سیدنا سلمہ بن اکوع رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کے ہمراہ سات غزوات میں شرکت کی ہے اور سیدنا زید بن حارثہ رضی اللہ عنہ کے ہمراہ نو غزوات میں شرکت کی ہے، نبی اکرم صلی اللہ علیہ وسلم نے انہیں ہمارا امیر مقرر کیا تھا۔ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7174]

ایاس بن سلمہ بن اکوع اپنے والد (سیدنا سلمہ بن اکوع رضی اللہ عنہما) کا یہ بیان نقل کرتے ہیں: ہم لوگ نبی اکرم صلی اللہ علیہ وسلم کے ہمراہ حدیبیہ آئے، پھر ہم مدینہ منورہ کی طرف واپس جانے کے لیے روانہ ہوئے تو نبی اکرم صلی اللہ علیہ وسلم نے ارشاد فرمایا: ”آج ہمارا سب سے بہترین گھڑ سوار ابوقتادہ اور ہمارا سب سے بہترین پیادہ سلمہ بن اکوع ہے“، پھر نبی اکرم صلی اللہ علیہ وسلم نے مجھے گھڑ سوار اور پیادہ (دونوں طرح کے لوگوں) کا حصہ عطا کیا۔ (امام ابن حبان رحمہ اللہ فرماتے ہیں:) سیدنا سلمہ بن اکوع رضی اللہ عنہما اس جنگ میں پیادہ کے طور پر شریک ہوئے تھے، نبی اکرم صلی اللہ علیہ وسلم نے انہیں پیادہ کا حصہ دیا تھا، جس کے وہ مالِ غنیمت میں سے مستحق تھے اور گھڑ سوار کا حصہ نبی اکرم صلی اللہ علیہ وسلم نے انہیں خمس میں سے دیا تھا، ایسا نہیں ہے کہ سیدنا سلمہ رضی اللہ عنہما کو مسلمانوں کے حصے میں سے گھڑ سوار کا حصہ دیا گیا۔ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7175]