سیدنا جابر بن عبداللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”وضو کے لیے ایک مد (تقریباً آدھا کلو پانی) اور غسلِ جنابت کے لیے ایک صاع (تقریباً ڈھائی کلو پانی) کافی ہے۔“ تو ایک شخص نے ان سے کہا کہ یہ (مقدار) ہمیں کافی نہیں ہوتی اے جابر! انہوں نے جواب دیا: ”یہ اس ہستی کے لیے کافی تھی جو تم سے بہتر (یعنی رسول اللہ صلی اللہ علیہ وسلم ) اور تم سے زیادہ بالوں والی تھی۔“
یہ حدیث امام بخاری اور امام مسلم کی شرط پر صحیح ہے لیکن انہوں نے اسے ان الفاظ کے ساتھ روایت نہیں کیا۔ [المستدرك على الصحيحين/كِتَابُ الطَّهَارَةِ/حدیث: 584]

سیدنا عبداللہ بن زید رضی اللہ عنہ سے روایت ہے کہ نبی کریم صلی اللہ علیہ وسلم کے پاس ایک مد کا دو تہائی پانی لایا گیا، آپ صلی اللہ علیہ وسلم نے اس سے وضو کیا اور اپنے بازوؤں کو ملنے لگے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الطَّهَارَةِ/حدیث: 585]