ام المؤمنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”اللہ تعالیٰ کسی بالغ عورت کی نماز اوڑھنی کے بغیر قبول نہیں فرماتا۔“ امام ابوداؤد رحمہ اللہ نے کہا: ”اس حدیث کو سعید یعنی ابن ابی عروبہ نے قتادہ سے، انہوں نے حسن سے، انہوں نے نبی کریم صلی اللہ علیہ وسلم سے روایت کیا ہے۔“ [سنن ابي داود/كِتَاب الصَّلَاةِ/حدیث: 641]

امام محمد بن سیرین بیان کرتے ہیں کہ سیدہ عائشہ رضی اللہ عنہا، صفیہ ام طلحہ الطلحات کی مہمان ہوئیں۔ پس ان کی بیٹیوں کو دیکھا تو فرمایا کہ رسول اللہ صلی اللہ علیہ وسلم تشریف لائے جبکہ میرے حجرے میں ایک نوعمر لڑکی تھی۔ آپ صلی اللہ علیہ وسلم نے اپنا تہبند میری طرف پھینکا اور فرمایا: ”اسے دو حصوں میں پھاڑو اور ایک حصہ اس لڑکی کو دے دو اور دوسرا اس کو جو ام سلمہ رضی اللہ عنہا کے ہاں ہے۔ میں سمجھتا ہوں کہ یہ بالغ (جوان) ہو گئی ہے۔ یا (فرمایا کہ) میں سمجھتا ہوں کہ یہ دونوں جوان ہو گئی ہیں۔“ امام ابوداؤد رحمہ اللہ نے کہا: ہشام نے بھی ابن سیرین سے ایسے ہی روایت کیا ہے۔ [سنن ابي داود/كِتَاب الصَّلَاةِ/حدیث: 642]