سیدنا خارجہ بن حذافہ رضی اللہ عنہ بیان کرتے ہیں: ایک دفعہ نبی کریم صلی اللہ علیہ وسلم ہمارے پاس تشریف لائے، آپ صلی اللہ علیہ وسلم نے ارشاد فرمایا: ”اللہ تعالیٰ نے تمہیں ایک مزید نماز عطا کی ہے، جو تمہارے لیے سرخ اونٹوں سے زیادہ بہتر ہے، وہ وتر کی نماز ہے، اللہ تعالیٰ نے اس کا وقت عشاء کی نماز سے لے کر صبح صادق تک مقرر کیا ہے۔“ [سنن الدارقطني/ كِتَابُ الْوِتْرِ/حدیث: 1656]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم ہمارے پاس تشریف لائے، آپ صلی اللہ علیہ وسلم کے چہرہ مبارک سے خوشی اور سرور کی کیفیت نمایاں تھی، تو آپ صلی اللہ علیہ وسلم نے ارشاد فرمایا: ”اللہ تعالیٰ نے آپ کو مزید ایک نماز عطا کی ہے اور وہ وتر کی نماز ہے۔“ اس روایت کا راوی ابوعمر نضر خزاز ضعیف ہے۔ [سنن الدارقطني/ كِتَابُ الْوِتْرِ/حدیث: 1657]

عمرو بن شعیب اپنے والد کے حوالے سے، اپنے دادا کا یہ بیان نقل کرتے ہیں: ایک طویل عرصہ ایسا گزر گیا کہ ہم پانچ نمازوں کے علاوہ مزید کوئی نماز نہیں ادا کرتے تھے، پھر نبی کریم صلی اللہ علیہ وسلم نے ہمیں حکم دیا، تو ہم اکٹھے ہوئے، نبی کریم صلی اللہ علیہ وسلم نے اللہ کی حمد و ثنا بیان کرنے کے بعد فرمایا: ”بیشک اللہ تعالیٰ نے تمہیں ایک اور نماز عطا کی ہے،“ پھر نبی کریم صلی اللہ علیہ وسلم نے ہمیں وتر ادا کرنے کی تلقین کی۔ اس روایت کا راوی (یعنی عبیداللہ) محمد بن عبیداللہ عزیم ضعیف ہے۔ [سنن الدارقطني/ كِتَابُ الْوِتْرِ/حدیث: 1658]