سیدنا عبداللہ بن عباس رضی اللہ عنہما کے بارے میں یہ بات منقول ہے کہ کچھ لوگ ان کے پاس آئے اور ان سے نبیذ کے بارے میں دریافت کیا، تو سیدنا عبداللہ بن عباس رضی اللہ عنہما نے بتایا کہ نبی اکرم صلی اللہ علیہ وسلم سفر پر تشریف لے گئے ہوئے تھے، جب آپ صلی اللہ علیہ وسلم واپس تشریف لائے تو آپ کے اصحاب میں سے کچھ لوگوں نے حنتم، نقیر اور دباء نامی مخصوص قسم کے برتنوں میں نبیذ تیار کی، نبی اکرم صلی اللہ علیہ وسلم کے حکم کے تحت اسے بہا دیا گیا، پھر نبی اکرم صلی اللہ علیہ وسلم کے حکم کے تحت مشکیزے میں کشمش اور پانی ڈالا گیا اور نبی اکرم صلی اللہ علیہ وسلم کے لیے رات کے وقت نبیذ تیار کی گئی، اگلے دن کی صبح آپ صلی اللہ علیہ وسلم نے اسے پی لیا، اس کے بعد اگلی رات آئی، اس کے بعد اگلا دن آیا، یہاں تک کہ جب اس کی شام آئی تو آپ صلی اللہ علیہ وسلم نے اسے پیا اور لوگوں کو بھی پلایا، اس کے اگلے دن آپ صلی اللہ علیہ وسلم کے حکم کے تحت صبح کے وقت اس نبیذ کو بہا دیا گیا۔ [صحیح ابن حبان/كِتَابُ الأَشْرِبَةِ/حدیث: 5386]