سیدنا عبداللہ بن مسعود رضی اللہ عنہ بیان کرتے ہیں کہ ”رسول اللہ صلی اللہ علیہ وسلم نے ہمیں نماز خوف پڑھائی۔ (مجاہدین نے دو صفیں بنائیں) ایک صف رسول اللہ صلی اللہ علیہ وسلم کے پیچھے کھڑی ہوئی اور دوسری دشمن کے سامنے رہی۔ آپ نے ان کو (جو آپ کے پیچھے تھے) ایک رکعت پڑھائی، پھر دوسرے آ گئے اور ان لوگوں کی جگہ پر کھڑے ہو گئے اور یہ دشمن کے مقابلے میں چلے گئے۔ نبی کریم صلی اللہ علیہ وسلم نے ان کو ایک رکعت پڑھائی اور خود سلام پھیر دیا، تو ان لوگوں نے اٹھ کر اپنی ایک رکعت پڑھی اور سلام پھیرا، پھر چلے گئے اور ان لوگوں کی جگہ پر جا کھڑے ہوئے جو دشمن کے سامنے تھے، پھر دوسرے ان لوگوں کی جگہ پر آ گئے اور اپنی اپنی ایک رکعت پڑھی اور سلام پھیرا۔“ [سنن ابي داود/كتاب صلاة السفر/حدیث: 1244]

جناب خصیف نے اپنی سند سے اس کے ہم معنی بیان کیا، اس روایت میں ہے کہ ”اللہ کے نبی کریم صلی اللہ علیہ وسلم نے تکبیر کہی تو دونوں صفوں نے ان کے ساتھ مل کر تکبیر کہی۔“ امام ابوداؤد رحمہ اللہ کہتے ہیں کہ ”ثوری نے بھی خصیف سے اسی کے ہم معنی روایت کیا ہے اور سیدنا عبدالرحمٰن بن سمرہ رضی اللہ عنہ نے بھی ایسے ہی پڑھائی تھی، سوائے اس کے کہ جس گروہ نے آخر میں ان کے ساتھ ایک رکعت پڑھی، وہ امام کے سلام کے بعد دشمن کے سامنے چلے گئے۔ پھر پہلا گروہ آیا اور اس نے اپنے طور پر ایک رکعت پڑھی (جو باقی تھی) پھر یہ دوسرے گروہ کی جگہ پر لوٹ گئے، بعد ازاں دوسرا گروہ آیا اور اس نے ایک رکعت پڑھی۔“ امام ابوداؤد رحمہ اللہ نے کہا: ”ہمیں یہ مسلم بن ابراہیم نے بیان کیا کہ ہمیں عبدالصمد بن حبیب نے بیان کیا، وہ اپنے والد سے بیان کرتے ہیں کہ ان لوگوں نے سیدنا عبدالرحمٰن بن سمرہ رضی اللہ عنہ کے ساتھ کابل میں جہاد کیا اور انہوں نے ہم کو نماز خوف پڑھائی۔“ [سنن ابي داود/كتاب صلاة السفر/حدیث: 1245]