سیدنا انس بن مالک رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جو شخص میرے اس مکتوب کو لے کر قیصر کے پاس جائے گا اسے جنت ملے گی۔ حاضرین میں سے ایک صاحب نے دریافت کیا: اگرچہ مجھے قتل نہ کیا جائے۔ نبی اکرم صلی اللہ علیہ وسلم نے فرمایا: اگرچہ تمہیں قتل نہ کیا جائے (پھر بھی تمہیں جنت ملے گی) تو وہ شخص اس خط کو لے کر روانہ ہو گیا وہ قیصر کے پاس اس وقت پہنچا جب قیصر بیت المقدس آیا ہوا تھا اور اس کے لیے ایک قالین بچھایا گیا تھا اس قالین پر قیصر کے علاوہ اور کوئی نہیں چلتا تھا اس شخص نے وہ مکتوب اس قالین پر رکھ دیا اور خود ایک طرف ہٹ گیا جب قیصر اس مکتوب تک پہنچا تو اس نے اسے حاصل کیا اور پھر اپنے معتمد خصوصی کو بلوا کر اس سے وہ خط پڑھایا تو اس نے جواب دیا: اس مکتوب کے بارے میں مجھے بھی وہی علم ہے، جو آپ کو علم ہے تو قیصر نے بلند آواز میں کہا: اس خط کو لانے والا شخص کون ہے اسے امان دی جاتی ہے تو وہ شخص آ گیا قیصر نے کہا: جب میں آ جاؤں، تو تم میرے پاس آ جانا جب قیصر آیا تو وہ شخص اس کے پاس آیا قیصر نے اپنے دروازوں کے بارے میں حکم دیا انہیں بند کر دیا گیا پھر اس نے منادی کو یہ اعلان کرنے کے لیے کہا: کہ قیصر نے سیدنا محمد صلی اللہ علیہ وسلم کی پیروی کر لی ہے اور عیسائیت کو ترک کر دیا ہے تو اس کے سپاہی آگے بڑھے انہوں نے اسلحہ اٹھایا ہوا تھا انہوں نے اس کے محل کا محاصرہ کر لیا تو قیصر نے نبی اکرم صلی اللہ علیہ وسلم کے ایلچی سے کہا: تم نے دیکھ لیا ہے مجھے اپنی حکومت کے حوالے سے خوف ہے پھر اس نے منادی کو یہ اعلان کرنے کو کہا: خبردار قیصر تم لوگوں سے راضی ہے اس نے تم لوگوں کا امتحان لینا چاہا تھا کہ تم اپنے دین کے بارے میں کتنے پختہ ہو تم لوگ واپس چلے جاؤ تو وہ لوگ واپس چلے گئے پھر قیصر نے نبی اکرم صلی اللہ علیہ وسلم کو خط لکھا کہ میں مسلمان ہوں اس نے نبی اکرم صلی اللہ علیہ وسلم کی خدمت میں کچھ دینار بھی بھجوائے نبی اکرم صلی اللہ علیہ وسلم نے جب اس کا مکتوب پڑھا تو ارشاد فرمایا: اللہ کے دشمن نے غلط کہا: ہے یہ مسلمان نہیں ہے یہ عیسائیت پر قائم ہے نبی اکرم صلی اللہ علیہ وسلم نے وہ دینار تقسیم کروا دیئے۔ [صحیح ابن حبان/كِتَابُ السِّيَرِ/حدیث: 4504]