سیدنا عمر بن خطاب رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”میں ایک ایسا کلمہ جانتا ہوں جسے کوئی بھی بندہ اپنے دل کے سچے یقین کے ساتھ کہے اور اسی پر اسے موت آ جائے، تو اس پر جہنم کی آگ حرام کر دی جائے گی، (اور وہ کلمہ) «لا اله الا الله» (اللہ کے سوا کوئی سچا معبود نہیں) ہے۔“
یہ حدیث شیخین کی شرط پر صحیح ہے، لیکن انہوں نے اسے ان الفاظ اور اس سند کے ساتھ روایت نہیں کیا، البتہ انہوں نے محمود بن ربیع کی عتبان بن مالک سے مروی طویل حدیث پر اتفاق کیا ہے جس کے آخر میں یہ الفاظ ہیں: ”اور بے شک اللہ نے اس شخص پر آگ حرام کر دی ہے جس نے اللہ کی رضا کے لیے «لا اله الا الله» کہا۔“ نیز انہوں نے اسے شعبہ، بشر بن مفضل اور خالد حذاء کی سند سے ولید ابو بشر کے واسطے سے سیدنا عثمان رضی اللہ عنہ سے بھی روایت کیا ہے کہ ”جو اس حال میں فوت ہوا کہ وہ جانتا تھا کہ اللہ کے سوا کوئی معبود نہیں، وہ جنت میں داخل ہو گیا“، اور اس میں سیدنا عمر رضی اللہ عنہ کا ذکر نہیں ہے۔ [المستدرك على الصحيحين/كِتَابُ الْإِيمَانِ/حدیث: 243]