سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بلال کی اذان تم میں سے کسی ایک شخص کو ہرگز نہ روکے (راوی کو شک ہے شاید یہ الفاظ ہیں) بلال کی اذان آدمی کو اس کی سحری سے نہ روکے، کیونکہ وہ اس لیے اذان دیتا ہے (راوی کو شک ہے شاید یہ الفاظ ہیں) اعلان کرتا ہے، تاکہ نوافل ادا کرنے والا (نوافل کو چھوڑ کر سحری کرنے کے لیے) واپس چلا جائے اور وہ تمہارے سوئے ہوئے شخص کو بیدار کر دے۔“ نبی اکرم صلی اللہ علیہ وسلم نے ارشاد فرمایا: ”صبح صادق اس طرح اور اس طرح نہیں ہوتی ہے“، نبی اکرم صلی اللہ علیہ وسلم نے اپنا ہاتھ مارا اور اسے بلند کیا، ”بلکہ وہ اس طرح ہوتی ہے“، نبی اکرم صلی اللہ علیہ وسلم نے اپنی انگلیوں کو کشادہ کر کے یہ فرمایا۔ [صحیح ابن حبان/كِتَابُ الصَّوْمِ/حدیث: 3468]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”بلال رات میں ہی اذان دے دیتے ہیں، تو تم لوگ اس وقت تک کھاتے پیتے رہو جب تک ابن ام مکتوم اذان نہ دے دیں۔“ ابن شہاب بیان کرتے ہیں: ابن ام مکتوم رضی اللہ عنہ ایک نابینا شخص تھے، وہ اس وقت تک اذان نہیں دیتے تھے جب تک ان سے یہ نہیں کہا جاتا تھا کہ صبح ہو گئی ہے، صبح ہو گئی ہے۔ (امام ابن حبان رحمہ اللہ فرماتے ہیں:) اس روایت کو امام مالک رحمہ اللہ کے حوالے سے مسند (یعنی متصل) حدیث کے طور پر صرف قعنبی اور جویریہ بن اسماء نے نقل کیا ہے، امام مالک رحمہ اللہ کے تمام دیگر شاگردوں نے یہ بات نقل کی ہے کہ یہ روایت زہری کے حوالے سے، سالم کے حوالے سے، نبی اکرم صلی اللہ علیہ وسلم سے منقول ہے (یعنی یہ مرسل روایت ہے متصل نہیں ہے)۔ [صحیح ابن حبان/كِتَابُ الصَّوْمِ/حدیث: 3469]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”بلال رات میں ہی (یعنی صبح صادق ہونے سے کچھ پہلے ہی) اذان دے دیتا ہے، تو تم لوگ اس وقت تک کھاتے پیتے رہو جب تک ابن ام مکتوم کی اذان نہیں سنتے۔“ [صحیح ابن حبان/كِتَابُ الصَّوْمِ/حدیث: 3470]