سیدنا ابن ام مکتوم رضی اللہ عنہ سے مروی ہے کہ رسول اللہ صلی اللہ علیہ وسلم نے عشاء کی نماز میں لوگوں کی طرف رخ کر کے فرمایا: ”میرا ارادہ ہوا کہ میں ان لوگوں کے پاس جاؤں جو اس نماز سے پیچھے رہ جاتے ہیں اور ان کے گھروں کو ان پر آگ لگا کر جلا دوں۔“ تو سیدنا ابن ام مکتوم کھڑے ہوئے اور عرض کیا: یا رسول اللہ! آپ کو میرے حال کا علم ہے، میں نابینا ہوں اور میرا کوئی راستہ دکھانے والا نہیں ہے، آپ صلی اللہ علیہ وسلم نے پوچھا: ”کیا تم اقامت کی آواز سنتے ہو؟“ انہوں نے کہا: جی ہاں، آپ صلی اللہ علیہ وسلم نے فرمایا: ”پھر حاضر ہوا کرو۔“ انہوں نے (دوبارہ) عرض کیا: یا رسول اللہ! میرے اور مسجد کے درمیان کھجور کے درخت اور جھاڑیاں ہیں اور میرا کوئی مستقل قائد نہیں ہے، آپ صلی اللہ علیہ وسلم نے (پھر) پوچھا: ”کیا تم اقامت سنتے ہو؟“ انہوں نے کہا: جی ہاں، آپ صلی اللہ علیہ وسلم نے فرمایا: ”پھر حاضر ہوا کرو،“ اور آپ صلی اللہ علیہ وسلم نے انہیں (گھر میں نماز کی) رخصت نہیں دی۔ [المستدرك على الصحيحين/كِتَابِ الْإِمَامَةِ وَصَلَاةِ الْجَمَاعَةِ/حدیث: 821]

سیدنا ابن ام مکتوم رضی اللہ عنہ سے مروی ہے کہ انہوں نے نبی کریم صلی اللہ علیہ وسلم سے پوچھا: یا رسول اللہ! میں بصارت سے محروم ہوں، میرا گھر دور ہے اور میرا کوئی ایسا قائد نہیں ہے جو میرے موافق ہو، تو کیا مجھے گھر میں نماز پڑھنے کی رخصت ہے؟ آپ صلی اللہ علیہ وسلم نے پوچھا: ”کیا تم اذان سنتے ہو؟“ انہوں نے کہا: جی ہاں، آپ صلی اللہ علیہ وسلم نے فرمایا: ”میں تمہارے لیے کوئی رخصت نہیں پاتا۔“
امام حاکم فرماتے ہیں کہ اس کا شاہد عاصم بن بہدلہ کی روایت سے بھی موجود ہے۔ [المستدرك على الصحيحين/كِتَابِ الْإِمَامَةِ وَصَلَاةِ الْجَمَاعَةِ/حدیث: 822]