]

سیدنا عبداللہ بن عباس رضی اللہ عنہما بیان کرتے ہیں: (ارشاد باری تعالیٰ ہے): ”ہر نماز کے وقت زینت اختیار کرو۔“ وہ یہ فرماتے ہیں: اس سے مراد جوتے پہن کر نماز ادا کرنا ہے۔ نبی کریم صلی اللہ علیہ وسلم نے جوتے پہن کر نماز ادا کی، پھر آپ نے انہیں اتارا، تو لوگوں نے بھی اپنے جوتے اتار دیے۔ جب نبی کریم صلی اللہ علیہ وسلم نے نماز مکمل کر لی، تو آپ نے دریافت کیا: ”تم لوگوں نے اپنے جوتے کیوں اتارے ہیں؟“ لوگوں نے عرض کیا: ہم نے آپ کو دیکھا کہ آپ نے جوتے اتار دیے ہیں، تو ہم نے بھی اتار دیے۔ نبی کریم صلی اللہ علیہ وسلم نے فرمایا: ”جبرائیل علیہ السلام میرے پاس آئے تھے اور انہوں نے یہ بتایا تھا کہ ان پر خون لگا ہوا ہے۔“ [سنن الدارقطني/ كِتَابُ الصَّلَاةِ/حدیث: 1487]